கேதார் தால், உத்திராகண்ட் - மலையேற்றம் - பயணம் - ப்ரேம் Bபிஷ்ட் - பகுதி நான்கு

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட யாரிவள் பகுதி மூன்று பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

நிறுத்தவும் முடியாமல் தொடரவும் முடியாமல் சில தேடல்கள்… நெருங்கவும் முடியாமல் விலகவும் முடியாமல் சில உறவுகள்… சொல்லவும் முடியாமல் கொல்லவும் முடியாமல் சில ஆசைகள்… மறக்கவும் முடியாமல் வெறுக்கவும் முடியாமல் சில நினைவுகள்… இது தான் பலரது வாழ்க்கை!

 

******

 

கேதார் தால் மலையேற்றம் குறித்து, நண்பர் ப்ரேம் Bபிஷ்ட் அவர்களது அனுபவங்களின் முதல், இரண்டாம் மற்றும் மூன்றாம் பகுதிகளை நீங்கள் படித்து ரசித்திருப்பீர்கள் என நம்புகிறேன். இதோ இந்த நாளில் தொடரின் நான்காம் பகுதி! அவரது அனுபவங்களை இங்கே பகிர்ந்து கொள்ள ஒப்புதல் அளித்த நண்பர் ப்ரேம் அவர்களுக்கு மனம் நிறைந்த நன்றி - ஓவர் டு ப்ரேம் ஜி!

 

******

 

நான்காம் நாள் - போஜ் கரக் - கேதார் கரக் (5 கிலோ மீட்டர்) - மலையேற்றம்

 

எங்கள் பயணத்தின் நான்காம் நாள், நாங்கள் அதிகாலையில் எழுந்து விட்டோம்.  ஆனால் அன்றைய தினம் எங்கள் பயணத்தினை தொடர்ந்து மேற்கொள்வதில் ஒரு சிறு சிக்கல் உண்டானது.  நாங்கள் எங்களுடன் கொண்டு சென்றிருந்த அடுப்பு வேலை செய்யவில்லை.  அதனால் காலை உணவு சமைப்பதில் தடங்கல்! உணவில்லாமல் பயணிக்க முடியாது என்பதால் இந்தச் சிக்கல், எங்கள் மேல்நோக்கிய பயணத்தை தாமதப்படுத்தியது. ஆனால் மேற்கு வங்கத்திலிருந்து வந்திருந்த, சென்ற பகுதியில் குறிப்பிட்ட மலையேற்றக் குழு, அந்த நாளில் கங்கோத்ரி நோக்கி பயணப்பட இருந்ததால், அவர்கள் வைத்திருந்த அடுப்பினை எங்களுக்குத் தர சம்மதித்தனர் - ஒரு சிறு தொகையை பெற்றுக் கொண்ட பிறகு தான்! அந்த நேரத்தில் அது எங்களுக்கு மிகவும் உதவியாக இருந்தது. அங்கே தேநீர் மற்றும் சூப் அருந்திய பிறகு எங்கள் கூடாரங்களை மடித்து மற்றும் பைகளை தயார் செய்து, எங்கள் அடுத்த இலக்கான கேதார் கரக் (Kedar Kharak) நோக்கி காலை 8.00 மணியளவில் புறப்பட்டோம்.

போஜ் கரக் பகுதியிலிருந்து கேதார் கரக் நோக்கி...

Bபோஜ் மரங்கள் அர்ந்த பாதை வழியாக சுமார் ஒரு கிலோ மீட்டர் ஆரம்ப மலையேற்றத்திற்குப் பிறகு, நாங்கள் ஒரு புல்வெளிப் பிரதேசத்தை வந்தடைந்தோம்.  மழை இல்லாத காரணத்தால் புல்வெளி வறண்டே இருந்தது.  அந்தப் பகுதிக்குப் பிறகு மரங்களற்ற மலைப்பகுதிகள் வழியே எங்கள் மலையேற்றம் தொடர்ந்தது.  அந்தப் பகுதியிலிருந்து எங்களால்  கம்பீரமான பனி மூடிய பிருகுபந்த் (Bhrigupant) சிகரத்தை பின்னணியில் காணமுடிந்தது.  அந்த மலைச் சிகரத்தின் அடிப்பகுதியில் தான் எங்களின் இறுதி இலக்கான புகழ்பெற்ற கேதார் ஏரி (Kedar Taal) அமைந்துள்ளது.

தலய்சாகர் சிகரம்...

 

வழியில் சில நீர் நிலைகளைக் கடந்த பிறகு சேறும் சகதியுமாக இருந்த நிலப் பகுதி வழியே செங்குத்தான பாதையில் கீழ் நோக்கிய எங்கள் பயணத்தினை தொடங்கினோம்.  மிகவும் சிரமமான மற்றும் ஆபத்தான பாதையாக இருந்தது.  கொஞ்சம் தடுமாறினாலும், அந்தப் பாதையில் வழுக்கி கீழே உறைந்த நிலையில் இருக்கும் கேதார் ஏரிப் பகுதியில் விழுந்து விட வாய்ப்பு இருந்தது.  அங்கிருந்து பார்க்கக் கிடைத்த கேதார் ஏரி பிரமிக்க வைக்கும் அழகுடன் இருந்தது.  அழகான ஆபத்து என்று கூட சொல்லலாம்! 

கேதார் கங்கா நோக்கிய மலை இறக்கத்தில்...

 

2013-ஆம் ஆண்டின் ஜூன் மாதம் உத்திராகண்ட் மாநிலத்தின் Gகட்வால் (Garhwal) பகுதியில் ஏற்பட்ட அதீத மழை காரணமாக ஏற்பட்ட பேரழிவின் முன்னர் கேதார் கரக் மலையேற்றம் கொஞ்சம் சுலபமாகவே இருந்தது.  ஆனால் அந்த அதீத மழையின் பேரழவிற்குப் பிறகு மலையேற்றம் கடினமானதாகவும் ஆபத்தானதாகவும் மாறிவிட்டது.  ஆனாலும், மிகுந்த எச்சரிக்கையுடன் உறைந்து கிடந்த கேதார் கங்காவின் வழியில் பயணித்து எங்களால் எங்கள் இலக்கினை நோக்கி முன்னேற முடிந்தது.  கொஞ்சம் தவறினாலும் எங்களுக்கு நிறைய தொல்லைகள் வந்திருக்கும் என்பதை இப்போது நினைத்தாலும் உடல் சிலிர்த்துப் போகிறது. 

உறைந்து கிடக்கும் கேதார் கங்கா...

கேதார் கங்கா Glasier-ஐ கடந்த போது...

 

இந்த இடங்களில் கேதார் கங்கா ஏரியைக் கடப்பதோடு, பெரிய பெரிய பாறைகளின் மீதும் ஏறி அவற்றைக் கடந்து செல்ல வேண்டியிருக்கும்.  அந்தப் பெரிய பாறைகளின் மீது பனி அடர்ந்து படந்திருப்பது இன்னும் அதிகமான ஆபத்தை உண்டாக்கக் கூடியது என்பதை நாம் நினைவில் வைத்துக் கொள்ள வேண்டும்.  அது மட்டுமல்லாது மேலே உள்ள மலைச் சிகரங்களில் நிறைய மண்ணும் கற்களும் கலந்து இருக்க, அவற்றின் மீது கால் பதித்துச் செல்லும் Bபரல் என உள்ளூர் மொழியில் அழைக்கப்படும் விலங்கினங்கள் நடக்கும்போது பாறைகளும் மண்ணும் கலந்து கீழே விழ, அவை நம் மீது விழுந்து விடாமல் கடப்பது சவாலான விஷயமாக இருந்தது.  ஆனாலும் இன்றைய நாளின் முதல் ஒரு மணி நேர மலை ஏற்றம் மற்றும் நாங்கள் எதிர்கொண்ட ஆபத்தான தளர்வான சேற்று நிலப்பரப்பு ஆகியவை தவிர, முந்தைய நாள் போஜ் கரக் மலையேற்றத்துடன் ஒப்பிடுகையில், இன்றைய கேதார் கரக் மலையேற்றம் எளிதானது என்றே சொல்ல வேண்டும்.

Bபரல் கூட்டம்....

 

மதியம் 12.00 மணிக்கு நாங்கள் எங்கள் இலக்கை அடைந்து, அருகில் தண்ணீர் கிடைக்கும் இடத்தினைத் தேர்ந்தெடுத்து, அன்றைய தினம் தங்குவதற்கு எங்கள் முகாமை அமைத்தோம்.  நாங்கள் மதிய உணவுக்கு உணவு தயாரித்துக் கொண்டிருந்தபோது, அருகில் ஒரு Bபரல் மந்தையை நாங்கள் பார்க்க முடிந்தது. அவை எங்களிடமிருந்து ஒரு பாதுகாப்பான தூரத்தை பராமரித்தன.   சுமார் மூன்று மணி நேரம் வரை அங்கேயே இருந்தன.  எங்கள் இருப்பினை அவை கண்டுகொள்ளதாகத் தெரியவில்லை - ஒருவேளை அவை எங்களிடையே பாதுகாப்பாக உணர்ந்திருக்கலாம் அல்லது நாங்கள் ஏதேனும் உணவு தருவோம் என்று நினைத்ததோ - அவையே அறியும்! எந்த பயமுமின்றி அவை அங்கே சுற்றிக் கொண்டிருக்க, அவற்றை எங்கள் கேமராக்கள் மூலம் அவற்றின் படங்களை எடுத்துக் கொள்ள போதிய அவகாசம் எங்களுக்குக் கிடைத்தது.

 

மாலை நெருங்க நெருங்க தட்பவெப்பம் குறைந்து குளிர் காற்று அடிக்க, நாங்கள் எங்கள் தலைக்கு குரங்கு தொப்பியை அணிந்து கொண்டோம்.  பிறகு நாங்கள் காய்கறி சூப் / தேநீர் போன்ற திரவ உணவை உண்டு இரவு தூக்கத்திற்காக நாங்கள் அமைத்த கூடாரத்தில் நுழைந்து உறங்கினோம்.  அடுத்த நாள் எப்படி இருந்தது, என்ன செய்தோம் போன்ற தகவல்களை அடுத்த பகுதியில் சொல்கிறேன்.   தொடர்ந்து மலையேற்றத்தில் எங்களுடன் வருவதற்கு வேண்டுகிறேன். 

 

ப்ரேம் Bபிஷ்ட்

 

******

 

நண்பர் ப்ரேம் அவர்களின் அனுபவங்கள் உங்களுக்கும் பிடித்திருக்கலாம்.  பதிவு வழி பகிர்ந்து கொண்ட விஷயங்கள் குறித்த தங்களது கருத்துகளை பின்னூட்டம் வாயிலாக பகிர்ந்து கொள்ளலாமே!  விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….