காஃபி வித் கிட்டு - 142 - ஓவியம் - ஜீரோ கிலோமீட்டர் - தாம்பூலம் - வலைப்பூ அறிமுகம் - மோண்டா ரே - சத்தமா சொல்லு - பயணங்கள்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட கதம்பம் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

நாம் செய்யும் ஒரு விஷயத்தை சிறந்ததாக்க நம்மால் முடிந்த அளவு உழைப்பைக் கொடுக்க வேண்டும்; முடிந்த அளவு அதை கடைசி வரை கொடுக்க வேண்டும்.

 

******

 

இந்த வாரத்தின் ரசித்த ஓவியம் - பென்சில் ஓவியங்கள் :

 

அலுவலக நண்பர் ஒருவரின் மகள் வரையும் ஓவியங்களை அவ்வப்போது என்னுடன் பகிர்ந்து கொள்வதுண்டு. அப்படி அவர் பகிர்ந்து கொண்டதிலிருந்து இரு பென்சில் ஓவியங்கள் உங்கள் பார்வைக்கு.  

  

******

 

பழைய நினைப்புடா பேராண்டி: ஜீரோ கிலோமீட்டர்

 

2014-ஆம் ஆண்டு இதே நாளில் வெளியிட்ட பதிவு - ஜீரோ கிலோமீட்டர்

 

2014-ஆம் ஆண்டில் இதே நாளில் ஒரு குறும்படம் குறித்த பதிவு வெளியிட்டு இருந்தேன். அந்தப் பதிவிலிருந்து சில வரிகள் இங்கே.  

 

திருப்பூரிலிருந்து சென்னை எத்தனை கிலோமீட்டர் இருக்கும்? உங்களுக்குத் தெரியுமா? எனக்குத் தெரியாது. சரி தெரிந்து கொள்ளலாம் என்றால் இருக்கவே இருக்கிறது கூகிள். தேடிப் பார்த்தேன். இப்படிக் காண்பித்தது கூகிள்.

அதாவது 457.6 கிலோ மீட்டர் தொலைவு. ஆனால் இவ்வளவு தொலைவு கிடையாது வெறும் ”0” கிலோமீட்டர் தான் – நினைத்த நேரத்தில் நீங்கள் திருப்பூரிலிருந்து சென்னைக்குச் சென்று விட முடியும் என்கிறார் Twilight Entertainments Pvt. Ltd. தயாரித்திருக்கும் Zero Kilometers குறும்படத்தில் –.

 

அது எப்படின்னு கேட்கறீங்களா? வாங்க கதைக்குள் பயணிப்போம்.

 

கதையின் நாயகன் உலகநாயகன் தனது நண்பருடன் ஒரு ஜோசியரின் முன் அமர்ந்து இருக்கிறார். உலகத்தையே ஆளும் பெயருடைய உங்களுக்கு பிரச்சனை – அது உங்கள் பூர்வீக சொத்தாக இருக்கும் வீட்டினால் தான் என்று சொல்கிறார் ஜோசியர். ”அதை விற்று விடவா” என்று கேட்கும் நாயகனிடம் ”விற்பது கடினம். முயற்சித்துப் பாருங்களேன்” என்கிறார் ஜோசியர்.

 

ஒரு வட இந்தியரிடம் 12 லட்ச ரூபாய்க்கு தனது பூர்விகமான வீட்டினை விற்றுவிடுகிறார் உலகநாயகன். பிறகு நண்பரும் அவருமாக இருசக்கர வாகனத்தில் பயணம் செய்யும்போது வண்டி வழியில் நிற்க, நண்பர் “வீட்டை விற்றாலும் உன் பிரச்சனை தீரலையே” என்று சொல்கிறார். நின்ற இடத்தில் ஒரு பாழடைந்த வீடு. அதை நோக்கி இயற்கை உபாதையை தீர்த்துக் கொள்ள உலகநாயகன் செல்ல, அந்த வீட்டின் வாசல் நோக்கிச் செல்கிறார்.

 

முழு விஷயமும் தெரிந்து கொள்ள மேலே உள்ள சுட்டி வழி பதிவினை படிக்கலாமே!

 

******

 

இந்த வாரத்தின் எண்ணங்கள் - தாம்பூலம் :

 

நம் ஊரில் திருமணம் போன்ற நிகழ்வுகளுக்கு வருகை தரும் விருந்தினர்களுக்கு தாம்பூலம் தரும் வழக்கம் இருப்பதை நீங்களும் அறிந்திருப்பீர்கள்.  தாம்பூலம் என்றால் பையில் இரண்டு வெற்றிலை, ஒரு பாக்கு பொட்டலம், தேங்காய்/பழம் என ஏதோ ஒன்று மற்றும் சில வீடுகளில் ஒரு லட்டோ அல்லது மிக்ஸர் பாக்கெட்டோ இருக்கும்.  வடக்கிலும் தாம்பூலம் என்ற பெயரில் இல்லாமல் வரும் விருந்தினர்களுக்கு ”மிட்டாய் கா டப்பா” அல்லது Bபாஜி என்ற பெயரில் காரம், இனிப்பு கலந்த பெட்டி கொடுப்பதுண்டு.  சிலர் திருமண அழைப்பிதழ் கொடுக்கும்போதே கொடுத்துவிட, சிலர் திருமணம் முடிந்து விருந்தினர் புறப்படும் போது கொடுப்பார்கள்.  அதற்காகவே அழகான அட்டைப் பெட்டிகள் கடைகளில் கொடுப்பார்கள்.  மொத்தமாக இத்தனை டப்பா, இன்னென்ன பொருட்கள் என சொல்லி விட்டால் அழகாக Pack  செய்து பைகளில் போட்டுக் கொடுத்து விடுவார்கள். பெட்டியில் வைக்கைப்படும் பொருட்களைப் பொருத்து பெட்டியின் விலை 300 ரூபாய் முதல் இரண்டாயிரம் வரை இருக்கலாம்! இதற்கெனவே நிறைய கடைகள் உண்டு - அப்படி ஒரு கடை ”மனோஹர் பிகானேரி”.

 

******

 

இந்த வாரத்தின் வலைப்பூ அறிமுகம் - கோபாலாக்ஷி கோர்ப்புகள் :

 

என் இல்லத்தரசியின் உறவினர் ஒருவர் புதியதாக வலைப்பூவில் எழுத ஆரம்பித்து இருக்கிறார்.  வாட்ஸப் வழி அவ்வப்போது அவரது எழுத்துகளை பகிர்ந்து கொண்டபோது, நீங்களும் எழுதலாமே என்று ஊக்கம் தந்தார்.  எங்கள் பக்கத்திலேயே கூட எழுதலாம் என்று சொல்ல, அவரது நண்பர் வலைப்பூ அவருக்காகவே தொடங்கலாம் என்று சொல்ல அவர் சமீபத்தில் வலைப்பூ ஒன்றை தொடங்கி இருக்கிறார்.  வலைப்பூவின் பெயர் கோபாலாக்ஷி கோர்ப்புகள். அவரது வலைப்பூவில் ஒரு பயணத் தொடர் ஆரம்பித்து இருக்கிறார் என்பதும் மகிழ்ச்சியான விஷயம் - பயணத்தின் முதல் பகுதி இங்கே!

 

அவரது வலைப்பூவை தொடர்ந்து வாசித்து கருத்துகளையும் பகிர்ந்து கொள்ளலாமே நண்பர்களே!

 

******

 

இந்த வாரத்தின் ரசித்த பாடல் - மோண்டா ரே :

 

இசைக்கு மொழி தேவையில்லை என்று சொல்வதுண்டு.  அவ்வப்போது பல மொழியில் இசையைக் கேட்பதுண்டு.  அப்படி சமீபத்தில் கேட்டு ரசித்த ஒரு பாடல் இந்த மோண்டா ரே பாடல்!  நீங்களும் கேட்டு ரசிக்கலாமே! 

 

மேலே உள்ள இணைப்பில் கேட்க இயலவில்லை எனில் இங்கேயும் கேட்டு ரசிக்கலாம்!

 

******

 

இந்த வாரத்தின் ரசித்த நகைச்சுவை - சத்தமா சொல்லு :

 

இந்த வாரத்தின் ரசித்த நகைச்சுவை ஒன்று உங்கள் பார்வைக்கு!

 

*****

 

இந்த வாரத்தின் தகவல் - பயணங்கள்

 

அலுவலகத்தில் ஒரு நண்பர் உண்டு - உத்திராகண்ட் மாநிலத்தினைச் சேர்ந்தவர்.  வருடத்திற்கு ஒன்றிரண்டு பயணமாவது மேற்கொண்டு விடுவார் - பெரும்பாலும் அவரது மாநிலத்தில் உள்ள இடங்களுக்கு தான்.  அதுவும் Trekking செய்யத் தகுந்த இடங்கள்.  கடந்த சில வருடங்களாக சென்று வந்த இடங்களில் எடுத்த படங்கள் பல இவரிடம் உள்ளது.  அவரை எழுதச் சொன்னால், எனக்கு எழுதுவது அவ்வளவு பழக்கம் இல்லை.  அவர் எடுத்த படங்களை என்னிடம் தருவதாகச் சொல்லியதோடு அனுபவங்களைச் சொல்வதாகச் சொல்லி இருக்கிறார்.  விரைவில் அவரது Trekking படங்கள் இந்தத் தளத்தில் வெளிவரும் என்பதை மகிழ்ச்சியுடன் தெரிவித்துக் கொள்கிறேன்.  உத்திராகண்ட் மாநிலத்தில் இருக்கும் கேதார் தால் என்ற இடத்தின் ஒரு படம் மாதிரிக்காக மேலே!

 

*****

 

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….