மால்குடி டேஸ்…. - மலையாள சினிமா

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட முகநூல் இற்றைகள் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

நாம் நமது தேவைகளை மட்டுமே கணக்கில் எடுத்துக் கொள்கிறோமே தவிர, நமது திறன்களைப் பற்றி ஒரு போதும் சிந்திப்பதில்லை - மாவீரன் நெப்போலியன்.

 

******

 

மால்குடி டேஸ் என்று படித்தவுடனேயே உங்களுக்கு திரு ஆர் கே நாராயண் அவர்களின் பிரபலமான புத்தகமும் அதில் வரும் கதாபாத்திரங்களும் நினைவுக்கு வரலாம். முந்தைய தலைமுறையினர் பலரும் படித்து ரசித்த ஒரு புத்தகம் மால்குடி டேஸ். புத்தகமாக படிக்காது போனாலும் தொலைக்காட்சிகளில் தொடராக பார்த்து ரசித்தவர்களும் ஏராளம். என்னைப் போன்று இரண்டையும் செய்தவர்களும் கணக்கிலடங்காதவர்கள். என்றைக்கும் ரசிக்க முடியும் ஒரு சிறந்த ஆக்கம் இந்த மால்குடி டேஸ்….. சரி இன்றைக்கு நாம் பார்க்கப் போவது பற்றி சொல்லி விடுகிறேன் - இதுவும் மால்குடி டேஸ் பற்றியதுதான் ஆனால் புத்தகம் அல்ல…

 

பொதுவாக சினிமா பார்க்கும் அளவுக்கு எனக்கு பொறுமை இல்லை. பத்து பதினைந்து நிமிடங்களுக்கு மேல் இருக்கும் காணொளிகள் பார்க்க அலுப்பு தட்டி விடுகிறது. அதனால் பெரும்பாலும் சின்னச் சின்ன விளம்பரங்கள், குறும்படங்கள், தகவல் கோப்புகள் போன்றவற்றையே தேடித்தேடி பார்ப்பது வழக்கம். அப்படி பார்க்கும் போது ஒன்றரை இரண்டு மணி நேரம் கூட காணொளிகள் பார்ப்பதுண்டு. இரண்டு மணி நேரம் சினிமா பார்ப்பதற்கு பொறுமை இல்லாத நான் அதே இரண்டு மணி நேரம் கிடைத்தால் பல விஷயங்களைச் சொல்லும்  பல காணொளிகளை பார்த்து விடுவேன். ஒரு சில நாட்கள் இதிலிருந்து விட்டு விலகுவதும் உண்டு. 

 

சமீபத்தில் ஒரு மலையாள சினிமா குறித்த அறிமுகம் பார்த்து யூட்யூபில் அந்த சினிமா இருக்கிறதா என தேடிப் பார்க்கும்போது வேறு ஒரு மலையாளப் படத்திற்கான சுட்டி பார்த்தேன். அந்த படம் குறித்து, அதில் காண்பித்து இருக்கும் இடம் குறித்து நிறைய நேர்மறை விமர்சனங்கள் இருக்க, "தேடிய படம் இல்லாவிட்டால் என்ன? கிடைத்த படத்தை பார்க்கலாம்" என பார்க்கத் தொடங்கினேன். அப்படி பார்த்த படம் தான் 2016 ஆம் ஆண்டு வெளிவந்த மால்குடி டேஸ் எனும் திரைப்படம். கதாபாத்திரங்கள் அதிக அளவில் இல்லாமல் சிலரைக் கொண்டு படம் முழுவதும் நகர்த்தி விடுவதில் மலையாள சினிமா கலைஞர்கள் வல்லவர்கள். இந்தத் திரைப்படத்திலும் கூட அப்படித்தான்.

 

God's own country என பெருமையாகச் சொல்லிக் கொள்ளும் கேரளாவின் இடுக்கி பகுதியில் உள்ள ஒரு மலை பிரதேசத்தில் இருக்கும் boarding school. அங்கே படிக்கும் அதீனா மற்றும் மிலன் ஆகிய இரு சிறுவர்கள்…. அதீனாவுக்கு அம்மா மட்டும், மிலனுக்கோ அப்பா மட்டும்! இருவரும் சந்திக்கும் முதல் சந்திப்பே மிக அழகாய் காட்சிப்படுத்தியிருக்கிறார். இருவருக்கும் பெரிதாக நட்பு வட்டம் இல்லை - வேறு ஒருவருடனும் நட்பு பாராட்டாத அதீனாவும் மிலனும்  நட்பு கொள்கிறார்கள். ஒரே வகுப்பு, பள்ளி முடிந்த பின்னும் எப்போதும் ஒன்றாக இருக்கிறார்கள்.

 

அந்தப் பள்ளியின் பின்னே இருக்கும் காட்டுப்பகுதியில், காலில் குண்டடிபட்டு இருக்கும் ஒரு மனிதரை காண்கிறாள் அதீனா. காவல் துறையிலிருந்து தப்பித்துக் கொண்டு இருக்கும் ஒரு சூழ்நிலைக் கைதியாக அந்த கதாப்பாத்திரம் (அனூப் குமார்). அதீனாவும் மிலனும் அவருக்கு அவ்வப்போது தண்ணீரும் உணவும் கொண்டு தருகிறார்கள் -  மற்றவர்களுக்கு தெரியாத படி! குழந்தைகளுக்கு அவர் மீது பாசமும் வளர்கிறது. அந்த நபரின் கதை என்ன, அவரை ஏன் காவல்துறை துரத்துகிறது போன்ற விஷயங்களையும் கொஞ்சம் கொஞ்சமாக பார்ப்பவர்களுக்கு சொல்கிறார்கள். அழகான வாழ்க்கை வாழ்ந்த அந்த நபர் ஒரு ஓவியர், உதவி செய்யப்போய் உபத்திரவத்தில் மாட்டிக்கொண்ட சம்பவங்களை பார்க்கப் பார்க்க மனதில் நமக்கும் வலி. 

 

இதற்கிடையே, ஒரு சமயம் பள்ளியில் விடுமுறை. குழந்தைகள்  எல்லோரையும் பெற்றோரிடம் ஒப்படைக்க பேருந்துகளில் அழைத்துச் செல்லும் சமயத்தில், அதீனாவும், மிலனும் மட்டும் தவறுதலாக உள்ளேயே தங்கிவிட பள்ளியில் உள்ளே வைத்து பூட்டி விடுகிறார்கள். பாதுகாப்பிற்கு இருந்த இருவரும் வெளியே சுற்றச் சென்றுவிட குழந்தைகள் உள்ளே தவிக்கிறார்கள். எவ்வளவு கதறினாலும் அவர்களை காப்பாற்ற யாரும் இல்லை. மலையடிவாரத்தில் அனைத்து குழந்தைகளும் அவரவர் பெற்றோரிடத்தில் சேர இந்த இரு குழந்தைகளுக்கான காத்திருக்கும் அப்பா அம்மாவிற்கு அதிர்ச்சி. பேருந்தில் குழந்தைகள் ஏறிக்கொண்டதை உறுதி செய்யும் ஆசிரியர், அவர்கள் இருவரும் இறங்கும்போது இல்லாததைக் கண்டு அதிர்ச்சி அடைகிறார்.

 

பிறகு என்ன நடந்தது? குழந்தைகள் தப்பித்தார்களா? காவல் துறையினர் தேடும் நபர் என்னவானார், போன்ற பல விஷயங்களை படம் பார்த்து நீங்களும் தெரிந்து கொள்ளலாம். அற்புதமான படம். கேரளாவின் இடுக்கி பகுதியை மிக அழகாக படம்பிடித்து காண்பித்திருக்கிறார்கள். கூடவே படம் சொல்லும் விஷயமும் சிறப்பான ஒன்று. எதார்த்தம் சொல்லும் படம். படம் மிகவும் பிடித்திருந்தது என்று சொன்னாலும் ஒரே ஒரு விஷயம் மட்டும் எனக்கு பிடிக்கவில்லை - அது என்ன என்றால் படத்தில் ஒரு கதாபாத்திரத்தை தமிழராக காண்பித்திருப்பது…..  வேற்று மாநிலத்தவரை இப்படிக் காண்பிப்பது நமது தமிழ்  சினிமாக்களிலும் உண்டு என்றாலும் இப்படிச் செய்வது தவறுதான். நல்ல சினிமா எடுக்கும்போது இப்படிக் காண்பித்து இருக்க வேண்டிய அவசியம் இல்லை என்றே தோன்றுகிறது. 

 

முழுக்கதையையும் இங்கேயே சொல்லிவிட்டால் உங்களுக்கு என்ன சுவாரசியம் இருக்கப்போகிறது? அதனால் நீங்களே பார்த்து ரசிக்கலாமே. யூட்யூபில் இந்த படம் இருக்கிறது மால்குடி டேஸ் மலையாளம் என்று தேடிப்பார்த்து, படத்தினை பார்த்து ரசிக்கலாமே.

 

*****

 

இந்நாளின் பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….