தினம் தினம் தில்லி - National Gallery of Modern Art

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட அழகிய படங்களும் சில வரிகளும் - பகுதி ஐந்து பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

தினம் தினம் தில்லி வரிசையில் பதிவுகள் எழுதி கிட்டத்தட்ட ஐந்து மாதங்கள் ஆகிவிட்டன. நடுவில் பதிவுகளே எழுதாமல் விட்டதும் நடந்ததே. இந்த வரிசையில் கடைசியாக எழுதியது தினம் தினம் தில்லி - பிரதான் மந்த்ரி சங்க்ரஹாலய் என்கிற பதிவு! இன்றைக்கு தினம் தினம் தில்லி வரிசையில் மீண்டும் ஒரு பதிவினை எழுதி இருக்கிறேன் - படிக்க நீங்களும் தயார் தானே! 

NGMA தளத்திலிருந்து...

தலைநகர் தில்லியின் மிகவும் பிரதானமான வரலாற்றுச் சின்னங்களில் ஒன்றாகவும், பிரபல சுற்றுலா தலமாகவும் இருப்பது இண்டியா கேட் என அழைக்கப்படும் இடம்.  அந்த இண்டியா கேட் அருகிலேயே பெரிதாக ஒரு கட்டிடம் இருக்கிறது - வெளியிலிருந்து பார்க்கும் போது ஏதோ அரண்மனை போன்ற தோற்றமளிக்கும் (ஒரு விதத்தில் அரண்மனையே தான்! தகவல் வரும் பத்திகளில் சொல்கிறேன்) - கண்ணாடியால் ஆன ஒரு மரம் ஒன்றும் கண்களைக் கவரும் விதத்தில் அந்தக் கட்டிடத்தின் வெளியே அமைந்திருக்கும்.  இண்டியா கேட் பகுதிக்கு வரும்போது, ஒருவழிப் பாதையான அந்த பாதையில் சுற்றி வரும்போது நிச்சயம் நீங்களும் கவனித்து இருக்கலாம்! அந்தக் கட்டிடத்தினுள்ளே அமைந்திருப்பது தான் National Gallery of Modern Art! 

நேஷனல் கேலரி ஆஃப் மாடர்ன் ஆர்ட் நவீன மற்றும் சமகால இந்திய கலைக்கான இந்தியாவின் முதன்மையான கலை நிறுவனமாகும். இந்த அருங்காட்சியகம் 1954 ஆம் ஆண்டு, நவீன இந்திய கலையை மேம்படுத்தும் விதமாகவும் பாதுகாக்கும் நோக்கத்துடனும் நிறுவப்பட்டது. 18 ஆம் நூற்றாண்டின் நடுப்பகுதியிலிருந்து இன்று வரை இந்தியா கலையின் பாதையில் செய்த பயணத்தினை விவரிக்கும் விதமாக பலவித சாட்சிகளை உள்ளடக்கியதாக அமைந்திருக்கிறது.  NGMA என்று சுருக்கமாக அழைக்கப்படும் இந்த அருங்காட்சியகம் எட்டு ஏக்கர் பரப்பளவில் அமைந்துள்ளது. ஜெய்ப்பூர் மகாராஜாவின் முன்னாள் அரண்மனையான ஜெய்ப்பூர் மாளிகையில் தான் இந்த அருங்காட்சியகம் செயல்பட்டுக் கொண்டிருக்கிறது. பாரம்பரியக் கட்டமைப்பு, அரண்மனைச் சூழல், காட்சிக்கு வைக்கப்பட்டுள்ள தலைசிறந்த படைப்புகளுக்கு பொருத்தமான பின்னணியை வழங்குகிறது. அது மட்டுமல்லாது வெளிப்புறத்திலும் பரந்து விரிந்திருக்கும் பசுமையான புல்வெளிகள் மற்றும் முற்றங்கள் சிற்பங்கள் நிறைந்த தோட்டமாக காட்சியளிக்கிறது. 2009 இல் கட்டப்பட்ட புதிய பிரிவு புதிய கேலரி தளங்கள், கலைப்பொருட்களுக்கான விற்பனை நிலையம், ஆடிட்டோரியம், ப்ரிவியூ தியேட்டர் மற்றும் நூலகத்துடன் அமைந்துள்ளது.

திங்கள் கிழமை மற்றும் தேசிய விடுமுறை தினங்கள் தவிர்த்து மற்ற எல்லா நாட்களிலும் காலை பத்து மணி முதல் மாலை ஆறு மணி வரை இந்த அருங்காட்சியகம் திறந்திருக்கும். உள்ளே செல்ல நுழைவுக்கட்டணமும் உண்டு - இந்தியர்களுக்கு 20 ரூபாய், வெளிநாட்டவர்களுக்கு 500 ரூபாய்! (இந்த வேறுபாடு எல்லா இடங்களிலும் இருக்கிறது - இது குறித்து முன்னரும் சில பதிவுகளில் பேசி இருக்கிறோம்).  கண்டிப்பாக படங்கள், காணொளிகள் எடுக்க அனுமதி இல்லை!  நுழைவுச் சீட்டு வாங்கிக் கொண்டு உள்ளே பாதுகாப்பு சோதனைகளைச் செய்யும் இடத்திலேயே பெரியதாக எழுதி வைத்திருக்கிறார்கள் - “ரீல்ஸ் எடுப்பது தடை செய்யப்பட்ட பகுதி!” என்று!  ரீல்ஸ் எடுக்கும் நபர்களிடம் நிறையவே பாதிக்கப்பட்டு இருப்பார்கள் போல! அலைபேசிகளை நாம் உள்ளே எடுத்துச் செல்ல அனுமதிக்கப்பட்டாலும் கேமரா எடுத்துச் செல்ல அனுமதி இல்லை! அலைபேசிகள் வழியும் படங்கள் எடுக்க அனுமதி இல்லை! (சிலர் அப்படியும் எடுக்கிறார்கள் என்றாலும் நாங்கள் எடுக்கவில்லை!) அற்புதமான ஓவியங்கள், சிற்பங்கள், கலைப் பொருட்கள் என மூன்று நான்கு தளங்களில் இங்கே கண்காட்சியாக வைத்திருக்கிறார்கள். அங்கே இருக்கும் ஓவியங்களை ஓவியர் எந்த அர்த்தத்துடன் வரைந்திருக்கிறார் என்பது நமக்கு புரிகிறதோ இல்லையோ, பல எண்ண ஓட்டங்களை நமக்குள்ளும் விதைத்துச் செல்லும் என்பதில் சந்தேகமில்லை.  

NGMA தளத்திலிருந்து...

NGMA தளத்திலிருந்து...

NGMA தளத்திலிருந்து...

NGMA தளத்திலிருந்து...

NGMA தளத்திலிருந்து...

அவ்வப்போது ஓவிய, சிற்பக் கண்காட்சிகளும் இங்கே நடக்கிறது. நிரந்தரமாக சில ஓவியங்கள், சிற்பங்கள், கலைப்பொருட்கள் கண்காட்சிக்கான இடத்தில் வைக்கப்பட்டிருந்தாலும் அவ்வப்போது சில ஓவியர்கள், கலா நிபுணர்கள் தங்களது படைப்புகளை இங்கே காட்சிக்கு வைக்கிறார்கள்.  அங்கே இருந்த பல கலைப்படைப்புகள் மனதைக் கவரும் வண்ணம் இருந்தன.  அவற்றைக் குறித்து வார்த்தைகளால் விவரிப்பது கடினம்.  சின்னச் சின்ன, நுணுக்கமான ஓவியங்கள், பிரம்மாண்டமான ஓவியங்கள் என அங்கே இருக்கும் எல்லாவற்றையும் நின்று நிதானித்து பார்த்து வரலாம்.  ஓவியம், கலை, சிற்பம் போன்ற விஷயங்களில் ஆர்வம் இருப்பவர்கள் இங்கே வந்து நீண்ட நேரம் செலவழிக்க, அவர்களுக்கும் பலப் பல புதிய சிந்தனைகள், கற்பனைகள் தோன்றும் என்பதில் சந்தேகமே இல்லை.  ஒரு சில ஓவியங்களை பார்த்தபோது, அந்த ஓவியரின் கலைப் பார்வையும் சிந்தனையும் பிரமிக்க வைக்கும் விதத்தில் இருந்தது.  என்னதான் படங்கள் எடுக்க அனுமதி இல்லை என்றாலும், அடடா படம் எடுக்க முடியவில்லையே என்ற எண்ணமும் தோன்றியது. சில ஓவியங்களின் படங்கள், அருங்காட்சியகத்தின் இணைய தளத்திலிருந்து எடுத்து இங்கே பகிர்ந்து கொண்டிருக்கிறேன். மேலும் பார்க்க விரும்பினால் அவர்களது இணையதளத்திலும் பார்க்கலாம். 

அருங்காட்சியகத்தின் உள்ளே படம் எடுக்கவில்லை என்றாலும் வெளியே இருந்த சில கலைப்பொருட்களை படம் எடுத்தோம். அவற்றில் சில படங்களை இங்கே பகிர்ந்து இருக்கிறேன். இன்னும் இருக்கும் படங்கள் ஏதேனும் ஒரு ஞாயிறு அன்று நிழற்பட உலாவாக வெளியிடுகிறேன். தலைநகர் தில்லி வரும் வாய்ப்பு இருப்பவர்கள், முடிந்தால் நேரமெடுத்து இந்த National Galery of Modern Art சென்று அங்கே இருக்கும் ஓவியங்கள், படைப்புகளை பார்த்து ரசிக்கலாம்.  வேறு ஒரு பதிவில் தலைநகர் தில்லி குறித்து, வேறு ஒரு இடம் குறித்து பார்க்கலாம்! காத்திருங்கள்!

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

20 ஆகஸ்ட் 2024