கதம்பம் - கத்தி மாதிரி மூக்கு - மனது - இற்றைகள் - திரைப்படங்கள் - கேரக்டர்

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட காசியில் ஜோதிர்லிங்க கோவில்கள் பதிவை படித்து கருத்துகள் தெரிவித்த அனைத்து வலையுலக நண்பர்களுக்கு மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

கத்தி மாதிரி மூக்கு - 12 ஜூலை 2024:

இங்க சரியா இருக்கான்னு பார்த்து சொல்லுங்க!

ஐயா! இன்னும் கொஞ்சம் மேல இருக்கலாம்னு தோணுது! என்னோடதப் பாருங்களேன்!

அம்மாடி! நீ நல்ல நீளமா ஷார்ப்பா க*த்*தி மாதிரி மூக்கு வெச்சிருக்க...🙂  மேல போட்டிருக்க..:)) (என்னவர் தான்  'ரன்வே மூக்கு' என்று எப்போதும் சொல்வார் என்றால்....:)) இங்கு!! என் நேரம்...:)) அசடு வழிந்தேன்!)

இங்கப் பாரு பாப்பாவுக்கு இருக்கறது இத்துனூன்டு மூக்கு! எப்படி இதில இன்னும் மேல போடறது! 

சரிங்க! நீங்க புள்ளி வெச்ச இடத்திலயே குத்திக்கலாம்!

கீச் கீச் என்று காலணியால் சப்தம் உண்டாக்கிக் கொண்டு அங்கு வலம் கொண்டிருந்த குழந்தை ஒன்றைக் கண்டதும் 'இங்கேர்ந்து ஓடிடு! எங்கம்மா உனக்கும் காது குத்தி விட்டுடுவா! என்று அதுவரை என்னை கலாட்டா செய்து கொண்டு சிரித்துக் கொண்டிருந்த மகள் பாவம் வலியில் துடித்துப் போய்விட்டாள்!

அவளுக்கு முன்பு தான் கல்லூரியில் படித்துக் கொண்டிருக்கும் ஒரு பெண்ணிற்கும் மூக்கு குத்தப்பட்டது! இப்போதைய ட்ரெண்டிங்காம்! குச்சி போன்று ஒரு மூக்குத்தி போட்டுக் கொண்டாள்! 

மகளை சமாதானம் செய்து அழைத்து வந்தேன். அவளுடன் அந்த நேரத்தில் உடனிருக்கும் வாய்ப்புக் கிடைத்ததை எண்ணி மகிழ்கிறேன்! 

எங்கிட்ட ஏன் பேச மாட்டேன்னு சொல்றடா செல்லம்! அப்பாகிட்ட உனக்கு என்ன கோபம்! அம்மா தான உன்ன கூட்டிண்டு போய் இப்படி பண்ணினா!!

நல்லா இருக்கில்ல....:))

*******

மனது - 20 ஜூலை 2024:

இதற்குள் தான் எத்தனை எண்ணங்களும்! போராட்டங்களும்! தயக்கங்களும்! ஒவ்வொரு செயலுக்குப் பின்னேயும் எத்தனை எத்தனை காட்சிகளை திரைப்படம் போல ஓட்டிப் பார்க்கிறது! நினைத்த போதினில் எங்கேயோ எப்போதோ நிகழ்ந்த காட்சிகள் எல்லாம் நம் கண்முன்னே! ஆனால்! அவற்றை எல்லாம் மறக்க நினைத்தால் முடிகிறதா!!!?? ம்ம்ம்ஹூம்!!

*******

இற்றைகள் - 20 ஜூலை 2024:

வாரநாட்களில் தொடர்ந்து வகுப்புகளும், டெஸ்ட்டுகளும், ஹோம்வொர்க் எனச் செல்வதும், வார இறுதிக்களில் வீட்டை சுத்தப்படுத்துவதும், அரைக்க வேண்டிய மாவு, பொடிவகைகள் என செய்து கொள்வதும், புடவைக்கு ஓரமடித்தல், மகளின் உடையை ஆல்ட்டர் செய்தல் என தைக்க வேண்டியவைகளை செய்வதும் எனச் செல்கிறது!

பள்ளி கல்லூரி நாட்களில் பரீட்சையில் எடுத்திருக்கும் மார்க்கை பற்றி உற்சாகத்துடன் அப்பாவிடம் ஓடி வந்து சொல்வேன்! ஓ! அப்படியா! என்றில்லாமல் அப்பாவும் அதை மனதார பாராட்டி வீட்டுக்கு வருபவர்களிடம் எல்லாம் பெருமையாகச் சொல்லிக் கொண்டிருப்பார்! அப்படியொரு அப்பா எனக்கு கிடைத்தது வரம்! வருடங்கள் பல ஆனாலும் தான் என்ன! வகுப்பில் மகள் முழு மதிப்பெண்களை எடுத்துக் கொண்டிருக்கும் இப்போதும் அப்பா இருந்திருந்தால் அப்படித்தான் இருப்பார் என நினைத்துக் கொண்டேன்!

*******

திரைப்படங்கள் - 20 ஜூலை 2024:

சில நாட்களாக மதிய நேரத்தில் 80களில் 90களில் வெளிவந்த திரைப்படங்களை தேர்ந்தெடுத்து பார்த்து வருகிறேன். பொதுவாக படம் பார்க்கும் பழக்கம் என்பது பெரிதாக என்னிடம் இல்லையென்றாலும் இப்போது என்னமோ அப்படி ஒரு எண்ணம் உருவாகியிருக்கிறது! வாசிப்பை வகுப்போடு முடித்துக் கொண்டு விடுகிறேன்…:)

கதையும், கதையில் வரும் கதாப்பாத்திரங்களும் பார்ப்பவர்களின் மனதில் ஒரு தாக்கத்தை ஏற்படுத்தும் வகையில் இருக்க வேண்டும்! ஒவ்வொரு முறை பார்க்கும் போதும் அப்போதைய நம் எண்ணங்களும் மாறுபடும்! இதனால் தான் காட்சியை இப்படி அமைத்திருப்பார்களோ! என்று நம்மை சிந்திக்க வைக்கும்!

*******

கேரக்டர் - 20 ஜூலை 2024:

கோயில் மணி ஓசை தன்னை கேட்டதாரோ! இங்கு வந்ததாரோ!

பாஞ்சாலி! பாஞ்சாலி!

பரஞ்சோதி! பரஞ்சோதி!

வார இறுதிக்களில் சூரியன் FM 93.5ல் Retro weekend கேட்பது வழக்கம்! மகளுக்கு இன்று கல்லூரி உண்டு என்பதால் சமைத்துக் கொண்டே இனிமையான பாடல்களை கேட்டுக் கொண்டிருந்தேன்!

பரஞ்சோதி! பரஞ்சோதின்னு ஷூக: (கிளி) சொல்றதுடா கண்ணு! இந்த படத்தில ஹீரோவோட பேர்! நான் நேத்து பார்த்தேன்னு சொன்னேனே கல்கி! பாலச்சந்தர் சார் படம்! அதில வர்ற ஹீரோ ரகுமான் பேர் கூட பரஞ்சோதி தான்! என்று மகளிடம் சொன்னதும்….!

அம்மா! நான் கொஞ்ச நாள் முன்னாடி படிச்சேனே சிவகாமியின்  சபதம்! அதுல வர்ற முக்கியமான கேரக்டர் பேர் பரஞ்சோதி தான்! எனக்கு அதான் ஞாபகம் வர்றது! என்றாள்!

ஆமாண்டா கண்ணு! படத்துல அந்த ஹீரோயின் ஹீரோ கிட்ட உங்க பேர் ரொம்ப அழகா இருக்கு! அமரர் கல்கி எழுதின கதைல வர்ற கதாப்பாத்திரம்! அப்படின்னு சொல்லுவாங்க.

*******

இன்றைய கதம்பம் பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்