ஆதி மஹோத்சவ் 2024 - நிழற்பட உலா - பகுதி ஒன்று

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட காஃபி வித் கிட்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

நேற்றைய காஃபி வித் கிட்டு பதிவில் சொல்லியிருந்தது போல குளிர்காலம் வந்துவிட்டால் தலைநகர் தில்லியில் பல நிகழ்வுகள் நடத்துவதை வழக்கமாக வைத்திருக்கிறார்கள். மத்திய அமைச்சகங்கள், தில்லி அரசு என பல துறைகளும் இப்படியான கண்காட்சிகள், மேளாக்கள், நடன நிகழ்ச்சிகள் என தில்லியில் இருக்கும் பல இடங்களில் நடத்துவார்கள். இப்படியான நிகழ்வுகள் நடக்கும் இடங்கள் தில்லியின் பிரதான பகுதிகளில் தான் - அதுவும் குறிப்பாக புது தில்லி பகுதியில் தான் நடக்கும் என்பதால் சனி-ஞாயிறு போன்ற விடுமுறை நாட்களிலோ அல்லது வார நாட்களில் அலுவலக நேரத்திற்குப் பிறகோ அது போன்ற நிகழ்வுகளுக்குச் சென்று விடுவது வழக்கம்.  பல புதிய அனுபவங்கள், தகவல்கள், சந்திப்புகள் போன்ற விஷயங்களைத் தருகின்ற நிகழ்வுகளாக இவை இருக்கின்றன.  முடிந்தவரை இது போன்ற நிகழ்வுகளுக்குச் சென்று விடுவதை வழக்கமாக வைத்திருக்கிறேன். சனி-ஞாயிறு பொழுதும் நல்லபடியாக இருக்கும், மேலதிகத் தகவல்கள் சிலவற்றையும் நம்மால் பெறமுடியும் என்பதும் நல்லதல்லவா.  

தலைநகரில் தற்போது இந்த வருடத்திற்கான ”ஆதி மஹோத்சவ்” இந்தியா கேட் பகுதியில் இருக்கும் Major Dhyan Chand Stadium (முந்தைய பெயர் National Stadium) உள்ளே நடந்து கொண்டிருக்கிறது (10 - 18 ஃபிப்ரவரி 2024). காலை 11 மணிக்கு ஆரம்பித்து இரவு 8 மணி வரை இந்த நிகழ்வுகளை வருகையாளர்கள் பார்க்க முடியும்.  இந்தியாவின் பல பகுதிகளில் இருக்கும் ஆதிவாசி சமூகத்தினைச் சேர்ந்தவர்கள் தங்களது தயாரிப்புகள், ஓவியங்கள், உடைகள், கைவினைப் பொருட்கள் என இங்கே விற்பனைக்கு வைத்திருக்கிறார்கள்.  இதைத் தவிர ஆதிவாசிகள் உண்ணும் உணவு வகைகளும் நாம் காசு கொடுத்து சுவைக்க ஏதுவாக சில வசதிகளையும் செய்திருக்கிறார்கள்.  இதைத் தவிர ஆதிவாசிகளின் நடனங்களையும் வரும் அனைத்து மக்களும் பார்க்க வசதிகள் உண்டு.  இந்த நிகழ்வுக்கு நுழைவுக்கட்டணம் ஏதும் வசூல் செய்வதில்லை என்பது கூடுதல் தகவல்.  இதற்கு முந்தைய வருடங்களிலும் ஆதி மஹோத்சவ் நிகழ்வுகள் நடந்தது - அதற்குச் சென்று வந்தது குறித்து பதிவுகளும் எழுதி இருக்கிறேன்.  இந்த வருடம் அலுவலக நண்பர்கள் மூன்று பேர் சேர்ந்து சென்ற போது எடுத்த சில படங்கள் உங்கள் பார்வைக்கு - இந்த ஞாயிறும் வரும் சில வார ஞாயிறுகளிலும் நிழற்பட உலா உண்டு! இதைத் தவிர இங்கே சென்று வந்தபோது கிடைத்த சில அனுபவங்கள் தனிப்பதிவுகளாகவும் வெளியிட எண்ணம் உண்டு என்பதை முன்னெச்சரிக்கையாக சொல்லிவிடுகிறேன். வாருங்கள் சில நிழற்படங்களைப் பார்க்கலாம்! படங்கள் நிகழ்வுக்குச் சென்ற மூன்று பேரும் அலைபேசிகளில் எடுத்த படங்கள்.

புல் வகையொன்றில் செய்த கூடைகள்...

Gகோண்ட் ஓவியம் ஒன்று...

கருப்பு வெள்ளயிலும் அழகோவியம்...

நெல்மணிகள் கொண்டு தயாரிக்கப்படும் விநாயகப்பெருமான்...

நெல்மணிகள் கொண்டு பொம்மைகள் தயாரிக்கும் பெண்மணியும் அவரது கைவண்ணத்தில் உருவான பொம்மைகளும்...

மேலும் கீழும் திருப்பினால் மழையின் ஒலியைத் தரும் மூங்கில் அமைப்பு

அம்புவிடும் முயற்சி...

காதலர் தின அம்பல்ல!

Dokra Art வகையில் ஒரு நந்தி...

ஆதிவாசிகள் அணியும் Halsi எனும் கழுத்தணியுடன்...

கர்நாடகத்தின் ஆதிவாசி நடனம் ஒன்று...

உல்லன் கொண்டு செய்த ஹனுமான் ஜி!

சுரைக்காயில் வடிவமைக்கப்பட்ட விளக்குக்கான Shade...

பயமுறுத்துகிறாரோ முட்டைக்கண்ணன்...

Wall hanging வகையில் சில...

ஒட்டகமும் யானையும் கண்களைக்கவரும் விதத்தில்...

ஒடிசாவின் ரகுராஜ்பூர் படசித்ரா - பூரி ஜெகந்நாதர்...

இன்னுமொரு படசித்ரா - இராமாயணக் கதை முழுவதும் ஓவியமாக...

இந்த ஓவியத்தின் விலை - கொஞ்சமே தான் - இரண்டு லட்சம்...

ஓவியர் இந்த அழகிய ஓவியத்தினை வரைய எடுத்துக்கொண்ட நேரம் ஒரு வருடம்!

Wall hanging வகையில் சில...

Lac எனப்படும் மெழுகு கொண்டு தயாரிக்கப்பட்ட சிற்பங்கள்...

இன்னுமொரு ஓவியம்

இந்த நிகழ்வில் எடுத்த மேலும் சில படங்கள் அடுத்த ஞாயிறன்று அடுத்த பகுதியாக வெளியிடுகிறேன். 

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…