காஃபி வித் கிட்டு - 197 - ஃபெவிக்விக் - முட்டாளாக இரு - 28 ரூபாய் கேமரா - சுண்டல் - உன்னை அல்லால் - கன்கல்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட சாரநாத் - சில தகவல்கள் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் ரசித்த விளம்பரம் : ஃபெவிக்விக்…

ஒரு சில விளம்பரங்கள் மனதைத் தொடும் விதத்தில் இருக்கும் என்றால், சில விளம்பரங்கள் ரசிக்கும் விதமாக, அதிலும் விளம்பரத்தில் நடிக்கும் கதாபாத்திரங்களின் நடிப்பினால் ரசிக்கும் விதத்தில் இருக்கும். இந்த ஃபெவிக்விக் விளம்பரம் அப்படி ஒன்று.  இதில் கபாடிவாலியாக வரும் மூதாட்டி நடிப்பில் அசத்துகிறார்! பாருங்களேன்.

மேலே இருக்கும் காணொளியை பார்ப்பதில் சிரமம் இருந்தால் இந்தச் சுட்டி வழியாகவும் பார்க்கலாம்!

******

இந்த வாரத்தின் ரசித்த துணுக்கு : முட்டாளாக இரு…

இந்த வாரத்தில் படித்து ரசித்த ஒரு நீதிக்கதை - உங்கள் ரசனைக்காக!

மூன்று நபர்களுக்கு மரண தண்டனை நிர்ணயிக்கப்பட்டது. மூவரும் தூக்கு மேடைக்கு வரவழைக்கப்பட்டனர். முதலாமவர் மதத் தலைவர், இரண்டாமவர் வழக்கறிஞர், மூன்றாமவர் இயற்பியலாளர்.

முதலில் மதத்தலைவர் கழுத்தில் கயிறு மாட்டப்பட்டது. 'கடைசியாக ஏதாவது சொல்ல விரும்புகிறீர்களா? என் வினவப்பட்டது.  ஆண்டவன்! ஆண்டவன்! ஆண்டவன் அவனே என்னை காப்பாற்றுவான் என்றார். மேடை இழுக்கப்பட்டது, மதத்தலைவரின் கழுத்தை நெருங்கிய போது சட்டென்று கயிறு நின்றுவிட்டது. மக்கள் அதிசயத்தோடு பார்த்தனர். அவரை விட்டுவிடுங்கள்! ”ஆண்டவன் அவரை காப்பாற்றிவிட்டான்” என்றனர். மதத்தலைவர் தப்பிவிட்டார்.

அடுத்ததாக வழக்கறிஞர் அழைத்துவரப்பட்டார். அவரிடமும் அதே கேள்வி - அதற்கு அவர், 'நீதி! நீதி! நீதியே வெல்லும்' என்றார்.  மேடை இழுக்கப்பட்டது, வழக்கறிஞரின் கழுத்தை நெருங்கிய போது சட்டென்று கயிறு நின்றுவிட்டது. மக்கள் அதிசயத்தோடு பார்த்தனர். அவரை விட்டுவிடுங்கள்! நீதி அவரை காப்பாற்றிவிட்டது. என்றனர்.  வழக்கறிஞரும் தப்பிவிட்டார்.

அடுத்ததாக இயற்பியலாளர் அழைத்துவரப்பட்டார். அவர் கழுத்தில் கயிறு மாட்டப்பட்டது. 'கடைசியாக ஏதாவது சொல்ல விரும்புகிறீர்களா? என வினவப்பட்டது. அதற்கு அவர், “எனக்கு ஆண்டவன் பற்றியும் தெரியாது, நீதி பற்றியும் தெரியாது. ஆனால் அங்கே தூக்கு மேடை கயிற்றில் ஒரு முடிச்சு இருக்கிறது. அதனால்தான் கயிறு கழுத்தை பதம் பார்க்கவில்லை என்பது எனக்குத் தெரியும்' என்றார்.  உடனே தூக்குமேடையை பரிசீலித்தனர். அங்கே கோளாறு இருந்தது. அதனை சரி செய்தனர். பின்னர் இயற்பியலாளர் தூக்கில் ஏற்றப்பட்டு தலையும் துண்டிக்கப்பட்டது. 

நீதி:-  👉 சில சந்தர்ப்பங்களில் வாய் மூடி இருக்க பழகிக்கொள்! தெரிந்த உண்மைகளையெல்லாம் உளறி கொட்டுவதால் அது உன் கழுத்துக்கே ஆபத்தாகலாம்! சிலவேளை முட்டாளாக இருப்பதுதான்

புத்திசாலித்தனமானது! ✨

******

பழைய நினைப்புடா பேராண்டி : 28 ரூபாய்க்கு காமெரா....

2013-ஆம் ஆண்டு இதே நாளில் வெளியிட்ட பதிவு - 28 ரூபாய்க்கு காமெரா.... - அந்தப் பதிவிலிருந்து சில வரிகள் இங்கே.  

தலைப்பு பார்த்து ஓடோடி வந்தீங்களா?  ஆமாங்க 28 ரூபாய்க்கும் 29 ரூபாய்க்கும் புகைப்படக் கருவி கிடைச்சதுங்க! இப்ப இல்லை....  ஐம்பது அல்லது 60 வருடங்களுக்கு முன்னர் கிடைச்சதுங்க! 

சில மாதங்களுக்கு முன்னர் விளம்பரங்கள் அன்றும் இன்றும் என்ற தலைப்பிலும், மூக்குத்தூள் - தொடரும் அன்றைய விளம்பரங்கள்.... எனும் தலைப்பிலும்  வெளியிட்ட சில விளம்பரங்களின் தொடர்ச்சியாக இந்த பகுதியில் 1957-ஆம் ஆண்டின் கல்கி தீபாவளி மலரில் வெளிவந்த சில விளம்பரங்கள் பொக்கிஷப் பகிர்வாக.....

மேலே உள்ள சுட்டி வழி முழு பதிவையும் படித்து ரசிக்கலாமே - இது வரை நீங்கள் படித்திருக்காவிட்டால்!

******

இந்த வாரத்தின் அறிமுகம் : சுண்டல்

முகநூலில் நானும் இருக்கிறேன் என்ற பெயர் பண்ணிக்கொண்டு இருக்கிறேன். எப்போதேனும் சில பதிவுகள் படிப்பதுண்டு. மத்யமர் குழுவில் அப்படி ஒருவரின் பதிவு சமீபத்தில் படிக்கக் கிடைத்தது.  ஸ்ரீனிவாசன் கோபாலகிருஷ்ணன் என்று ஒருவர் அட்டகாசமாக எழுதுகிறார்.  அவரது இற்றைகளுக்கு அவரே படமும் வரைந்து சேர்க்கிறார்.  அப்படி படித்த ஒரு இற்றை கீழே, அவரது கைவண்ணத்தில் உருவான ஓவியத்துடன்!

கொள்ளிடம் கருப்பு கடலை சுண்டல்: 

ஐம்பது அறுபதுகளில் தமிழ்நாடு ரயில் நிலையங்கள் பல அதன் தின்பண்டங்களுக்காக பிரசித்தி பெற்றதாக இருந்தன. உதாரணமாக மணப்பாறை  முறுக்கு, பேரளம் மசால் வடை. இந்த பட்டியலில் கொள்ளிடம் சுண்டலுக்கு தனி இடம் இருந்தது.  வெட்டிவேர் வெள்ளரி பிஞ்சு கூடுதல் பொருட்கள். காவேரியின் பிரிவான கொள்ளிடம் ஆற்று கரையில் அமைந்துள்ள இந்த சின்ன ரயில்வே ஸ்டேஷனில் எக்ஸ்பிரஸ் ரயில் உட்பட எல்லா ரயில் வண்டிகளும் நிற்கும்.

கொள்ளிடம் பாலம்  சிதம்பரம் சீர்காழி மார்க்கத்தின் இணைப்பு. இன்று பழைய பாலத்தின் அழகு போய் புதிய பாலம் வந்து விட்டது. தெற்கிலிருந்து வரும் ரயில்கள் இந்த ஸ்டேஷனில் நின்று விட்டு தான் பாலத்தை தாண்டும். மூச்சு இறைக்க வந்த  ஸ்டீம் என்ஜின் தன் தாகத்தை காவேரி நீரால் தணிக்க ஒரு இருபது நிமிடம் இங்கே நிற்கும். பயணிகள் ஏறுவதோ இறங்குவதோ அரிது. அப்போது கார்ட் பெட்டியின் அருகே குள்ளமான உருவம் ஒன்று பெரிய அலுமினியம் தாம்பாளத்தை உயர்த்தி பிடித்தவாறு ஃப்ளாட் பார்மில் என்ஜின் திசையில் புறப்படும்.

அவர் தான் சுப்புடு ஐயர் ( கற்பனை பெயர்). மந்தார இலையில் கட்டப்பட்ட அருமையான கருப்பு கடலை சுண்டல் பொட்டலங்கள் சுமார் எழுபத்தைந்து அதில் இருக்கும். கடுகு தாளித்து தேங்காய் பற்கள் போட்டு செய்யப்பட்ட அது அவர் நடந்து வரும் போதே கமகம என்று வாசனை அடிக்கும். ஃப்ளாட் பார்ம் மிக தாழ்வாகவும் இவர் குள்ளமாக இருந்ததாலும் தட்டை உயர பிடித்தவாறு ஒவ்வொரு கம்பார்ட்மென்ட் முன்னே நிற்பார். ஒரு அணா ஒரு பொட்டலம். அநேகமாக எல்லா பயணிகளும் இதை வாங்குவார்கள். தேவையான பொட்டலங்களை எடுத்து கொண்டு சில்லறையை தட்டில் போட்டு விடுவார்கள். மீதம் சில்லறை வரவேண்டியிருந்தால் தட்டிலிருந்து எடுத்து கொள்வார்கள். இதில் யாரும் ஏமாற்ற மாட்டார்கள் என்ற நம்பிக்கை. 

இது போல் அவர் ஏழெட்டு பெட்டிகள் முன் நின்று விட்டு என்ஜின் பக்கம் போகும்போது இருப்பது நிமிடங்கள் ஆகிவிடும்.என்ஜின் குழுவிற்கு ஐந்து பொட்டலமும் கார்டுக்கு இரண்டு பொட்டலமும் இலவசம். பெரும்பாலும் எல்லா சுண்டலும் விற்று போய்விடும். அதன் பிறகு தான் பச்சை கொடி காட்டப்பட்டு என்ஜினும் விசிலடித்து ரயில் புறப்படும். ஒரு நாளில் பகலில் எட்டு வண்டிகள் வந்து போகும். அத்தனைக்கும் இந்த சுண்டல் சேவை உண்டு. இந்த வருவாயில் படித்து பெரிய அரசாங்க வேலையில் இருந்த பிள்ளைகள் அழைத்தும் தனக்கு வாழ்வளித்த தொழிலை கடைசிவரை  விடாமல் இருந்தார் சப்புடு அவர்கள். 

அந்த காலம் ஓய்ந்து விட்டாலும் நினைவு மட்டும் ஓயவில்லை.

******

இந்த வாரத்தின் ரசித்த பாடல் :  உன்னை அல்லால்…

சமீபத்தில் கேட்டு ரசித்த ஒரு பாடல் - இராமானுஜர் என்கிற திரைப்படத்திற்காக இளையராஜா அவர்களின் இசையில், குரலில் வெளிவந்திருப்பதாகத் தெரிகிறது.  எனக்கு பிடித்திருந்தது. உங்களுக்கும் பிடித்திருக்கலாம் - கீழே உள்ள சுட்டி வழி யூட்யூபில் கேட்டுப் பாருங்களேன்…

Sri ramanujar movie song || unnai alaal enge selvean.. #sriramanujar #ilaiyaraja #vaali #newsong (youtube.com)

******

இந்த வாரத்தின் தகவல் :  கன்கல் (Kankhal), ஹரித்வார்

ஹரித்வார் பலரும் அறிந்த இடம் தான். ஆனால் ஹரித்வார் நகரின் அருகிலேயே கன்கல் என்று ஒரு இடம் உண்டு. அங்கே தான் சிவபெருமானின் மாமனாரும், சதி (பார்வதி) தேவியின் தந்தையுமான தக்ஷன் இருந்ததாக இந்த ஊர் குறித்த தகவல்கள் சொல்கின்றன.  இப்போதும் வட இந்தியாவில் இந்த ஊர் ”ஷிவ்ஜி கீ சசுரால் (சசுரால் - மாமனார் வீடு)” என்று வழங்கப்படுகிறது.  இங்கே தக்ஷ மஹாதேவ் மந்திர் என்கிற கோயிலும் உண்டு.  அது தவிர பதீசா என்று இங்கே சொல்லப்படும் சோன்பாப்டி மிகவும் பிரபலம்.  அடுத்த முறை ஹரித்வார் செல்லும் வாய்ப்பு கிடைத்தால் கங்கல் சென்று வரவேண்டும் என்பதோடு பதீசாவும் உண்டு வரவேண்டும் என்று நினைத்திருக்கிறேன்!  🙂ஏதோ நம்மால் முடிந்தது!

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

10 ஆகஸ்ட் 2024