காஃபி வித் கிட்டு - 226 - தில்லியும் திருச்சியும் - ZAOULI - விருது - Suri பழங்குடி - சந்தோஷம் - தரிசனம் - காதல்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட அலைபேசி அட்டூழியங்கள் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

அலுவலக அனுபவங்கள்  : தில்லியும் திருச்சியும்…

கிட்டத்தட்ட 35 வருடங்கள் தலைநகர் தில்லியில் பணிபுரிந்த அலுவலகங்களில் கிடைத்த அனுபவங்களுக்கும் தற்போது கடந்த நான்கு மாதங்களில் திருச்சி அலுவலகத்தில் கிடைத்துக் கொண்டிருக்கும் அனுபவங்களுக்கும் இடையில் நிறைய வித்தியாசங்கள்.  அலுவலில் இன்னும் இருப்பதால் பல விஷயங்களை வெளியே சொல்லிக் கொள்ள முடியாது.  ஆனாலும் சில அனுபவங்களை அவ்வப்போது எழுதலாம் - அதிலும் குறிப்பாக தில்லி அனுபவங்கள் குறித்து எழுதலாம் என்று தோன்றுகிறது.  முடிந்தால் வரும் வாரங்களிலிருந்து எழுதுகிறேன்.  முன்னரும் சில அனுபவங்களை எழுதியிருக்கிறேன் என்றாலும் இன்னும் எழுத நிறையவே விஷயங்கள் உண்டு.  தில்லி அனுபவங்களை எழுதினால் படிக்க நீங்க ரெடி என்றால் எழுத நான் ரெடி?  என்ன ஆரம்பிக்கலாமா? சொல்லுங்களேன்.  

 

******

இந்த வாரத்தின் ரசித்த காணொளி :  ZAOULI நடனம்

Ivory Coast என்கிற நாட்டில் உள்ள Guro பழங்குடியினரின் ஒரு வித நடனம் தான் ZAOULI எனும் நடனம்.  பார்க்கும் நமக்கே கால் வலிப்பது போல உணர்வு வரும் என்பதில் எனக்கு சந்தேகம் இல்லை.  எத்தனை வேகம் இந்த வித நடனத்தில்.  அதிலும் நின்ற இடத்திலேயே எத்தனை வேக வேகமாக கால்கள் மேலும் கீழும் சென்று வருகின்றன.  சாதாரணமாக ஏதோ வேலைக்காக ஸ்டூல் மீது ஏறி கீழே குதித்தாலே கால் வலிப்பதாய் உணரும் நாம் எங்கே? இந்த நடனக் கலைஞர்கள் எங்கே? நடனத்தினை நீங்களும் பாருங்களேன்.

******

 

பழைய நினைப்புடா பேராண்டி : விருது வாங்கலையோ விருது

2012-ஆம் ஆண்டு இதே நாளில் வெளியிட்ட பதிவு - விருது வாங்கலையோ விருது - அந்தப் பதிவிலிருந்து சில வரிகள் இங்கே. பதிவுலகத்தில் இருந்த அனைவரும் ஒருவருக்கு ஒருவர் விருது வழங்கி மகிழ்வுற்ற காலமது…  இனிய நினைவுகள் - பதிவில் கருத்திட்ட பலரும் இப்போது பதிவுகளே எழுதாமல் முகநூலில் மூழ்கி விட்டார்கள்!  

“என்னங்க! வாசல்ல கையிலே வீடியோ காமிரா, மைக் எல்லாம் வச்சுக்கிட்டு ஒரு பெரிய கும்பல், உங்க பேரைச் சொல்லி கேட்கறாங்க! நீங்க என்னடான்னா இன்னும் தூங்கிக்கிட்டிருக்கீங்க, சீக்கிரம் எழுந்து வாங்க" என்ற குரல் கேட்டு  ”ஞாயிற்றுக்கிழமை தானே இன்னிக்கு! காலையிலேயே எழுப்பறியே!” என்று கேட்டபடியே எழுந்தேன். 

“அட காமிரா, மைக் எல்லாம் எடுத்துட்டு ஒரு கும்பல் நம்மளத் தேடியா? தப்பா எதுவும் பண்ணலையே” என்று எண்ணியபடியே வெளியே வந்தேன்.  மத்திய அரசில் அமைச்சராக இருக்கும் அரசியல்வாதி வெளியே வரும்போது தள்ளுமுள்ளு பண்ணி ஒரே சமயத்தில் பல நிருபர்கள் மைக்கை நீட்டி கேள்வி கேட்பது போல, என்னிடம் கேள்வி கேட்க முட்டி மோதினார்கள் நிருபர்கள்.  என்ன விஷயம் என்றே புரியாமல் முழித்தேன். 

நான் பேய் முழி முழிப்பதைப் பார்த்த ஒரு நிருபர், “என்ன சார் அடுத்தடுத்த நாள்ல இரண்டு பெரிய விருது வாங்கிட்டு, இப்படி அடக்கமா ஒண்ணும் தெரியாத மாதிரி முழிக்கிறீங்களே!  நாங்க ஒண்ணும் பார்ட்டி வையுங்க என்றெல்லாம் கேட்க மாட்டோம்! தைரியமா வெளியே வாங்க!” என்றார்.  விருதா? எனக்கா?  என்ன விருது என்று இன்னமும் புரியாமல் கேட்டேன்.

மேலே உள்ள சுட்டி வழி முழு பதிவையும் படி(பார்)க்கலாமே - இது வரை நீங்கள் படி(பார்)த்திருக்காவிட்டால்!  

******

இந்த வாரத்தின் தகவல்  : Suri பழங்குடி

சமீபத்தில் வித்தியாசமான தலை அலங்காரத்துடன் இருந்த ஒரு பழங்குடிப் பெண்ணின் நிழற்படத்தினை காண நேர்ந்தது.  வித்தியாசமான அவரது தலை அலங்காரம் மற்றும் முகத்தில் போட்டிருந்த அலங்காரம் அவர்களைப் பற்றிய மேலதிகாரத் தகவல்களை தேடித் தெரிந்து கொள்ளத் தூண்டியது.  எதியோப்பியாவில் இருக்கும் Suri என்று அழைக்கப்படும் பழங்குடி மக்கள் குறித்த தகவல்களைத் தேடியதில் தெரிந்து கொள்ள முடிந்தது.  ஒரு கட்டுரை சிறப்பானதாக இருந்தது.  அந்தக் கட்டுரை நீங்களும் படிக்க விரும்பினால் இங்கே படிக்கலாம்.  Atlas of Humanity எனும் இந்தத் தளத்தில் நிறைய தகவல்கள் இருக்கின்றன.  முடிந்தால் தளத்திற்குச் சென்று பாருங்களேன்.  

******

இந்த வாரத்தின் ரசித்த பகிர்வு :  சந்தோஷம்

சந்தோஷம் என்றால் என்ன என்பதை ஓவியமாகத் தீட்டச் சொன்னார்களாம் ஒருவரிடம்…  அவர் தீட்டிய ஓவியம் தான் மேலே இருப்பது.  இது குறித்த ஆங்கிலத்திலிருந்த ஒரு பகிர்வு கீழே! படித்துப் பாருங்களேன் - உங்களுக்கும் பிடிக்கலாம்!

What is happiness?

A famous Turkish poet once asked his painter friend to capture happiness on canvas.

The painter chose an unexpected scene: a family sleeping peacefully on a creaking bed. One leg of the bed was broken, supported by two bricks. The roof of their modest home leaked. Even the family dog slept calmly beside them.

That painting became immortal because it revealed a powerful truth: happiness is not the absence of problems. It is the ability to rest your heart even when life is imperfect. It is acceptance, gratitude, and inner peace amid uncertainty.

Happiness is being grateful, finding comfort in what you have, seeing light despite cracks, and letting go of sorrow over things beyond your control.

Whenever your heart feels heavy, remember this painting.

Be content,

Be grateful,

sleep peacefully & stay blessed forever .. ☮️☮️

******

இந்த வாரத்தின் வாசிப்பு - தரிசனம் :

திருவரங்கத்தின் நண்பர் ரிஷபன் அவர்கள் தற்போது முகநூலில் தரிசனம் எனும் தலைப்பில் தொடர்ந்து கதைகளை எழுதி வருகிறார்.  ஒவ்வொன்றும் ஒரு முத்து!  அவருடைய எழுத்து குறித்து சொல்லவா வேண்டும்? மிகச் சிறப்பான எழுத்துக்குச் சொந்தக்காரர்.  விரைவில் அச்சுப் புத்தகமாக வரும் என்ற காத்திருப்பில் நானும்…  முகநூலில் இருந்தால் படித்துப் பாருங்களேன்.

******

இந்த வாரத்தின் ரசித்த கவிதை - காதல் :

ஓவியமும் கவிதையும் - முகநூலில் நண்பர் விஜயகுமார் வேல்முருகன் அவர்களது பக்கத்தில் பார்த்த ஒரு ஓவியமும் அதற்கான அவரது கவிதையும்.  நீங்களும் படித்து ரசிக்க இங்கே!  ஓவியம் பார்த்ததும் உங்களுக்குத் தோன்றிய கவிதை ஏதேனும் இருந்தால் பகிர்ந்து கொள்ளுங்களேன்!

காதல்:

மின்னலென நீ பூத்த புன்னகையில்

சுடரும் ஒளியிழந்து போனது..

பேசாத உன் இதழ்கள்

கதைகள் பல பேசியது..

ஓர விழிப் பார்வைகளோ

நேராய் எனைத் தாக்கியது..

வளைக்கரங்கள் தழுவிய மரமாக

நானாகிடக் கூடாதா- 

மனம் விம்மி விம்மியே ஏங்கியது..

புன்னகை சூடிய முகமதிலே

பொன்னகையும் களையிழந்தது..

சிறு வெட்கம் நீ கொள்ள

பக்கம் பக்கமாய் கவி தோன்றியது..

சாளரத்து மரம் கூட உயிராகிடுமோ

உன் எழில் காண..

அத்தனை ஆவல் கொண்டேனே

என்னவளே உன் மீதே..

  

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கம்

14 ஃபிப்ரவரி 2026