காஃபி வித் கிட்டு - 192 - ZOONOSES DAY - நீ - சீதாவனிக்குள் சீதை - க்ரீம் பவுடரா - சோம்பேறிகள்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட த்வாரகா - சோம்நாத் பயணத்தொடர் - பகுதி மூன்று பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் தகவல் : WORLD ZOONOSES DAY…

வருடத்தின் ஒவ்வொரு ஜூலை மாதமும் ஆறாம் தேதி அன்று WORLD ZOONOSES DAY என்ற பெயரில் விலங்குகளிடமிருந்து மனிதர்களுக்கு பரவும் நோய்கள் குறித்த விழிப்புணர்வை ஏற்படுத்தும் விதமாக முன்னெடுத்து பல நிகழ்வுகளை நடத்துகிறார்கள் என்பது இந்த வாரத்தின் தகவல்.  ஏன் இந்த நாள்? இந்த நாளில் ஏன் இப்படியான ஒரு நிகழ்வு?  1885-ஆம் வருடம் இதே நாளில் தான் முதன் முறையாக Louis Pasteur அவர்கள் Rabies நோய்க்கு எதிரான மருந்தை  பயன்படுத்தி ஒரு சிறுவனுக்கு நோய் எதிர்ப்பை கொடுத்தது மட்டுமல்லாது உயிரையும் காப்பாற்றினாராம்!  அதனால் அவரை கௌரவப்படுத்தும் விதமாக, இந்த நாள் WORLD ZOONOSES DAY என, விலங்குகளிடமிருந்து மனிதர்களுக்கு பரவும் நோய்கள் குறித்த ஒரு விழிப்புணர்வை ஏற்படுத்தும் நாளாக உலகம் முழுவதும் கொண்டாடுகிறார்களாம்! 

******

இந்த வாரத்தின் ரசித்த கவிதை : நீ…

முகநூல் நண்பரும், எனது தில்லி நண்பர் பத்மநாபன் அவர்களின் உறவினருமான திரு இராஜேஷ் சங்கரபிள்ளை அவர்களின் கவிதை ஒன்று இந்த வாரத்தின் ரசித்த கவிதையாக - உங்கள் பார்வைக்கு!

இதையும்

அதையும்

கூட்டினால்

விடை

இதையும்

அதையும்

கழித்தாலும்

விடை

இதையும்

அதையும்

பெருக்கினாலும்

விடை

இதையும்

அதையும்

வகுத்தாலும்

விடை

எப்படி பார்த்தாலும்

விடை வெளி வரும்.

விடை தெரிந்த பின் தான்

அழுகிறோம்

புரளுகின்றோம்

அணைக்கின்றோம்

கூத்தாடுகின்றோம்

அள்ளிக் கொடுக்கின்றோம்.

பின்

முழித்து நிற்கின்றோம்.

ஒன்றுமே புரியவே யில்லை.

வாசலில்

பார்த்த நாய்,

காலை முதல்

சாயுங்காலம் வரை

உங்களை பார்த்த

நாய்க்கு

ஏனோ....

விடை முன்கூடிட்டியே தெரிந்து விட்டது.

அதனால்

அது

முழித்து நிற்கிறது.

நீ....?

இராஜேஷ் சங்கரப்பிள்ளை

******

பழைய நினைப்புடா பேராண்டி : நைனிதால் – சீதாவனிக்குள் சீதை

2016-ஆம் ஆண்டு இதே நாளில் வெளியிட்ட பதிவு - நைனிதால் – சீதாவனிக்குள் சீதை - அந்தப் பதிவிலிருந்து சில வரிகள் இங்கே.  

கூழாங்கற்கள் நிரம்பிய சிற்றோடை போல ஓடிக்கொண்டிருக்கும் கோசி ஆற்றின் கரையில் சில நிமிடங்கள் அமர்ந்து இளைப்பாறினோம். போகும்போது வாங்கிச் சென்ற சில நொறுக்குத் தீனிகளை நாங்கள் உண்டு மகிழ்ந்தோம்.  கூடவே ஓட்டுனர் வீரப்பனுக்கும் கொடுத்தோம். காலியான அந்த பைகளை காட்டில் போடக்கூடாது என்ற சுய கட்டுப்பாட்டுடன் எடுத்து வைத்துக் கொண்டோம் – வெளியே சென்ற பிறகு குப்பைக்கூடையில் போடலாம் என!

நாங்கள் அங்கே அமர்ந்திருந்தபோது ஒரு சில தனியார் வாகனங்களும் அந்த இடத்தினைக் கடந்தன. புதிதாய் மணமான ஒரு ஜோடி, இன்னும் சில இளைஞர்கள் இருந்த ஒரு வாகனம் வந்தது. வாகனத்தில் இருந்த அனைவரும் பலத்த சப்தங்களை எழுப்பியபடி வந்தனர்.  வந்தவர்களுக்கு வால்கள் இருந்ததாகத் தெரியவில்லை – ஆனாலும் வானரங்களைப் போல நடந்து கொண்டார்கள்.  இருக்கைகளில் அமர்ந்து கொள்ளாது கதவுகளில் இருக்கும் கண்ணாடிகளை கீழிறக்கி அதன் மேல் பக்கத்திற்கு ஒன்றாய் ஆண்கள் அமர்ந்து கொள்ள ஓட்டுனர் இருக்கைக்கு எதிர் கதவின் மேல் இரண்டு பெண்கள் – வாகனத்தின் மேல் ஒரு இளைஞர் – அவர் கீழே விழுந்துவிடாதபடி பின் பக்கம் இருந்த இளைஞர்கள் பிடித்துக் கொண்டிருந்தார்கள். காட்டிற்குள் இருந்த குரங்குகள் கூட இவர்களின் சேஷ்டைகளைப் பார்த்து வெட்கம் கொண்டு ஓடின!

சில நிமிடங்கள் கடந்தபிறகு அந்த சிற்றோடையின் குறுக்கே இருந்த கற்களாலான பாதையை ஜீப்பில் அமர்ந்து கடந்தோம்.  ஜீப் என்பதால் சுலபமாக கடக்க முடிந்தது. கார் போன்றவற்றில் வந்தவர்கள் அந்த இடத்தினைக் கடக்க ரொம்பவே கஷ்டப்பட்டார்கள்.  வெள்ளம் இருந்தால் நிச்சயம் அப்படிக் கடக்கும்போது வண்டி அடித்துக் கொண்டு போய்விடும் அபாயம் இருந்தது.

மேலே உள்ள சுட்டி வழி முழு பதிவையும் படித்து ரசிக்கலாமே - இது வரை நீங்கள் படித்திருக்காவிட்டால்!

******

இந்த வாரத்தின் ரசித்த பாடல் : க்ரீம் பவுடரா…

இந்த வாரத்தின் ரசித்த பாடலாக, உத்திராகண்ட் மாநிலத்தின் ஒரு நாட்டுப்புற பாடல் ஒன்று - உங்கள் ரசனைக்கு!

மேலே உள்ள காணொளியை பார்ப்பதில் சிக்கல் என்றால், கீழே உள்ள சுட்டி வழியும் பார்க்கலாம்!

Cream Paudara | New Kumauni Folk Song | Rakesh Khanwal & Maya Upadhyay |Pannu Gusain & Shweta Mahara (youtube.com)

******

இந்த வாரத்தின் செய்தி:  சோம்பேறிகள்

சமீபத்தில் தினமலர் நாளிதழில் படித்த செய்தி ஒன்று இந்தியர்கள் சோம்பேறிகள் என்பது போல சொல்லியிருக்கிறது. அந்த செய்தியிலிருந்து சில வரிகள்…

இந்தியாவில் பாதி பேர் போதிய உடல் உழைப்பு இல்லாததால், உலக சுகாதார அமைப்பு நிர்ணயித்துள்ள உடற்தகுதியை பெறவில்லை என்பது ஆய்வு ஒன்றில் தெரியவந்துள்ளது.

இது தொடர்பாக லான்செட் மருத்துவ இதழ் வெளியிட்ட அறிக்கையில் கூறியுள்ளதாவது: இந்தியாவில் வயது வந்தவர்கள் மத்தியில் போதி உடல் உழைப்பு இல்லாதவர்களின் எண்ணிக்கை 2022ல் 49.4 சதவீதமாக உள்ளது. அதில், பெண்கள் 57 சதவீதம் பேர். ஆண்கள் 49 சதவீதம் பேர். உடல் உழைப்பு இல்லாதவர்களின் எண்ணிக்கை 2000 ல் 22.4 சதவீதமாக இருந்தது. இது குறித்து 195 நாடுகள் கொண்ட பட்டியலில் இந்தியாவுக்கு 12வது இடம் கிடைத்து உள்ளது.

முழு செய்தியும் கீழே உள்ள சுட்டி வழி படிக்கலாமே!

இந்தியாவில் பாதிபேர் உடல் உழைப்பு இல்லாத சோம்பேறிகள்: ஆய்வில் அதிர்ச்சி தகவல் (dinamalar.com)

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

6 ஜூலை 2024