உலக மக்கள்தொகை தினம்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட த்வாரகா - சோம்நாத் பயணத் தொடர் - பகுதி ஐந்து பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

ஒவ்வொரு வருடமும் ஜூலை மாதம் 11-ஆம் நாள் உலக அளவில் மக்கள்தொகை பெருக்கம் குறித்த விழிப்புணர்வு ஏற்படுத்தும் நாளாக கொண்டாடுகிறார்கள்.  ஒரு குறிப்பிட்ட கணக்கெடுப்பு படி, இந்தியாவின் மக்கள் தொகை, 2027-ஆம் ஆண்டு சீனாவினை விட அதிகமாக ஆகிவிடும் என்றும், மக்கள் தொகையில் முதல் இடம் பிடிக்கும் என்று சொல்கிறார்கள்.  சில வருடங்கள் முன்னர் மக்கள் தொகை சம்பந்தப்பட்ட ஒரு பிரிவில் மூன்று வருடங்கள் வேலை செய்த போது இந்தப் பிரச்சனை குறித்து நிறைய அறிமுகம் கிடைத்தது.  மக்கள் தொகை அதிகரிக்க அதிகரிக்க பிரச்சனைகளும் அதிகரிக்கும் என்பது கண்கூடு.  இந்தியாவில் பல குடும்பங்களில் இன்றைக்கு ஒரு குழந்தை போதும் என்று முடிவு எடுத்துவிட்டாலும், தொடர்ந்து மக்கள் தொகை அதிகரித்துக் கொண்டு தான் இருக்கிறது.  மூன்றுக்கு மேல் வேண்டவே வேண்டாம், நாம் இருவர் நமக்கு இருவர், One is Fun என்றெல்லாம் சொல்லிக்கொண்டு இருந்த காலம் போய், “நாம் இருவர் நமக்கெதற்கு இன்னொருவர்” என்று சொல்லும் காலம் வந்தாலும் வரலாம்…

அதிக மக்கள் தொகை என்பது ஒரு விதத்தில் பிரச்சனையாகத் தெரிந்தாலும், அதிக அளவில் இருக்கும் நம் மக்கள் தொகை நமது நாட்டினை பல தளங்களில் முன்னேற்றவும் காரணமாக இருக்கக்கூடும் என்பதும் ஒரு விவாதப் பொருளாக வைக்கப்படுகிறது. இருப்பதற்கு இடமே இல்லாத அளவிற்கு மக்கள் தொகை அதிகரித்து வருவதும், நகர எல்லைகள் தொடர்ந்து விரிவடைந்து வருவதும், குறிப்பிட்ட அளவு பரப்பளவில் அதிக அளவில் மக்கள் வசிப்பதும், வீடுகள் எண்ணிக்கை அதிகரித்துக் கொண்டே இருப்பதும் என பல விஷயங்கள் மக்கள் தொகை உடன் சம்பந்தப்பட்டது.  இது தவிர, இத்தனை மனிதர்களுக்கும் தேவையான சுகாதார வசதிகள், மருத்துவ வசதிகள், வேலைவாய்ப்பு, இருக்க இடம் போன்றவற்றை செய்து தரவேண்டிய கட்டாயமும் மக்கள் தொகை அதிகரிப்புடன் சம்பந்தப்பட்டது.  மக்கள் தொகையில் முதல் இடத்திற்கு வரப்போவது நமக்கு வரமா அல்லது சாபமா என்பதற்கான பதிலை காலம் தான் சொல்ல வேண்டும்.  

இந்தப் பிரச்சனை குறித்த உங்கள் கருத்து என்ன? என்னவெல்லாம் பிரச்சனைகள் வரலாம் என்பது போன்ற விஷயங்களை நீங்களும் பின்னூட்டம் வாயிலாகச் சொல்லுங்களேன்! மக்கள் தொகை அதிகரிப்பு குறித்த சில நிழற்படங்கள் இன்றைக்கு உங்களுடன் பகிர்ந்து கொள்வதில் மகிழ்ச்சி.

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

11 ஜூலை 2024