காஃபி வித் கிட்டு - 195 - Bபோட்டியா - வகுப்பறை - சப்பாத்தி - ராஜா பய ஒண்ணு - சமோசா - நிலச்சரிவுகள் - அப்பாவின் வருகை

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட வரம் தரும் வாராஹி கோயில் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த வாரத்தின் தகவல் : Bபோட்டியா…

Bபோட்டியா… - இது என்ன புதுசா ஒரு பெயர் என்று கேட்பவர்களுக்கு, இந்த வாரத் தகவலாக ஒரு விஷயம்.  ஹிமாச்சலப் பிரதேசம், உத்தராகண்ட் போன்ற மலைப் பிரதேசங்களில் மேய்ப்பர்கள், தங்களது ஆடுகளை Bபாக்(g) மற்றும் (Th)தேந்துவா என்று ஹிந்தியில் அழைக்கப்படும் புலி, சிறுத்தை போன்ற மிருகங்களிடமிருந்து காப்பாற்றுவதற்காக பழக்கி வைத்திருக்கும் ஒரு வகை நாய் தான் Bபோட்டியா… அதிக முடி, கடுமையான பற்கள் கொண்ட இந்த வகை நாய்கள் தங்களது பற்களால் புலி, சிறுத்தை போன்றவற்றை பிடித்தால் விடாது என்று சொல்கிறார்கள். பார்க்கவே பயமாகவும் இருக்கும் இந்த Bபோட்டியா… இந்தப் பிரதேசங்களுக்கு பயணிக்கும் போது மேய்ப்பர்களுடன் இந்த வகை நாய்களை பார்த்ததுண்டு என்றாலும் அவை குறித்து அதிகம் யோசித்ததோ, தகவல்களைக் கேட்டதோ கிடையாது.  எனது அலுவலக நண்பர் ஒருவருடைய வீட்டில் இந்த வகை சுமார் 15 வருடங்களாக வளர்த்து வருகிறார்.  மூப்பின் காரணமாக தனது முடிவு வந்துவிட்டது என்று அறிந்து விட்டதோ என்னவோ, கடந்த 10 நாட்களாக உணவருந்தாமல் இருக்கிறது என்று வருத்தத்துடன் சொல்லிக் கொண்டிருந்தார்.  தனது முடிவுக்காக காத்திருக்கும் அவரது செல்ல நாய் குறித்து மனவருத்தம் அவரிடம் அதிகமாக இருக்கிறது.  கேட்டதிலிருந்து எனக்கும் கொஞ்சம் வருத்தம் தான்! 

******

இந்த வாரத்தின் நிதர்சனம் : வகுப்பறை…

அலைபேசிகள் மீதான மோகம் அதிகரித்துக் கொண்டே போகிறது. எல்லோருக்கும், குழந்தைகள் உட்பட அலைபேசி இல்லை என்றால் என்னவோ ஆகிவிடுகிறது. அதை விட்டு விலக யாருக்கும் பிடிப்பதில்லை. சமீபத்தில் பேருந்தில் பயணித்துக் கொண்டிருந்த போது எனக்கு அருகில் அமர்ந்திருந்த பெண் தொடர்ந்து காணொளிகளை (ரீல்ஸ்) பார்த்துக் கொண்டே இருந்தார். கைகள் தொடர்ந்து மேலே தள்ளிக் கொண்டே இருக்கிறது காணொளிகளை! கிட்டத்தட்ட ஒரு மணி நேரம் அப்படிச் செய்து கொண்டிருந்ததை பார்க்க முடிந்தது! ஏன் இத்தனை மோகம்! இதன் மூலம் என்ன கிடைக்கப் போகிறது? ஏதேனும் பயன் உண்டா?  ஒன்றும் இல்லை என்பது தான் நிதர்சனம்.  இதைச் சொல்லும் விதமாக பார்த்த நிழற்படம் ஒன்று மேலே! பள்ளிகளில் நிழற்படம் சொல்வது போல காலம் வந்தாலும் வரலாம்! அப்படி வந்தால் அதிசயப் படுவதற்கில்லை. எங்கே போய் முடியப் போகிறதோ இந்த அலைபேசி மோகம்! 

******

பழைய நினைப்புடா பேராண்டி : சப்பாத்தி – வட இந்திய கதை....

2015-ஆம் ஆண்டு இதே நாளில் வெளியிட்ட பதிவு - சப்பாத்தி – வட இந்திய கதை - அந்தப் பதிவிலிருந்து சில வரிகள் இங்கே.  

அந்த கிராமத்தில் சுற்றிக் கொண்டிருக்கும் ஒரு முதியவர் – அவருக்கென யாரும் கிடையாது. தள்ளாடும் வயது. கூடவே கூன் முதுகு வேறு.  கையில் குச்சியை வைத்துக் கொண்டு தரையில் ஊன்றியபடியே கூன் முதுகோடு, தலையை மட்டும் தூக்கியபடியே நடந்து செல்வார்.  ஒவ்வொரு நாளும் அந்தப் பெண்மணி வைத்திருக்கும் சப்பாத்தியை எடுத்துக் கொண்டு ”தீவினை செய்தால், உங்களுடனேயே அது தங்கிவிடும்....  நல்வினை செய்தால், அது உங்களுக்கே திரும்பி வரும்”

ஒவ்வொரு நாளும் இப்படி பெண்மணி சப்பாத்தி வைப்பதும் அந்த முதியவர் அதை எடுத்துக் கொள்வதும் தொடர்ந்து நடந்தது.  அது போலவே அந்த முதியவர் சப்பாத்தியை எடுத்துக் கொண்ட பின் ”தீவினை செய்தால், உங்களுடனேயே அது தங்கிவிடும்....  நல்வினை செய்தால், அது உங்களுக்கே திரும்பி வரும்” என்று சொல்வதும் தொடர்ந்தது.  இப்படிச் சொல்வது தவிர வேறு ஒரு வார்த்தை பேச மாட்டார் அந்த முதியவர்.

பல நாட்கள் இப்படி தொடர்ந்து நடக்க, சப்பாத்தி வைக்கும் பெண்மணிக்கு மனதில் கோபம் உண்டாயிற்று. “நானும் தினம் தினம் இப்படி சப்பாத்தி செய்து வைக்கிறேன். இந்த முதியவரும் அதை எடுத்துக் கொள்கிறார். ஆனாலும், அவருக்கு கொஞ்சமாவது நன்றியுணர்ச்சி இருக்கிறதா? வாயைத் திறந்து நன்றி என ஒரு வார்த்தை கூட சொல்லாமல், ஏதோ ’தீவினை செய்தால், உங்களுடனேயே அது தங்கிவிடும்....  நல்வினை செய்தால், அது உங்களுக்கே திரும்பி வரும்’ என்று சொல்லிப் போகிறாரே?” என்று யோசிக்கத் துவங்கினாள்.

அந்த யோசனை அவளுக்கு இன்னும் அதிக கோபத்தினை வரவைத்தது. அதிக கோபம் ஆபத்தான விளைவினை உண்டாக்குமே! அப்பெண்ணுக்கு அப்படி கொடுமையான யோசனை உண்டாயிற்று.

மேலே உள்ள சுட்டி வழி முழு பதிவையும் படித்து ரசிக்கலாமே - இது வரை நீங்கள் படித்திருக்காவிட்டால்!

******

இந்த வாரத்தின் ரசித்த பாடல் : ராஜா பய ஒண்ணு

முன்பு நிறைய பாடல்களை கேட்டுக் கொண்டிருந்தேன். தற்போது பாடல்கள் கேட்பது வெகு அரிது! சமீபத்தில் யூ தளத்தில் எதையோ தேடிக் கொண்டிருந்த போது கண்ணில் பட்ட பாடல் - ராஜா பய ஒண்ணு என்கிற புதிய பாடல். விஜய் சேதுபதி நடித்த மஹாராஜா படத்தில் இந்தப் பாடல் வருகிறதாம். கேட்டுப் பார்த்தேன் - எனக்கு பிடித்திருந்தது! உங்களுக்கும் பாடல் பிடித்திருக்கலாம் - கேட்டுப் பாருங்களேன்.

மேலே உள்ள காணொளியை பார்ப்பதில் தடங்கல் இருந்தால் கீழே உள்ள சுட்டி வழியும் பார்க்கலாம். 

Raja Paya Onnu | Lyrical Video (Tamil) | Maharaja | Vijay Sethupathi | Divya Bharathi |MamtaMohandas (youtube.com)  

******

இந்த வாரத்தின் உணவு :  விதம் விதமாய் சமோசா

நம் ஊரில் சம்சா எவ்வளவு விற்பனை ஆகிறதோ, அதை விட அதிக அளவில் இந்த ஊரில் சமோசா விற்பனை ஆகிறது.  நம் ஊரில் கிடைக்கும் சம்சாவில் வெங்காயம் தவிர Stuffing ஒன்றும் பெரிதாக இருப்பதில்லை. ஆனால் இங்கே கிடைக்கும் சமோசாக்களில் Stuffing தான் பிரதானம்.  பொதுவாக உருளைக்கிழங்கு, பட்டாணி போன்றவை தான் அதிகம் இருக்கும்.  சில இடங்களில் முந்திரி, திராட்சை, பனீர் போன்றவையும் சேர்த்து சமோசா கிடைக்கிறது. வடக்கில் இதைச் சாப்பிடாதவர்கள், பிடிக்காதவர்கள் அபூர்வம்.  எங்கே விருந்து என்றாலும் சமோசா, பனீர் பகோடா, பானிபூரி என்று அதிக அளவில் உண்ணப்படும் உணவு இது. சமீப வருடங்களில் இந்த சமோசாவிலும் நிறைய முன்னேற்றங்கள் வந்து விட்டன.  விதம் விதமாக கிடைக்கிறது. சாக்லேட் சமோசா கூட கிடைக்கிறது! ஒன்றிரண்டு வகைகள் நானும் சுவைத்திருக்கிறேன் என்றாலும் ஏனோ சாதாரண சமோச்சாக்களுக்கே எனது ஓட்டு.  தில்லியின் மோதி நகர் பகுதியில் ”குமார் சமோசா வாலே” என்று ஒரு கடை - அவர்களிடம் முப்பது விதமான சமோசாக்கள் கிடைக்கின்றன! கடை குறித்த தகவல்கள், சமோசாக்களின் வகைகளை பார்க்க விரும்பினால் இணையத்தில் குமார் சமோசா வாலே என்று தேடிப் பாருங்களேன். மாதிரிக்கு ஒன்று கீழே!

KUMAR SAMOSE WALA.....MOTI NAGAR (youtube.com)

******

இந்த வாரத்தின் வேதனை :  நிலச்சரிவுகள்

உத்திராகண்ட் மற்றும் ஹிமாச்சலப் பிரதேசம் போன்ற மலைப் பிரதேசங்களில் மழை நாட்களில் நிலச்சரிவுகள் ஏற்படுவது சாதாரணமாகி விட்டது. எல்லா வருடங்களும் ஜூலை-ஆகஸ்ட் மாதங்களில் தொடர்ந்து நிலச்சரிவுகள் ஏற்பட்டு அதிக அளவில் மரணங்கள் நிகழ்வதும், சொத்துக்கள் பாழாவதும் நடந்து கொண்டே இருக்கிறது. இந்த வருடம் கூட இப்படி நிறைய இயற்கையின் சீற்றம் பலரை பலி வாங்கியிருக்கிறது. ஒரு விதத்தில் மனிதர்களின் பேராசையும் இந்த மாதிரி அழிவுகளுக்குக் காரணம் என்பதில் மாற்றுக் கருத்து இருக்க முடியாது.  மலைப் பிரதேசங்களில் நடந்து கொண்டிருக்கும் பிரம்மாண்ட கட்டுமானங்கள் அதற்கு சாட்சி.  ஒரு இடம் கூட விடாமல், மலைகளைச் சூறையாடிக் கொண்டிருக்கிறார்கள்.  கடந்த 10-ஆம் தேதி பத்ரிநாத் செல்லும் தேசிய நெடுஞ்சாலையில் நடந்த நிலச்சரிவு காணொளியில் பார்க்கும்போதே பயங்கரமாக இருந்தது. உங்களுக்கு விருப்பம் இருந்தால், இணையத்தில் காணொளிகள் உண்டு. தேடிப் பார்க்கலாம். மலைச்சரிவுகளால் ஏற்படும் உயிரிழப்பு, சேதாரம் என நினைக்கும் போதே மனதில் வேதனை. 

******

இந்த வாரத்தின் ரசித்த சிறுகதை :  அப்பாவின் வருகை

அப்பாவுக்கும் மகனுக்குமான உரையாடல்கள் மிகவும் குறைவு தான். எந்த மகனாலும் தனது அப்பாவை ஏனோ புரிந்து கொள்ள முடிவதே இல்லை என்று எனக்குத் தோன்றும்.  சமீபத்தில் படித்த எஸ்.ரா. அவர்கள் எழுதிய ஒரு சிறுகதை இந்த எண்ணத்தையே ஏற்படுத்தியது.  கதை எனக்கு பிடித்திருந்தது. உங்களுக்கும் பிடிக்கலாம்! படிக்க நினைத்தால் கீழே உள்ள சுட்டி வழி படித்துப் பாருங்களேன். 

அப்பாவின் வருகை. – எஸ். ராமகிருஷ்ணன் (sramakrishnan.com)

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

27 ஜூலை 2024