கதம்பம் - சென்னை பயணம் - சில சிந்தனைகள் - தம்பதியர் தினம் - நிச்சயதார்த்தம் - ஆதி வெங்கட்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட கஞ்சன்ஜங்கா மலைச்சிகரம் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

சென்னை பயணம் - சில சிந்தனைகள் - 29 May 2023:

நான்கு நாட்கள் உறவுகளுடன் கூடி மகிழ்ந்து, இனிமையான கதைகளைப் பேசி நேரத்தை கடத்தி விட்டு இதோ இந்தத் தருணத்தில் கூட்டை நோக்கி ரயிலில் பயணித்துக் கொண்டிருக்கிறேன்!

ஒரு சுபநிகழ்வில் கலந்து கொண்டதால் அங்கு நிறைய உறவினர்களையும், குடும்ப நட்புகளையும் பார்க்க முடிந்ததில் மனதுக்கு நிறைவாக இருந்தது! 

நீங்க ரொம்ப அழகா எழுதறீங்க அக்கா! நான் தொடர்ந்து படிச்சுட்டு வரேன்!

புவனா! நீ அன்னைக்கு எழுதியிருந்தியே ஒரு கதை! அதுல கொஞ்சம் மாத்தியிருக்கலாமோன்னு நினைச்சேன்!

ஆமாண்டி புவனா! நானும் அப்படி தான் நினைச்சேன்!

டெல்லிக்கு போயிட்டு வந்தீங்க தான! உங்க அப்டேட்ஸ் எல்லாத்தையும் பார்க்கிறேனே!

நீங்க அவங்களோட அக்கா பொண்ணு தான? சின்ன பொண்ணா பார்த்தது! பாலிடெக்னிக்ல கூட படிச்சீங்களே! 

இப்படி கிடைத்த பாராட்டுகளும், கருத்துகளும் மனதிற்கான மகிழ்ச்சியைத் தந்தாலும் என்னை மேம்படுத்திக் கொள்ள வேண்டும் என்ற உத்வேகத்தையும் கொடுத்தது!

இப்படியான விழாக்களில் கலந்து கொள்ளும் போது ஒவ்வொருவரின் வாழ்க்கை முறை, பழக்க வழக்கங்கள், திட்டமிடல்கள் என்று பலவற்றையும் தெரிந்து கொள்ள முடிகிறது! 

92 வயதான தாத்தா ஆசை ஆசையாக தேங்காய் பர்ஃபி கிளறிக் கொட்டினார்!  பழங்கதைகளை பேசிக் கொண்டு பொழுதை கடத்தாமல் இன்றைய தலைமுறையினருக்கு ஈடு கொடுத்து துடிப்புடன் உதவுவதைப் பார்க்கும் போது நமக்கான உத்வேகமாக தோன்றியது நிஜம்!

இனிமை நிறைந்த நாட்களுக்குப் பின் மீண்டும் வீட்டில் உயிர்ப்புடன் இருக்கும் ஒரு அறையை நோக்கிய பயணம்...🙂 நான்கு நாட்களாக அந்த அறைக்கு விடுமுறையாக இருந்தது...:))

******

தம்பதியர் தினம் - 29 May 2023:

என்னவர்: உன்ன மாதிரியே எல்லாரும் perfection ஓட இருப்பாங்களா! எவ்வளவு தடவ தான் சொல்றது! ............!!!

நான்: நான் சாதாரணமா தானே சொன்னேன்! அதுக்கு Answer தெரிஞ்சா சொல்லுங்கோ! அதுக்கு இவ்வளவு நேரம் சொல்லணுமா! 

என்னவர்: அதான் நானும் சொல்றேன்! இவ்வளவு வருஷமா சொல்லியும் நீ  கேட்க மாட்டேங்கிறியே!!

ஹா...ஹா..ஹா..!

இன்னிக்கு தம்பதியர் தினமாம்! உங்க வீட்டிலும் இப்படித்தானா...🙂

******

சென்னை ட்ரிப்! - நிச்சயதார்த்தம் - 30 May 2023:

இம்முறை சென்னைக்குச் சென்றது நெருங்கிய உறவில் ஒரு திருமண நிச்சயதார்த்த நிகழ்வில் கலந்து கொள்வதற்காக! இதை நிச்சயத் தாம்பூலம் என்றும் சொல்வதுண்டு! 

பெண் பார்க்கும் நிகழ்விற்குப் பின் திருமணம் எந்த நாளில் வைத்துக் கொள்ளலாம் என்று முடிவு செய்யப்பட்டு இருவீட்டாரின் ஒப்புதலுடன் அதை பத்திரிக்கையாக எழுதி தாம்பூலத்துடன் மாற்றிக் கொள்வது! அதற்கு ஒப்பந்தம் செய்து கொள்வது என்று சொல்லலாம்! 

முதல்முறையாக மாப்பிள்ளையும் பெண்ணும் ஒன்றாக அமர வைக்கப்பட்டு அவர்களுக்கு மாலையிட்டு நலுங்கு வைத்து ஆரத்தி எடுத்தல் என்று சடங்குகள் நடைபெறும்! பெண்ணுக்கு மாப்பிள்ளையின் சகோதரி தான் நலுங்கு வைத்து மாலை அணிவிப்பார்! அதே போன்று மாப்பிள்ளைக்கு பெண்ணின் உடன்பிறந்தவன் இதே சடங்குகளை செய்வார்!

மாப்பிள்ளையும் பெண்ணும் ஒருவருக்கொருவர் மாலை மாற்றிக் கொள்வது திருமணத்தில் தான்! திருமணத்திற்கு முதல் நாளான மாப்பிள்ளை அழைப்பிற்கு முன்பும் நினைவூட்டலுக்காக இதே பத்திரிக்கையை தாம்பூலத்துடன் மாற்றிக் கொண்டு நிச்சயத் தாம்பூலம் செய்து கொள்வார்கள்! அதன் பின்பே ஜானவாஸம் என்று சொல்லப்படுகிற மாப்பிள்ளை அழைப்பு நிகழும்!

எங்கள் குடும்பங்களில் இப்படியாக நிச்சயதார்த்த நிகழ்வு நடைபெறுவது காலம் காலமாக பின்பற்றி வரும் வழக்கம்! ஒவ்வொரு காலகட்டத்திலும் அவரவரின் வசதிக்கும் வாழ்க்கை முறைக்கும் ஏற்றவாறு இந்நிகழ்வுகள் நடைபெற்று வருகின்றன! 

அதே போன்று இந்த நிச்சயதார்த்த நிகழ்வு என்பது மாப்பிள்ளை ஊரில் அவரது வீட்டில் தான்! திருமணம் பெண்ணுடைய ஊரில்! சீமந்தம் மாப்பிள்ளை வீட்டில்! இப்படியாகத் தான் சம்பிரதாயங்கள் இதுவரை பின்பற்றப்பட்டு வருகின்றன! இந்நாட்களில் மண்டபம் ஏற்பாடு செய்யப்பட்டு ஊரும் உறவுகளும் கூடி திருமண நிகழ்வுக்கு இணையாக ஆடம்பரமாக செய்யப்படும் நிகழ்வுகள் நடைபெறுகின்றன!

'அவரும் நானும்' தொடர் எழுதிய போது அதில் என் திருமண நிகழ்வில் திருவரங்கத்தில் நடைபெற்ற எங்கள் நிச்சயதார்த்தத்தைப் பற்றி எழுதியிருந்தேன்! நிகழ்வு நடைபெற்றது அவரது வீட்டில்! இருவீட்டாரும் சேர்த்து மொத்தம் 50 பேர் இருக்கலாம்! அனைவருக்கும் வீட்டிலேயே சமைத்த உணவு தான்! மாப்பிள்ளைக்கு நாங்களும், பெண்ணுக்கு அவர்களும் உடை எடுத்திருந்தார்கள்! 

அவரது வீட்டின் கீழேயே இருந்த ஒரு காலியான வீட்டில் எங்களுக்கு உணவு பரிமாறப்பட்டது! என் கணவரே எனக்கு பரிமாறினார்..🙂 இதுவே 20 வருடத்துக்கு முந்தைய எங்கள் நிச்சயத் தாம்பூலம்! அந்நாளில் இந்த நிகழ்வுக்காக செலவு செய்யப்பட்ட தொகை 5000 ஆக இருக்கலாம்!

இதை விட 92 வயது தாத்தா என்னிடம் பகிர்ந்து கொண்ட விஷயம் என்னை மிகவும் ஆச்சரியப்படுத்தியது! எங்கள் குடும்பங்களில் 'பருப்புத் தேங்காய் என்று சொல்லப்படும் கோன் போன்ற இனிப்பில்லாமல் எந்த சடங்கும் நிகழ்ந்ததில்லை! பெண் பார்க்க வந்த போது சட்டென்று முடிவான திருமணமாம்! பருப்புத் தேங்காய்க்கு எங்கே செல்வது?? வெல்லப்பாகு வைத்து கிளறுவதற்கெல்லாம் நேரமில்லை!

சைக்கிளை எடுத்துக் கொண்டு அருகிலிருக்கும் கடைக்குச் சென்று இரு சர்க்கரை பொட்டலங்களை வாங்கி வந்து அதற்கு சந்தனம் குங்குமம் வைத்து பூ சுற்றி மனையில் வைத்தாராம்! எத்தனை எளிமையாக சம்பிரதாயத்தை நிகழ்த்தி விட்டார்! ஆக எப்படியும் வாழலாம் என்பது போல எப்படியும் சடங்குகளை பின்பற்றலாம் என்பதை தெரிந்து கொள்ள முடிந்தது!

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்