முப்பத்தி நான்கு வருடங்கள்… - விஜி வெங்கடேஷ்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட நிழற்பட உலா - சரஸ் ஆஜீவிகா மேளா 2024 - பகுதி நான்கு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நமது பிறந்த நாள், முதன் முதலில் பள்ளிக்குச் செல்லும் நாள் (தேதி சரியாக நினைவில் இருக்காது என்றாலும்), திருமண நாள், அலுவலகத்தில் சேர்ந்து பணிபுரிய ஆரம்பித்த நாள் என சில நாட்களை நம்மால் மறக்கவே முடியாது. நான் முதன் முதலில் பணிக்குச் சேர்ந்த நாள் இன்றைக்கும் நினைவில் இருக்கிறது.  மும்பை நகரில், முப்பத்தி நான்கு வருடங்களுக்கு முன்னர், முதன் முதலாக பணிக்குச் சேர்ந்த நாளான இன்றைய நாளைக் குறித்த நினைவுகளை இந்த நாளில் திருமதி விஜி வெங்கடேஷ் அவர்கள் இங்கே பதிவாக வெளியிடுகிறார். அவரது அலுவலக அனுபவங்களையும் ஒவ்வொன்றாக எழுதித் தருகிறேன் என்று சொல்லியிருக்கிறார். அவையும் வரிசையாக இங்கே வெளிவர இருக்கிறது! - ஓவர் டு விஜி வெங்கடேஷ் - வெங்கட், புது தில்லி.

******

5 ஆகஸ்ட் 1990

வேலை வேண்டி Infab வாசல் மிதித்த நாள்:

வேலவனின் அருளால் வேலை கிடைத்த நாள்;

முப்பது வருட பயணத்தின் ஆரம்ப நாள்;

முடிவில்லா கல்வியின் முதல் நாள்;

கற்றது கைமண் எனினும் கற்பித்தது பெரும் கை;

வற்றாத மழையாக வளம் சேர் வாழ்க்கை;

பெற்றும் கற்றும் கழிந்தது வாழ்நாள்;

கழித்த பொழுதெல்லாம்  பொன்னாள்;

சிறு சிறு நினைவுகள் சிரிப்பூட்டும்;

சில சில நினைவுகள் சிலிர்ப்பூட்டும்;

தோழிகள் நினைவுகள் களிப்பூட்டும்;

வாழி நீ என வாழ்த்த வைக்கும்;

மலரும் நினைவுகள் தொடர்ந்து வரும்;

தொடரும் கனவுகள் மகிழ்ச்சி தரும்;

ஞாபகப் பெட்டகம் திறந்து விடும்;

நினைவு மணிகள் சிதறி விழும்;

அசை போடும் மனதில் அலைகள் எழும்;

அவை அனுபவ நுரைகளைக் கரை சேர்க்கும்;

கால் நனைத்து மகிழும் ஆழி(கடல்) அது;

வாழ்நாள் முழுவதும் போதாது;

🙏🏻🙏🏻🙏🏻

மீண்டும் வேறு ஒரு பதிவு வழி சந்திப்போம்…

நட்புடன்

விஜி வெங்கடேஷ்

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

5 ஆகஸ்ட் 2024