காஃபி வித் கிட்டு - 172 - கிரிக்கெட் வெறி - செம்மொழி விரைவு வண்டி - Eyes On the road - CHIMBORAZO DAY - அப்பா - மூப்பு - Pindaari Glacier

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட நாதுலா பாஸ் - சீன எல்லையில்…  பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் எண்ணங்கள் : கிரிக்கெட் வெறி

சில வருடங்களாகவே நான் கிரிக்கெட் பார்ப்பது மிகவும் அரிதாகி விட்டது. முன்பு கூட அத்தனை ஈடுபாடு இல்லை என்றாலும் கடந்த சில வருடங்களாக நடக்கும் கிரிக்கெட் போட்டிகளை பார்ப்பது மிகவும் அரிதாகி விட்டது.  போட்டித் தொடர் முடியும் சமயத்தில் இணையத்தில் அந்த போட்டிகளின் முடிவு பற்றி பார்ப்பதுண்டு - அது கூட, இணையத்தில் உலா வரும்போது பார்ப்பது தான்.  ஆனால் இன்னமும் இந்தப் போட்டிகள் மீதான ஆர்வம் பலருக்கும் குறையவே இல்லை.  சமீபத்தில் நடந்து முடிந்த IPL 2023 குறித்த ஒரு காணொளி - அதுவும் இறுதிப் போட்டியின் இறுதி பந்தில் சென்னை அணி வெற்றி பெற்ற சமயத்தில் எடுக்கப்பட்ட ஒரு காணொளி பார்க்க நேர்ந்தது! எத்தனை ஈடுபாடு இந்த இளைஞருக்கு கிரிக்கெட் மீது! ஈடுபாடு என்று சொல்வதை விட வெறி என்பது தான் சரியான சொல்லாக இருக்கும் என்று தோன்றுகிறது. அந்த காணொளி நீங்களும் பார்க்க வசதியாக இங்கே இணைத்திருக்கிறேன். 

******

பழைய நினைப்புடா பேராண்டி : செம்மொழி விரைவு வண்டி

2016-ஆம் ஆண்டு இதே நாளில் வெளியிட்ட பதிவு - ஃப்ரூட் சாலட் – 165 - அந்தப் பதிவிலிருந்து சில வரிகள் இங்கே.  

செம்மொழி விரைவு வண்டி – கோவையிலிருந்து மன்னார்குடி வரை செல்லும் ரயில் – இரவு 12.15 மணிக்கு கோவையிலிருந்து புறப்படுகிறது. இந்த நேரம் முன்பதிவு செய்யும் பலருக்கும் குழப்பத்தையும் தேவையில்லாத அவஸ்தைகளையும் தருகிறது.  கோவையிலிருந்து திருச்சி பயணிக்கும் போது ஓர் இரவு பார்த்த காட்சி – ஒரு கூட்டுக் குடும்பம் – 7 பேர் கொண்டது. தத்கால் மூலம் ஏழு பேருக்கும் முன்பதிவு செய்திருக்கிறார்கள்.

கைகளில் பயணச்சீட்டை வைத்துக் கொண்டு பேர் பட்டியலில் பார்த்தால் அவர்கள் யாருடைய பெயரும் இல்லை.  அவர்களுக்கு ஒதுக்கப்பட்ட இருக்கைகளில் வேறு யாருடைய பெயரோ இருக்கிறது.  மீண்டும் மீண்டும் சரிபார்த்து மேலே இருக்கும் தேதியைப் பார்த்தால் வித்தியாசம்.  தத்கால் டிக்கெட் ஒன்றின் கட்டணம் 315 ரூபாய்....  7 பேருக்கும் சேர்த்து ரூபாய் 2205/- நஷ்டம். 

இத்தனைக்கும் கோவையிலிருந்து தான் புறப்படுகிறது.  திருச்சியிலிருந்து வரும் வண்டி காலையிலேயே கோவைக்கு வந்து விடுகிறது என்பதால் அன்றைய இரவு 12.15க்கு புறப்படுவதற்கு பதிலாக கொஞ்சம் முன்னே நேரத்தை மாற்றினால் இந்தக் குழப்பங்களைத் தவிர்க்கலாம். வேறிடத்திலிருந்து வரும் ரயில் என்றால் இந்த மாற்றம் செய்யவியலாது. அங்கிருந்தே புறப்படுகிறது என்பதால் இந்த மாற்றம் செய்வதில் ரயில்வேக்கு எந்த சிரமமும் இல்லை.

முழு பதிவினையும் மேலே உள்ள சுட்டி வழி படிக்கலாமே!

******

இந்த வாரத்தின் ரசித்த விளம்பரம் : Eyes On the Road 

சாலைகளில் விபத்துகள் நடப்பதற்கு பிரதான காரணங்களில் ஒன்றாக இருப்பது அலைபேசி என்று சொன்னால் அதை நீங்களும் ஒப்புக்கொள்ளலாம்.  சுமார் எட்டு வருடங்களுக்கு முன்னரே ஒரு விளம்பரம் இது குறித்து வந்திருக்கிறது என்று சொன்னால் வியப்பாகவே இருக்கும் அல்லவா? ஆனால் எட்டு வருடங்களுக்குப் பிறகும் கூட இதே அலைபேசி பல விபத்துகளுக்குக் காரணமாக இருக்கிறது என்று சொன்னால் நம் மக்கள் இதன் விபரீதத்தினை இன்னும் உணர்ந்து கொள்ள வில்லை என்றே சொல்ல வேண்டும்.  பாருங்களேன். 

மேலே உள்ள காணொளி வழி பார்க்க இயலவில்லை என்றால் கீழே உள்ள சுட்டி வழி பார்க்கலாமே! 

[OFFICIAL] Volkswagen: Eyes On The Road - VW AD - YouTube

******

இந்த நாளின் தகவல் - CHIMBORAZO DAY :  

ஒவ்வொரு வருடமும் ஜூன் 3-ஆம் தேதியை CHIMBORAZO DAY என்ற பெயரில் கொண்டாடுகிறார்களாம்! அது என்ன வாயில் நுழையாத ஒரு பெயராக இருக்கிறதே என்று தோன்றுகிறதல்லவா?  பூமிப் பந்தின் உச்சப் புள்ளி இந்த CHIMBORAZO என்கிற மலை என்று சொல்கிறார்கள்.  இது ஒரு எரிமலை என்றாலும் தற்போது எரிமலையின் ஒரு பண்புகளும் இல்லை! ஆங்கிலத்தில் சொன்னால் Inactive! தற்போதும் இந்த மலைபகுதியில் நிறைய பேர் மலையேற்றம் செய்கிறார்களாம். எங்கே இருக்கிறது இந்த எரிமலை என்று கேட்டால், அதற்கு பதில் தென் அமெரிக்காவில் இருக்கும் ECUADOR என்ற நாட்டில் இருக்கிறது! இந்த இடம் பற்றியும், எதற்காக ஜூன் 3-ஆம் தேதி CHIMBORAZO DAY என்ற பெயரில் கொண்டாடப்படுகிறது போன்ற கூடுதல் தகவல்கள் வேண்டுமெனில் கீழே உள்ள சுட்டியில் படிக்கலாம். 

CHIMBORAZO DAY - June 3, 2023 - National Today

******

இந்த வாரத்தின் ரசித்த நிழற்படம் - அப்பா : 

ஒவ்வொரு வீட்டிலும் அம்மாக்கள் செய்யும் தியாகங்கள் குறித்து நிறையவே பேசப்பட்டாலும், அப்பாக்களின் தியாகம் குறித்து பொதுவாக அதிகம் பேசப்படுவதில்லை.  ஒவ்வொரு வீட்டிலும் இது நடப்பது தான்.  சமீபத்தில் பார்த்த ஒரு நிழற்படம் அப்பாக்கள் தங்களது குழந்தைகளின் முன்னேற்றத்திற்காக செய்யும் தியாகம் குறித்துச் சொன்னது.  பாருங்களேன்.  படம் மற்றும் எண்ணங்கள் குறித்த உங்கள் சிந்தனைகளை பகிர்ந்து கொள்ளலாமே! 

*****

இந்த வாரத்தின் ரசித்த கவிதை - மூப்பு : 

இந்த வாரத்தின் ரசித்த கவிதையாக ஆங்கிலத்தில் கவிதை ஒன்று.  மூப்பு குறித்த இந்தக் கவிதையும், அதற்காக பயன்படுத்தப்பட்ட மூதாட்டியின் படமும் நிச்சயம் உங்களுக்கும் பிடிக்கலாம். படித்துப் பாருங்களேன்.  ராமலக்ஷ்மி, எங்கள் பிளாக் ஸ்ரீராம், கீதா ரெங்கன், துரை செல்வராஜூ போன்ற நண்பர்கள் முடிந்தால் கவிதையை அழகிய தமிழில், மொழிமாற்றம் செய்யலாமே!

No one tells the oceans

or the trees

or the mountains that they're too old.

They talk of how powerful,

how grounded,

how awesome they are. 

Imagine if we thought the same way about ourselves as we got older.

Maybe we'd realise how spectacular we are.~

~    Becky Hemsley

******

இந்த வாரத்தின் பயணம் - Pபிண்டாரி க்ளேசியர் : 

உத்திராக்கண்ட் மாநிலத்தில் Pபிண்டாரி க்ளேசியர் (Pindari Glacier) என்று ஒரு மலைப்பகுதி உண்டு.  இங்கே Trekking செய்ய மலையேற்றப்பிரியர்கள் பலரும் செல்வது வழக்கம்.  சென்ற மாதத்தின் (மே 2023) முதல் வாரத்தில் நண்பர் Pப்ரேம் Bபிஷ்ட் அவர்கள் தனது நண்பர்களுடன் ஆறு நாள் பயணமாக இந்த மலையேற்றத்திற்கு சென்று வந்தார்.  என்னையும் அழைத்தார் என்றாலும் மூன்று நாட்களுக்கு மேல் விடுமுறை எடுக்க வேண்டும் என்பதால் இந்தப் பயணத்தினை தவிர்க்க வேண்டியிருந்தது. இந்தப் பயணத்தில் என்னையும் இணைத்துக் கொள்ள மனம் விரும்பினாலும், ஏற்கனவே தொடர்ந்து மூன்று மாதம் விடுமுறை எடுத்துவிட்டதால், இப்படி அடிக்கடி விடுமுறை எடுக்க இயலாது போனது.  ஆனால் நண்பர் Pப்ரேம் அவரது வேறு சில நண்பர்களுடன் இந்த மலையேற்றப் பயணத்திற்கு சென்று வந்தார்.  அவர் சென்று வந்த பின்னர் அவரது YOUTUBE பக்கத்தில் பயணம் குறித்த ஒரு காணொளியும் சேர்த்திருக்கிறார்.  உங்களுக்கு விருப்பம் இருந்தால் சற்றே பெரிய அந்த காணொளியை கீழே உள்ள சுட்டி வழி பார்க்கலாம். 

Pindari Glacier Trek May 2023 - YouTube

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….