குவாரி பாஸ் - மலையேற்றம் - நிழற்பட உலா - பகுதி ஒன்று

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.

நேற்று வெளியிட்ட காஃபி வித் கிட்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி. இந்த நாளை நல்லதொரு வாசகத்துடன் தொடங்கலாம் வாருங்கள்.

******

எனது அலுவலக நண்பர் Pபிரேம் Bபிஷ்ட் அவர்களின் மலையேற்றப் பயணங்கள் குறித்தும், அவரது பல பயணங்களில் எடுத்த நிழற்படங்கள் குறித்தும் இந்த வலைப்பூவில் சில தொடர்கள் எழுதி இருக்கிறேன். அவரது பயணங்கள் குறித்த பதிவுகளை இது வரை நீங்கள் படித்திராவிட்டால் அவற்றைப் படிக்க ஏதுவாக அவர் பகிர்ந்து கொண்ட மூன்று தொடர்களின் சுட்டிகள் கீழே தந்திருக்கிறேன். இந்தச் சுட்டிகளில் மொத்தம் 22 பதிவுகள் இருக்கிறது. நீங்கள் அவற்றை ஒவ்வொன்றாக வாசித்து மகிழலாம்!

கேதார் தால், உத்திராகண்ட்

நந்தி குண்ட், உத்திராகண்ட்

ருபின் பாஸ், உத்திராகண்ட்

இந்த வரிசையில் தொடர்வது குவாரி பாஸ் என்ற இடம் குறித்த தகவல்களும் நிழற்படங்களும். இந்த இடமும் உத்திராகண்ட் மாநிலத்தில் இருக்கும் ஒரு இடம் தான். குவாரி பாஸ் குறித்த தகவல்களை முதலில் பார்க்கலாம்.

எங்கே இருக்கிறது குவாரி பாஸ்?

உத்திராகண்ட் மாநிலத்தின் ஜோஷிமட் அருகே இருக்கிறது இந்த குவாரி பாஸ். கடல் மட்டத்திலிருந்து 12516 அடி உயரத்தில் அமைந்திருக்கும் இந்த மலைப்பகுதியிலிருந்து இந்தியாவின் இரண்டாம் உயரமான மலையான நந்தா தேவியை உங்களால் பார்க்க முடியும். நந்தா தேவி தவிர DHத்ரோணகிரி, CHசௌக்கம்பா, CHசித்ரகாந்தா மற்றும் Tதாலி மலையுச்சியினை உங்களால் பார்க்க முடியும். ஜோஷிமட் வரை சாலைப்பயணம் என்றாலும், அதன் பிறகு மொத்தமாக 34 கிலோ மீட்டர் நடைப்பயணம் தான். ரிஷிகேஷ்-லிருந்து புறப்பட்டால் குவாரி பாஸ் மலையேற்றம் முடித்து மீண்டும் ரிஷிகேஷ் திரும்ப மொத்தம் ஆறு நாட்கள் தேவை. இந்த இடங்களுக்கு தனியாக உங்களால் சென்று வர முடியுமா? என்று கேட்டால் முடியும், ஆனால் கூடவே ஒரு வழிகாட்டியை அழைத்துச் செல்ல வேண்டியிருக்கும் என்பதோடு தங்குவதற்குத் தேவையான கூடாரம் போன்ற உபகரணங்களையும் நீங்கள் எடுத்துச் செல்ல வேண்டியிருக்கும். நடைப்பயண/மலையேற்ற வழியில் தங்குமிடங்கள் எதுவும் கிடையாது என்பதால் நீங்களாகவே கூடாரம் அமைக்கத் தேவையானவற்றை எடுத்துச் செல்ல வேண்டியிருக்கும்.

பயண ஏற்பாடுகள் குறித்த தகவல்கள்:

இந்தப் பயணத்தினை நீங்களாகவே ஏற்பாடுகள் செய்து செல்வதற்கு பதிலாக இதற்கென்றே இருக்கும் பயண ஏற்பாட்டாளர்கள் மூலம் ஏற்பாடு செய்து கொண்டு செல்வது நல்லது. மலையேற்றத்தின் போது தேவையான டென்ட் வசதிகள், உணவு போன்றவற்றை அவர்களே பார்த்துக் கொள்வார்கள். ஒரு குழுவாக அழைத்துச் செல்வார்கள் என்பதால் சில புதிய நட்புவட்டமும் உங்களுக்கு உருவாகும் என்பதும் ஒரு நல்ல விஷயம். India Hikes, Thrillophilia போன்ற நிறுவனங்கள் இது போன்ற மலையேற்றப் பயணங்களை ஏற்பாடு செய்து தருகிறார்கள். இது குறித்த மேலதிகத் தகவல்களையும், பயணத்தில் உங்களுக்கு கிடைக்க இருக்கும் அனுபவங்களையும் குறித்த தகவல்களை, இந்த நிழற்பட உலாவின் அடுத்து வரும் பகுதிகளில் உங்களுடன் பகிர்ந்து கொள்கிறேன். வாருங்கள் குவாரி பாஸ் பகுதியில் நண்பர் சென்ற வருடத்தின் (2022) ஏப்ரல் மாதத்தில் எடுத்த சில நிழற்படங்கள் பார்க்கலாம்! நம்மால் அங்கே செல்ல முடியவில்லை என்றாலும் அந்த இடம் குறித்த தகவல்களையும், சில நிழற்படங்களையும் படித்து/பார்த்து ரசிக்கலாமே!

******

இந்த நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன். மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….