குடும்ப மரம் - கர்மா எனும் தொடர் - ஆதி வெங்கட்

  

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட நிழற்பட உலா பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

வெற்றிக்கு எந்த குறுக்கு வழியும் கிடையாது. நாம் தான் நடந்து நடந்து பாதை போட வேண்டும் - டிஸ்ரேலி.

 

******

ஆலம் விழுதுகள் வளர்ந்ததும் தாய் மரத்தை தாங்குவது பற்றி வாசித்திருப்போம். இப்போதைய விழுதுகளான நம் தலைமுறை தாய் மரத்தைப் பற்றி தெரிந்து கொள்ள வேண்டிய சூழலில் இருக்கிறோம்!  நமக்கே தெரியாத போது நமக்கு பின்பு வரும் தலைமுறைகளுக்கும் தெரியப்படுத்த வேண்டிய சூழலும் உருவாகிறது. இதுவே சரியான நேரம்! கூட்டுக் குடும்பங்கள் சிதைந்து போய் விட்டதால் குறுகிய வட்டத்துக்குள்ளேயே வாழப் பழகிவிட்டோம். நம் மூதாதையர்கள் பற்றி நம்மில் எத்தனை பேருக்கு தெரிந்திருக்கிறது!!!

 

சில மாதங்களாக யூட்டியூபில் நான் பார்த்து வந்த வெப் சீரிஸ் தான் எனக்கு இந்த எண்ணத்தை உருவாக்கியது என்று சொல்லலாம். பாம்பே சாணக்யா அவர்களின் இயக்கத்தில் உருவான 'கர்மா' என்ற இந்த தொடரில் 1930 இலிருந்து தற்சமயம் வரையுள்ள தலைமுறைகளை கண்டுபிடிப்பதும், அவர்களின் வாழ்க்கை முறையைப் பற்றி தெரிந்து கொள்வதும் தான் கதை.

அதன் பின்பு தான் என் அப்பாவும் சில வருடங்களுக்கு முன்பு பேப்பரில் இப்படியொரு மரத்தை போட்டு வைத்ததும் நினைவுக்கு வந்தது. அப்பா எப்போதுமே கிரேட் தான் என்று நினைத்துக் கொண்டே அன்றே இதற்கான வேலைகளை துவக்கி விட்டோம். 

 

விளையாட்டு போல ஆரம்பித்த இந்த வேலையில் விவரங்களை நான் சொல்லச் சொல்ல, மகள் அதை கணினியில் பதிவு செய்தாள். அவளுக்கும் இதில் மிகுந்த ஆர்வம் இருந்தது தான் ஆச்சரியம்! யார் யார் எந்தெந்த தலைமுறை என்று அவளுக்கு அத்துப்படியாக தெரிந்து போனது! இது தானே இந்த மரத்தை உருவாக்குவதன் நோக்கம்!

 

சரி! குடும்ப மரம் என்றால் யாரிலிருந்து துவக்குவது? திருமணமான பின் பெண்களுக்கு புகுந்த வீடு தானே குடும்பம்! அப்போது அதில் தான் உருவாக்கணுமா? இன்னொரு வீட்டுக்கு சென்றவர்கள் இந்த மரத்தில் இடம்பெறுவார்களா? என்று பல கேள்விகள் எழலாம்!

 

நான் மூன்று மரங்களை உருவாக்கியிருக்கிறேன். அம்மா வழி! அப்பா வழி! புகுந்த வீட்டு வழி! எனக்குத் தெரிந்த என் பிறந்த வீட்டு இரு வழி தாத்தா பாட்டிகளிலிருந்தும், என் கணவரின் தாத்தா பாட்டியிலிருந்தும் துவக்கியிருக்கிறேன்.  என் அம்மா வழி பாட்டிக்கு 9 குழந்தைகள்! என் கணவரின் பாட்டிக்கு 8 குழந்தைகள்!  ஆக! ஆண், பெண் என்ற பாகுபாடு இல்லாமல் அவர்கள் பெற்ற குழந்தைகள் அனைவரும் இதில் இடம் பெற்றிருக்கிறார்கள். பின்பு அவர்களின் குழந்தைகள் அதையடுத்து அவர்களின் குழந்தைகளாக அனைவரும் இந்த மரத்தில் உள்ளனர்.

 

இப்படியாக அம்மா வழியில் ஆறு தலைமுறைகளும், அப்பா வழியில் நான்கு தலைமுறைகளும், புகுந்த வீட்டு வழியில் ஐந்து தலைமுறைகளும் கண்டறிந்துள்ளேன். பெரும்பாலும் எனக்குத் தெரிந்த தகவல்களும், சிலவற்றை உறவினர்களிடத்தில் கேட்டும் தெரிந்து கொண்டது இதை உருவாக்குவதற்கு பெரிதும் உதவின.

 

இந்த மரத்தை உருவாக்கும் போது நிறைய விஷயங்கள் என்னை ஆச்சரியப்படுத்தியது! நியூமராலஜி, தமிழ்ப் பெயர், மாடலான பெயர் என்ற எந்த குழப்பமும் இல்லை நம் முன்னோர்களிடத்தில்! தாத்தா, பாட்டி பெயர்களைத் தான் மாற்றி மாற்றி பேரன் பேத்திகளுக்கு வைத்துள்ளனர். அதே போன்று பெண்களுக்கான சம உரிமை இல்லாத அந்த காலத்திலும் தன்னுடைய அப்பா, அம்மாவின் பெயரை தன் குழந்தைகளுக்கு வைக்க முடிந்திருக்கிறது என் அம்மா வழி பாட்டியால்!

 

சரி! இந்த மரத்தை இன்னும் விரிவாக்க முடியுமா என்றால் நிச்சயமாக! முன்னோர்களைப் பற்றி உங்களுக்கு கிடைக்கும் ஒவ்வொரு தகவலையும் பதிவு செய்து கொண்டே வாருங்கள். அதே போல் வருங்கால தலைமுறையையும் சேர்த்துக் கொண்டே வரலாம். அதே போல் நம் தாத்தா பாட்டியின் உடன்பிறந்தவர்கள், அவர்கள் வழியில் வந்தவர்கள் என்றும் சேர்க்கலாம். பிறந்த தேதி, திருமண நாள், இறந்த நாள் என்று இந்தத் தகவல்களையும் திரட்டி சேர்க்கலாம். 

 

இது போன்ற மரங்களை உருவாக்குவதன் மூலம் நிச்சயமாக நிறைய விஷயங்களைத் தெரிந்து கொள்ளவும் முடியும்! வருங்காலத் தலைமுறைக்கும் சொல்லவும் முடியும்! தாத்தா பாட்டிகளின் ஏதோ ஒரு குணத்தையோ, முக அமைப்பையோ கொண்டிருக்கும் நாம் அவர்களின் நற்பண்புகள் கொண்ட வாழ்க்கை முறையையும் பின்பற்றுவோம்! 

 

என்ன! நீங்களும் உங்கள் தலைமுறையைத் தேடுகிறீர்களா?

 

*****

 

இந்நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

ஆதி வெங்கட்