மயிலங்கி மங்கையின் மரகதப் பெட்டி! வாசிப்பனுபவம் - ஆதி வெங்கட்

  

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

ஆதாயம் இல்லாதபோது தூக்கி எறியப்படுவதை விடுதலையாக நினைத்துக் கொள்! இப்போது நீ அடிமை இல்லையென பெருமை கொள்.

 

******

 

பெண்ணாசை, பொன்னாசை, மண்ணாசை இவை மூன்றும் மனிதனை உயர்த்தியதாக எந்த சரித்திரமும் இல்லை! இப்படியிருக்க பெரும் சாம்ராஜ்யங்களும், சமஸ்தானங்களும்  கூட சரிந்து போன வரலாறின் பின்னணியில் இவை மூன்றும் தான் உள்ளன.

 

'காலச்சக்கரம்' நரசிம்மா சாரின் புத்தகங்கள் ஒவ்வொன்றும் நம் சரித்திரத்தை திரும்பிப் பார்க்க வைக்கும் விதமாய் அமைந்திருக்கும். உடனிருந்து பார்த்தது போல்  அத்தனை நுணுக்கமான தகவல்கள் இடம் பெற்றிருக்கும்! அந்த வரிசையில் மயிலங்கி மங்கையின் மரகதப் பெட்டியை சமீபத்தில் வாசிக்கும் வாய்ப்பு கிடைத்தது. வாசிக்க ஆரம்பித்தால் இடையில் நிறுத்த இயலாத வண்ணம் அவ்வளவு சுவாரஸ்யமாக அமைத்திருக்கிறார்.

 

மயிலங்கி சமஸ்தானத்தின் இளவரசியான அலர் மேல் மங்காவின் தந்தை தங்களுக்குச் சொந்தமான பொக்கிஷங்களை அன்னிய  படையெடுப்பிலிருந்து காப்பதற்காக  ஓரிடத்தில் பத்திரப்படுத்துகிறார். அதை ஓலைச்சுவடியில் குறிப்பாக எழுதியும் வைக்கிறார். அதன் பின் அவர் மறைந்தும் விடுகிறார்.

 

பொக்கிஷத்தைப் பற்றிய குறிப்புகள் புரிபடாத சூழலில் அந்த பொக்கிஷத்தை அடைவதற்காக நாலாப் புறமிருந்தும் பல வித முயற்சிகளும், சூழ்ச்சிகளும் நடைபெறுகிறது. இத்தனை போராட்டங்களுக்குப் பின்னும் மங்காவால் பொக்கிஷத்தை காப்பாற்ற முடிகிறதா! என்பது தான் கதை.

 

மங்காவின் வீரமும், மதிநுட்பமும், திடமும் வியக்க வைக்கிறது! ஒவ்வொரு பெண்ணும் இவளைப் போல இருந்து விட்டால் நிச்சயமாக பெண்ணுக்கு எந்த கெடுதலும் வராது என்பது உறுதி! எதற்குமே அஞ்சவில்லை இவள்! இவளைப் போல இன்னும் சிலரும் இந்த சரித்திரத்தில் இடம் பெற்றிருக்கிறார்கள். இக்கால பெண்களுக்கு இவர்கள் அனைவரும் உதாரணமாக விளங்குகின்றனர்.

 

புதையலுக்கும், பொக்கிஷத்திற்கும் உள்ள வேறுபாடு! பெண்கள் அணிந்து கொள்ளும் ஒவ்வொரு ஆபரணத்திற்கும் என்னென்ன குணாதிசயங்கள்! மைசூர் தசரா விழா உருவானதன் பின்னணி என்று பல தகவல்கள் இந்த சரித்திரத்தில் கொட்டிக் கிடக்கின்றன.

 

#Bynge App ல் வாசித்த இந்த சரித்திரம் இப்போது வானதி பதிப்பகம் அச்சு நூலாகவும் வெளியிட்டு இருக்கிறது. வாய்ப்புக் கிடைத்தால் நிச்சயம் வாசித்துப் பாருங்களேன்.

 

*****

 

இன்றைய பதிவு குறித்த தங்களது எண்ணங்களை பின்னூட்டத்தில் பகிர்ந்து கொள்ளுங்களேன். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

ஆதி வெங்கட்