காஃபி வித் கிட்டு - 194 - மழை வரும் முன்னே… - ஒன்பது சுவையில் ரப்டி… - கதவைத் தட்டிய பேய்.... - நிலாவில் கால் - Sign Language - மாட்டிக்கொண்ட எலி

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட சிறிது வயிற்றுக்கும் - காசி நகரின் உணவு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் தகவல் : மழை வரும் முன்னே…

நம் நாட்டில் எத்தனையோ பழமையான கோயில்கள் இருக்கின்றன. தமிழகத்திலேயே இருக்கும் கோயில்கள், அதன்  பெருமை என்ன போன்றவற்றை இன்னும் அறிந்திருக்காத போது, இந்திய தேசத்தில் இருக்கும் ஆச்சரியமான கலை நுணுக்கத்துடன் கட்டப்பட்ட கோயில்கள் குறித்து நாம் அறிவதற்கு வாய்ப்பே இல்லாமல் போகிறது.  உத்திரப் பிரதேச மாநிலத்தில் இருக்கும் கான்பூர் நகரம் அருகே பெஹத்தா புஜுர்க் (Behata Buzurg) எனும் இடம் இருக்கிறது என்றும் அங்கே இருக்கும் ஒரு கோவில் ஆச்சரியம் தரும் வகையில் அமைக்கப்பட்டிருக்கிறது என்றும் சமீபத்தில் படித்தேன்.  மழை வருவதற்கு சில நாட்கள் முன்னதாகவே கோவிலின் பிரதான விக்ரஹமாக அமைந்திருக்கும் ஜகன்னாத் சிலை இருக்கும் இடத்தின் மேற்கூரையிலிருந்து தண்ணீர் சொட்ட ஆரம்பித்து விடும் என்றும் மழை பெய்த உடன் அப்படிச் சொட்டுவது நின்று விடும் என்றும் சொல்கிறார்கள்.  இந்தக் கோவில் கட்டப்பட்ட ஆண்டு எது, யார் கட்டினார்கள் போன்ற விவரங்கள் இல்லை என்றாலும் பதினொன்றாம் நூற்றாண்டில் கடைசியாக புனரமைக்கப்பட்டது என்றும் சொல்கிறார்கள்.  எத்தனை நுணுக்கமான வேலை என்பதை கேட்கும்போதே பிரமிக்க வைக்கிறது அல்லவா! இப்படி எத்தனை எத்தனையோ பிரமிக்க வைக்கும் கலை நுணுக்கங்கள் நம் நாட்டிலே இருந்திருக்கிறது என்பதை எப்போது தான் உணர்ந்து கொள்வோமோ? அத்தனையும் பாதுகாக்க வேண்டியதன் அவசியமும் எல்லோருக்கும் புரியவேண்டுமே! 

******

இந்த வாரத்தின் உணவு : ஒன்பது சுவையில் ரப்டி…

ரப்டி - பாலைச் சுண்டச் சுண்ட காய்த்து செய்யப்படும் ஒரு வகை இனிப்பு தான் ரப்டி எனப்படுவது.  வடக்கில் மிகவும் பிரபலமான இனிப்பாக இந்த ரப்டி சொல்லப்படுகிறது. ஜலேபி மீது ரப்டி, லஸ்ஸி மீது ரப்டி, இப்படியில்லாமல் தனியாகவே ரப்டி என விதம் விதமாக ரப்டி தயாரிக்கிறார்கள். பாலுக்கு குறைவே இல்லாத இந்த ஊரில் இப்படித் தயாரிப்பதில் ஆச்சர்யம் இல்லை தான்.  சாதாரணமாக ரப்டி சாப்பிட்டு இருக்கிறேன் என்றாலும் சமீபத்தில் பழைய தில்லியின் ஒரு பகுதியான சாந்த்னி சௌக் பகுதிக்குச் சென்றிருந்தபோது அங்கே ஒரு பழமையான உணவுக் கடை குறித்து கேள்விப்பட்டதால் அங்கே சென்று இருந்தேன். அந்தக் கடையில் பல வகை உணவு கிடைக்கும் என்றாலும் அங்கே கிடைக்கும் ஒன்பது வகை/சுவையில் ரப்டி மிகவும் பிரபலம் என்று சொன்னதால் சுவைத்துப் பார்க்க ஆசைப்பட்டேன்.  இந்தக் கடையில் ஒரு விசேஷம் - வாங்குவதற்கு முன்னர் சுவைத்துப் பார்க்கவும் கொஞ்சம் தருகிறார்கள் என்பதால் ஒன்றிரண்டு வகைகளை சுவைக்கலாம்! மிகவும் பிரபலமான கடை - ஷீஷ்கஞ்ச் குருத்வாரா அருகே இருக்கிறது. தில்லி பயணிக்க வாய்ப்பிருந்தால் இந்தக் கடையில் சில வகை ரப்டி சுவைத்துப் பார்க்கலாம்! 

******

பழைய நினைப்புடா பேராண்டி : கதவைத் தட்டிய பேய்....

2015-ஆம் ஆண்டு இதே நாளில் வெளியிட்ட பதிவு - கதவைத் தட்டிய பேய்.... - அந்தப் பதிவிலிருந்து சில வரிகள் இங்கே.  

“டக்...டக்...டக்......”  கதவைத் தட்டும் ஓசை......

உள்ளே இருந்து எந்த பதிலும் இல்லை.  அனைவரும் நல்ல உறக்கத்தில் இருந்திருப்பார்கள் போலும்!

மீண்டும்  “டக்...டக்...டக்......” 

கூடவே ஒரு குரலும்..... “மல்லிகாம்மா.. கதவைத் திற.....”   மல்லிகாம்மா.... கதவைத் திற.....”  உள்ளே இருக்கும் அம்மாவிற்குக் குரல் கேட்டு “யாரது எனக் கேட்க, இங்கே நிசப்தம்...

மீண்டும் சிறிது நேரம் கழித்து “மல்லிகாம்மா.. கதவைத் திற.....”   மல்லிகாம்மா.... கதவைத் திற.....”  என்ற குரல் கேட்க, பெரியம்மா சத்தமாக அம்மாவிடம் கதவைத் திறக்காதே என்று சொன்னதோடு, தாழ்வாரத்தில் கிடந்த ஒரு துடப்பம் எடுத்து தரையில் அடி அடி என அடிக்க, குரலும் உருவமும் நகர்ந்து விட்டதாம்.

வாசல் கதவை விட்டு அகன்ற பேய் அடுத்ததாக ஜன்னல் வழியாக வந்துவிடுமோ என அவசரம் அவசரமாக எல்லா ஜன்னல் கதவுகளையும் மூடிவிட [பொதுவாகவே நெய்வேலியில் எல்லா ஜன்னல்களும் காற்றோட்டத்திற்காக, திறந்தே தான் இருக்கும்], ஜன்னல்களிலும் “டக்....டக்....டக்....”  ஓசை. அதற்கும் உள்ளே இருந்து பதில் வராது போக, தோட்டக்கதவிற்கு தாவியது கதவைத் தட்டிய பேய்.

மேலே உள்ள சுட்டி வழி முழு பதிவையும் படித்து ரசிக்கலாமே - இது வரை நீங்கள் படித்திருக்காவிட்டால்!

******

இந்த நாள் இனிய நாள் : நிலாவில் கால்

1969-ஆம் வருடம் ஜூலை மாதம் 20-ஆம் நாள் - கிட்டத்தட்ட 55 வருடங்களுக்கு முன்னர் இதே நாளில் தான் நீல் ஆம்ஸ்ட்ராங் அவர்கள் நிலாவில் முதன் முதலாக கால் பதித்தார். வானியல் துறையில் இந்தியாவின் வளர்ச்சியும் பிரமிக்கத்தக்கதாக இருக்கிறது என்பதில் சந்தேகமில்லை.  அறிவியல் வளர்ச்சி என்பது நல்ல விஷயம் தானே. நம் நாட்டில் உள்ள பலருக்கும் (சிலருக்கு பிடிக்காது போனதும்), சந்திரயான் 3 வெற்றி பெற்றது எந்த அளவு மகிழ்ச்சி தந்தது என்பது கண்கூடு.  

******

இந்த வாரத்தின் ரசித்த விளம்பரம் :  Sign Language

ஒன்பது வருடங்களுக்கு முன்னர் எடுத்த விளம்பரமாக இருந்தாலும் இன்றைக்கு பார்க்கும்போதும் மனதைத் தொடும் விதமாகவே இருக்கிறது சாம்சங்க் விளம்பரம் ஒன்று.  நீங்களும் பாருங்களேன்!

மேலே உள்ள காணொளி பார்க்க இயலவில்லை எனில் கீழே உள்ள சுட்டி வழி பார்க்கலாம். 

Hearing Hands - Touching Ad By Samsung (youtube.com)

******

இந்த வாரத்தின் ரசித்த துணுக்கு :  மாட்டிக்கொண்ட எலி

ஒரு ஜாடி முழுவதும் தானியம் நிரப்பி அதன் மேல் ஒரு எலியை விட்டார்கள். எலிக்கு தன்னை சுத்தி இவ்வளவு உணவு இருக்கிறது என்று பயங்கர குஷி. இனி உணவை தேடி ஓடாமல் சந்தோஷமாய் வாழ்க்கையை கழிக்கலாம் என்று எண்ணி தினமும் தன்னை சுத்தி ஜாடியில் உள்ள தானியத்தை உண்டது. நாளாக நாளாக ஜாடியில் உள்ள தானியம் குறைந்து கொண்டே போய் ஒரு நாள் தீர்ந்தே விட்டது. எலி இப்பொழுது ஜாடிக்குள் நிரந்தரமாய் மாட்டிக்கொண்டு விட்டது. அதனால் வெளியேறவே முடியாது.

இனி தினம் யாராவது தானியம் போட்டால் மட்டுமே அதற்க்கு உணவு. யாரும் போடவில்லை என்றால் பட்டினியால் சாக வேண்டியதுதான். அப்படியே யாரவது போட்டாலும் போடுவதை மட்டுமே சாப்பிட முடியும். விரும்பியதை, வேண்டும் என்பதை சாப்பிட முடியாது.

நீதி: சுலபமாக கிடைக்கும் எதுவும் நம்மை அதற்கு அடிமை ஆக்கி, அதற்கு சொகுசாய் நம்மை வாழப்பழக்கி, நம் முன்னேற்றத்தை தடுத்து நம் வாழ்வை நாசமாக்கி விடும்.

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

20 ஜூலை 2024