கதம்பம் - புகைப்படச் சுருள் - Doodle Art - கனவுகள் - ஆதி வெங்கட்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு கதம்பம் பதிவுடன் உங்கள் அனைவரையும் சந்திப்பதில் மகிழ்ச்சி.   முகநூலில் எழுதிய இற்றைகளின் தொகுப்பு - அங்கே வாசிக்காதவர்களின் வசதிக்காகவும், எனது சேமிப்பிற்காகவும் இங்கேயும் பகிர்ந்து கொள்கிறேன்.

இதற்கு முன்னர் வெளியிட்ட கதம்பம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

புகைப்படச் சுருள் - 30 டிசம்பர் 2025 : 

நீங்கள் முதன்முதலில் வாங்கிய புகைப்படக் கருவியைப் பற்றிய ஒரு நினைவை படம் பிடித்துக் காட்டுங்கள் என்று அன்புத்தோழி ஜெயா சிங்காரவேலு எழுதிப் பகிர்ந்த அழகிய பகிர்வைப் பார்த்தவுடன் சட்டென்று நானும் ஒரு நினைவுச் சுருளுக்குள் சென்று வந்த உணர்வை ஊட்டியது! அது தான் எழுத்துக்கு உள்ள ஆளுமைத் திறன்.❤️

இன்று எளிமையாக கிடைக்கும் விஷயங்கள் அனைத்தும் அன்று எட்டாக்கனியாக இருந்த நடுத்தரக் குடும்பத்தில் நாங்கள் இருவருமே வளர்ந்திருந்ததால், புகைப்படக் கருவி என்பதை முதன்முதலில் எங்களுக்காக நாங்கள் வாங்கிக் கொண்டது என்றால் அது எங்கள் மகள் பிறந்த பிறகு தான் என்று சொல்வேன்!

2005ஆம் வருடம் அப்போது கிழக்கு  டெல்லியில் நாங்கள் வசித்த நேரம், அப்போது தான் சின்னஞ்சிறு பஞ்சுப் பொதியாய் பிறந்திருந்த எங்கள் செல்ல மகளின் சின்னஞ்சிறு விஷமங்களை விதம்விதமாக படம் பிடிக்கலாமே என்று தான் கேமிரா ஒன்றை ஆசையாக வாங்கினார் என்னவர்! அது Canon BF 800 மாடல்! அன்றைய கேமிராவில் கணக்கிட்டு  பார்த்து பார்த்து தான் புகைப்படங்களை எடுக்க வேண்டும்! 

ஒரு புகைப்படச் சுருளுக்கு 36 படங்களே எடுக்க முடியும்! முதலில் எல்லாம் நாங்கள் இருவரும் தான் மாற்றி மாற்றி எங்கள் மகளுடன் புகைப்படங்கள் எடுத்துக் கொள்வோம்! நேரம் செட் செய்து விட்டு அதற்கு ஏற்றாற் போல் ஓடி வந்து எடுக்க துவங்கிய நினைவுகள் ஸ்வாரஸ்யம்! பின்பு மகள் வளர்ந்தது முதல் அவள் எங்கள் இருவரையும் க்யூட்டாக படம் பிடிக்கத் துவங்கினாள்!

மகள் ஒவ்வொரு கட்டமாக வளரத் துவங்கினது போல நாங்களும் வாழ்வில் மெல்ல மெல்ல மெருகேறத் துவங்கிய பின் டிஜிட்டல் கேமிரா, DSLR என்று பயன்படுத்தத் துவங்கினோம்! பின்பு திட்டமிடல் ஏதும் இல்லாமல் கணக்கில்லாமல் நிறைய நிறைய புகைப்படங்களை எடுக்கத் துவங்கினோம்..🙂 என்னவர் ஒரு பயணக்காதலன் என்பதால் தன்னுடைய பயண அனுபவங்களை எல்லாம் புகைப்படங்களில் பத்திரப்படுத்தத் துவங்கினார்!

நமக்கே நமக்காக சிறுகச் சிறுக பொருள் சேர்த்து வாங்கிப் பயன்படுத்தும் ஒரு பொருளுக்குள் தான் எத்தனை கதைகள் பொதிந்திருக்கின்றன! வாழ்வில் பின்னோக்கி நம்மை பயணிக்கச் செய்து நம்மை மகிழச் செய்யும் ஒரு கருவியாக இருக்கும் அழகிய புகைப்படங்களை உருவாக்கும் கேமிரா! நீங்களும் இப்படியொரு நினைவு சுருளுக்குள் உங்களை பிணைத்துக் கொண்டு மகிழுங்களேன்.

******

Roshni Corner - Doodle Art:

Doodle Art - மகளின் கைவண்ணத்தில்… பாருங்களேன். 

******

கனவுகள்:

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

31 டிசம்பர் 2025