யாரிவள் - தொடர் - ஆதி வெங்கட் - பகுதி ஒன்பது

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி. நேற்றைய பதிவினை படிக்காதவர்கள் இந்தச் சுட்டி வழி படிக்கலாமே! இந்த நாளை நல்லதொரு வாசகத்துடன் தொடங்கலாம் வாருங்கள். 

 

உதிக்கும்போதும் மறையும்போதும் ரசிக்கும் உலகம்… உச்சிக்கு வந்தால் திட்டித் தீர்க்கும். சூரியனை மட்டுமல்ல! மனிதனின் வளர்ச்சியையும் கூட!

 

******

 

யாரிவள் - பகுதி ஒன்று இங்கே! பகுதி இரண்டு இங்கே! 

பகுதி மூன்று இங்கே!  பகுதி நான்கு இங்கே! 

பகுதி ஐந்து இங்கே! பகுதி ஆறு இங்கே!

பகுதி ஏழு இங்கே! பகுதி எட்டு இங்கே!

 

யாரிவள்! பகுதி ஒன்பது

 

குழந்தைகளுக்கும் தன்னைப் பற்றிய சிந்தனைகள் நிறைய இருக்கும். இப்படியெல்லாம் இருக்கணும்! இது போல் எல்லாம் நடக்கணும்! என்று மனதுக்குள் ஓடிக் கொண்டே தான் இருக்கும்! அதை கால ஓட்டத்தில் மாற்றிக் கொள்ளவும் செய்யலாம்! விடாப்பிடியாக மனதில் வைத்துக் கொள்ளவும் செய்யலாம்.

 

சுட்டிப்பெண்ணின் அம்மா ஒரு இல்லத்தரசி என்று மட்டும் சொல்லியிருந்தேன். பள்ளிப்படிப்பை முடிக்காவிட்டாலும் அவள் தன்னால் முடிந்த உழைப்பைத் தந்து குடும்பத்தை முன்னேற்றணும் என்று  எப்போதும் சிந்தித்துக் கொண்டிருப்பாள்!  இரும்பு மனுஷி! அதற்கேற்றாற்  போல் நிறைய வேலைகளும் செய்திருக்கிறாள். அதை பற்றியெல்லாம் அப்புறம் சொல்கிறேன்!

 

அப்படித்தான் அவளின் சிந்தனையில் ஒன்றாக சில மாதங்கள் பஞ்சாலையில் வேலைக்குச் சென்றாள். கிடைக்கும் வருமானம் குழந்தைகளின் படிப்புக்கு உதவிகரமாக இருக்கும் என நினைத்து சென்று கொண்டிருந்தாள். அங்கு ஷிஃப்ட் முறையில் தான் பணிக்குச் சென்று கொண்டிருந்தாள். உடலின் உஷ்ணத்தை குறைக்க அங்கு வாராவாரம் எல்லோருக்கும் கருப்பட்டி கொடுத்து விடுவார்கள்!

 

அம்மா வேலைக்குச் சென்ற போது குழந்தைகளை அப்பா கூடுதல் கவனிப்புடன் பார்த்துக் கொண்டார். இவள் மூன்றாம் வகுப்பிலும், தம்பி ஒன்றாம் வகுப்பிலும் படித்து வந்தனர். அப்பாவுக்கு சமையல் அறவே தெரியாது! அம்மா ஷிஃப்ட்டுக்கு செல்வதற்கு முன் எல்லாம் செய்து வைத்து விட்டுத்தான் செல்வாள்!

 

அப்பா தான் குழந்தைகளை குளிப்பாட்டி விட்டு பள்ளிக்கு தயார் செய்து கொண்டு விடுவார். அப்போது இவளுக்கு நல்ல அடர்த்தியாகவும், இடுப்பு வரையிலும் நீளமான தலைமுடி இருந்தது. அதை அப்பா தான் அலசி விட்டு பராமரிக்க  வேண்டிய சூழல். அப்பா வாரம் ஒருமுறை தனக்கு தெரிந்த விதத்தில் ஆண்கள் தலையைப் போல் இப்படியும் அப்படியுமாக தேய்த்து அலசி விடுவார்!

 

அதை ஒழுங்காக தேய்த்து அலசி விடாது போனதாலோ, சரியாக உலர வைக்காததாலோ சுட்டிப்பெண்ணின் தலை முழுவதும் அடை அடையாக புண்கள் வந்துவிட்டது! என்ன செய்வது என்று தெரியவில்லை! தோல் சம்பந்தப்பட்ட மருத்துவரிடம் சென்ற போது தலைமுடி முழுவதும் எடுத்தால் தான் மருந்தைப் போட முடியும்! அப்போது தான் குணமாகும் என்று சொல்லி விட்டார்!

 

சுட்டிப்பெண்ணுக்கு தன் தலைமுடியின் மேல் அத்தனை ஆசை! நீண்ட பின்னல் கொண்டவர்களை மிகவும் ரசிப்பாள்! தனக்கும் அப்படி வளரணும் என்று ஆசையோடு காத்திருப்பாள்! இந்த சூழ்நிலையில் என்ன செய்தாள்! என்று அப்புறம் பார்க்கலாம்!

 

*****

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

ஆதி வெங்கட்