முகநூல் இற்றைகள் - மீசையை முறுக்கு - ஃபடாஃபட் டெலிவரி

 

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட குடும்பமரம் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

ஒரு பறவை மரத்தின் கிளையில் அமரும்போது அது எந்த நேரத்திலும் முறிந்து விடும் என்ற பயத்தில் அமருவதில்லை; ஏன் என்றால் பறவை நம்புவது அந்தக் கிளையை அல்ல - அதன் சிறகுகளை!

 

******

மீசையை முறுக்கு - 30 ஜனவரி 2022:

படம்: இணையத்திலிருந்து...

 

தில்லி மெட்ரோ ரயிலில் பயணம் செய்கையில் ஒரு இளைஞர் முகக் கவசம் அணியாமல், நெய் போட்டு வளர்க்கும் தனது முறுக்கு மூசையை இன்னும் முறுக்கிவிட்டபடியே தன்னுடைய நண்பருடன் பேசிக்கொண்டு வந்தார். மீசையை முறுக்கிவிடுவதை/தடவிக் கொள்வதை ஹிந்தியில் "மூச்சோன்கோ தாவ் (dh)தேனா" என்று சொல்வது வழக்கம். தங்களது மீசை மீது பல ஆண்களுக்கு அதீத ப்ரியம் உண்டு! அதனை தடவிக்கொண்டே, முறுக்கிக் கொண்டே தனது பிரதாபங்களை அள்ளிவிடுவதில் கவனம் செலுத்தும் பல வட இந்தியர்களை எனது தில்லி வாழ்க்கையில் சந்தித்து இருக்கிறேன். முதல் வரியில் சொன்னது போல நெய் தடவி மீசை வளர்க்கும் சிலரை கண்டதுண்டு..... 

 

என்னதான் மீசை மீதும் அதைத் தடவுவதிலும் அதீத ஆசையிருந்தாலும், தீணுண்மியின் மூன்றாம் அலை அடித்துக் கொண்டிருக்கும் சமயத்தில் பொது இடங்களில் இப்படி முகக் கவசம் இல்லாமல் இருப்பது அந்த வீரனுக்கு அழகல்லவே என்று எனக்குத் தோன்றியது. தலைநகரில் பெரும்பாலும் முகக் கவசம் அணிந்தே செல்கிறார்கள். தமிழகம் போல தாடைக்குப் போட்டுக் கொள்வதில்லை. மூக்கையும் வாயையும் மூடாமல் தாடைக்குக் கீழே அணிந்து கொள்வதற்கு அணியாமலேயே இருக்கலாம். தில்லியில் பொது இடங்களில் இப்படி இருப்பவர்களிடம் அபராதம் வசூலிப்பதும் உண்டு....

 

சரியாக, அவர் மீசையை முறுக்கிக் கொண்டு இருக்கும்போது மெட்ரோ பணியாளர்கள் இருவரும், CISF காவலர்கள் இருவருமாக வந்தார்கள். அவர்கள் மெட்ரோ இரயிலில் வரும் பறக்கும் படையினர்! மெட்ரோ ஊழியர்களில் ஒருவர் தனது அலைபேசியில் படம் எடுத்து (நிரூபணம்) மீசையை முறுக்கியவரிடம் காண்பித்து முகக் கசவசம் அணியாமல் பயணித்ததற்காக 200/- ரூபாய் அபராதம் என்றார். மீசைக்காரர் இன்னமும் மீசையைத் தடவியபடி அவர்களிடம் விவாதம் செய்ய CISF காவலர்கள் அபராதம் செலுத்த முடியாதெனில் வாருங்கள், அடுத்த நிலையத்தில் இறங்கி ஒரு நாள் முழுக்க சமூகப் பணி செய்யலாம் என்று சொல்ல, மீசை தடவி விழித்தார்! 

 

பெட்டியில் இருந்த அனைத்து கண்களும் அவரை நோக்க, வேறு வழியின்றி 200/- அபராதம் கட்டினார். மெட்ரோ பெண் அலுவலர் POS Machine மூலம் ரசீது தந்து நகர, மீசை தடவி இன்னமும் தடவிக் கொண்டே இருந்தார் - அவர் தடவிக் கொண்டிருந்தது மீசையை அல்ல! தனது முகக் கவசத்தினை - மூக்குக்கு மேல் இருக்கிறதா என தொடர்ந்து மூக்கைத் தடவி உறுதி செய்தவரைப் பார்க்கும்போது கொஞ்சம் பாவமாகவே இருந்தது.... 

 

*****

 

ஃபடாஃபட் டெலிவரி.... - 31 ஜனவரி 2022:

படம்: இணையத்திலிருந்து...

நெய்வேலியில் இருந்தவரை அம்மா, வருடம் ஆரம்பிக்கும்போதே அருகில் இருந்த பண்ருட்டி நகருக்குச் சென்று, அந்த வருடத்திற்கு தேவையான பருப்பு மிளகாய், மல்லி, மிளகு என பல பொருட்களை வாங்கிக்கொண்டு, தூக்க முடியாமல் தூக்கிக் கொண்டு வருவார். தவிர வீட்டு வாசலிலும் சைக்கிளில் மூட்டையாக கொண்டுவரும் வியாபாரிகளிடமும் பேரம் பேசி வருடத்திற்கு தேவையான அளவுக்கு வாங்கி வைப்பார். வாங்கி வைத்து விட்டால் மட்டும் போதாது... வாங்கியதை சுத்தம் செய்வது, வெயிலில் உலர்த்துவது, பூச்சி வராமல் பாதுகாத்து வைப்பது என தொடர்ந்து ஏதேதோ வேலைகள் அவருக்கு இருந்து கொண்டே இருக்கும். புளி மட்டும் வெளியே வாங்கியதில்லை. வீட்டிலேயே மரம் இருந்தது. 

 

பழுத்த புளியை, நான் மரத்தில் ஏறி உலுக்கி விட, அதனை காய வைப்பது, ஓடு எடுப்பது, மீண்டும் காயவைப்பது, அருவாமனையில் கோது, கொட்டை எடுப்பது, மீண்டும் காயவைப்பது, அவற்றையெல்லாம் பீங்கான் ஜாடிகளில் சேர்த்து வைப்பது, அவ்வப்போது எடுத்து மீண்டும் காயவைப்பது என நிறைய வேலைகள் இருக்கும். வருடம் முழுவதற்கும் வாங்கி வைத்து விடுவதால் அவ்வப்போது வாங்கவேண்டிய அவசியம் இருந்ததில்லை. அரிசி கூட மூட்டைகளாக தான் வாங்கி வைப்பார்கள். இப்படியெல்லாம் இருந்த நாட்கள் போய், இப்போது மாதாந்திர கடை சாமான் வாங்கும் அளவிற்கு பலரும் மாறிவிட்டார்கள். இன்னமும் சிலர் நினைத்தபோது இணையவழி வாங்கிக் கொள்வது வழக்கமாகி விட்டது. 

 

அதுவும் சமீப நாட்களில் பெரிய நகரங்களில் Blinkit, Zepto போன்ற செயலிகள் மூலம் தேவையானவற்றை நினைத்த மாத்திரத்தில் சேர்த்து பத்தே நிமிடங்களில் வீட்டு வாசலில் கொண்டு வந்து தந்து விடுகிறார்கள். இப்படியான வசதிகள் அதிகரித்துக்கொண்டே வருவதால் இதனை பயன்படுத்துபவர்களும் அதிகரித்து வருகிறார்கள். ஒருவிதத்தில் சோம்பேறித்தனமாகவே இது தெரிந்தாலும் நிச்சயம் பயனுள்ள வசதி தான். அடுப்பில் பாத்திரத்தை வைத்து சமைக்க ஆரம்பிக்கும் போது, "அடடா உப்பு தீர்ந்து விட்டதே" என்றால் "எடு அலைபேசியை போடு ஆர்டரை!" என தேவையானவற்றை வாங்கி விடுகிறார்கள். 

 

இதிலும் சிலர் தேவையோ இல்லையோ கிடைப்பவற்றை வாங்கி விடுவது உண்டு. அதிலும் லாக் டவுன் சமயங்களில் இந்த செயலிகள் மூலம் வாங்கிக் குவித்த நண்பர்கள் சிலரை நான் அறிவேன். இந்த வசதி இருப்பது நல்லது என்றாலும் அருகில் இருக்கும் சிறு கடைகள் பலவும் கொஞ்சம் கொஞ்சமாக மூடப்படும் நிலை வரலாம். ஏற்கனவே பல சிறுகடைகள் மூடப்பட்டுவிட்டன என்பதும் அதனால் வேறு தொழிலை செய்ய வேண்டிய நிர்பந்தத்திற்கு உள்ளாகி இருக்கிறார்கள் என்பதும் மனதில் நினைவுகொள்ள வேண்டிய விஷயம். விலையில் அதிக வித்தியாசம் இல்லாத பொருட்களை முடிந்தவரை அருகாமையில் உள்ள கடையில் வாங்கலாம். அதிக வித்தியாசம் இருந்தால் எங்கே குறைவாக கிடைக்கிறதோ அங்கே வாங்குவதும் சரிதான். இன்று கூட நானும் Blinkit பயன்படுத்தி சில பொருட்களை வாங்கினேன் - அம்மா பட்ட கஷ்டங்களை நினைத்தபடியே.....

 

*****

 

இந்நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….