இயற்கை அன்னையின் மடியில் - காலை உணவு - பகுதி மூன்று

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

 

இதற்கு முன்னர் வெளியிட்ட காஃபி வித் கிட்டு பதிவினை  படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

 

இத்தொடரில் இதுவரை இரண்டு பகுதிகள் வெளியிட்டு இருக்கிறேன். அந்தப் பகுதிகளை நீங்கள் இதுவரை படிக்கவில்லை என்றால் கீழே உள்ள சுட்டிகள் வழி படித்துவிடலாம். படித்துப் பாருங்களேன்.  

 

இயற்கை அன்னையின் மடியில் - எங்கே அடுத்த சுற்றுலா - பகுதி ஒன்று

 

இயற்கை அன்னையின் மடியில் - லான்ஸ்(d)டௌன் - பகுதி இரண்டு

 

தொடர்ந்து இந்தப் பயணம் குறித்து பார்க்கலாம் வாருங்கள். 

தேநீர் அருந்திய உணவகத்தின் வெளியே…

நானும் நண்பர் சுப்பிரமணியனும்…

நண்பர்கள் குழாம்…

தேநீர் அருந்திய உணவகம் வெளியே… 

பனிமூட்டத்தில் சூரியன்…

அடர்ந்த பனிமூட்டத்தில் எங்கள் பயணம் தொடர்ந்து கொண்டிருந்தது. NH 58 நெடுஞ்சாலை வழி பயணித்து, ஓட்டுனர் காலை உணவு சாப்பிடுவதற்காக நிறுத்திய இடம் மீரட் புறவழிச் சாலையில் அமைந்திருக்கும் SHIVA TOURIST DHABA (முகவரி: Meerut Bypass Road, NH 58, Partapur, Meerut, Uttar Pradesh 250103). அப்போது நேரம் காலை 07.05!  அந்த காலை நேரத்திலேயே காலை உணவைச் சாப்பிடுவது சரியாக இருக்காது என்பதால் நாங்கள் தேனீர் மட்டுமே அங்கே சாப்பிட்டோம்.  ஓட்டுனர் மட்டும் அங்கே காலை உணவு சாப்பிட்டு வந்தார்.  அந்த இடத்தில் நிறையவே பயணிகள் தங்கள் வாகனங்களை நிறுத்தி இளைப்பாறிக் கொண்டும், தேநீர் அருந்திக்கொண்டும் இருந்ததோடு, சில பல நிழற்படங்களையும் எடுத்துக் கொண்டு இருந்தார்கள்.  நாங்களும் அங்கே சில நிழற்படங்களை எடுத்துக் கொண்டோம்.  சூரியன் உதித்து சில நிமிடங்கள் ஆனதால் செம்பிழம்பாக காட்சி அளித்த சூரியன் மனதைக் கவர்ந்தான்.  சுமார் 30 நிமிடங்கள் அந்த இடத்தில் செலவழித்த பிறகு நாங்கள் எங்கள் பயணத்தினை தொடர்ந்தோம்.

 

காலை உணவு:

காலை உணவு சாப்பிட்ட உணவகம்…

தயாராகும் பராட்டா…

சப்ஜிகள் வைக்கும் பாத்திரங்கள்…

காலிஃபிளவர் தோட்டம்…

முள்ளங்கித் தோட்டம் ஒன்றில் நான்…

 

மீரட் பகுதியில் முதல் நிறுத்தத்தினைத் தொடர்ந்து சுமார் 105 கிலோமீட்டர் தொலைவினை மோசமான சாலை வழி கதோலி (Khatauli), மீராபூர் (Mirapur), பிஜ்னோர் (Bijnor) ஆகிய இடங்களைக் கடந்து பயணித்த பிறகு கீரத்பூர் (Kiratpur) எனும் இடத்தில் இருந்த Shakti Fuel Point எனும் Bharat Petroleum Outlet அருகே இருந்த வைஷ்ணவ் போஜனாலய் எனும் சிறு உணவகத்தில் காலை உணவிற்காக வண்டியை நிறுத்தினோம்.  உணவகத்தில் யாருமே இல்லை! அப்போது தான் தந்தூர் என்று சொல்லக்கூடிய அடுப்பினை பெரிய பெரிய விறகுகள் போட்டு தயார் செய்து கொண்டிருந்தார்கள்.  அந்த நேரத்தில் சில வகை பராட்டாக்கள் மட்டுமே கிடைக்கும் என்றும் சில நிமிடங்களில் தயார் செய்து தந்து விடுவேன் என்றும் அங்கே இருந்த உரிமையாளர்/சிப்பந்தி சொல்ல, சரி என அங்கே காத்திருந்தோம்.  காத்திருந்த வேளையில் அருகே இருந்த வயல்வெளிகளைச் சுற்றிப் பார்த்து வரலாம் என நானும் குழுவினரில் சிலரும் நடந்தோம்.  சுற்றிலும் காலிஃப்ளவர், முள்ளங்கி, கத்தரிக்காய் என நிறைய பயிரிட்டு இருந்தார்கள்.  அந்தத் தோட்டத்திற்கு அருகே சென்று சில பல நிழற்படங்களை எடுத்துக் கொண்டோம். 

ஒரு வகை பராட்டா…

பராட்டா தயாராகிறது…

 

புகைப்படங்கள் எடுத்துக் கொண்டு உணவகத்திற்கு வந்தபோது காலை உணவாக ஆலு பராட்டா (உருளைக்கிழங்கு பராட்டா), ப்யாஜ் பராட்டா (வெங்காய பராட்டா), பனீர் பராட்டா என ஒவ்வொன்றாக தயாராகிக் கொண்டிருந்தது.  அப்பப்பா என்னவொரு வேகம் அந்த உழைப்பாளியின் கைகளில்! பெரிய பெரிய மாவு உருண்டைகளை (அந்த அளவு கோதுமை மாவு உருண்டை என்றால் நான் ஐந்து அல்லது ஆறு ரொட்டிகள் தயார் செய்து விடுவேன்!) எடுத்து, அதிலே பராட்டாவிற்கான ஸ்டஃப்ஃபிங் சேர்த்து பெரிய பெரிய பராட்டாக்களை உருவாக்கி, முதலில் ஒரு தோசைக்கல்லில் (தவா) கொஞ்சம் சூடாக்கி, அடுத்து வேறு ஒரு தவாவில் நெய் சேர்த்து அதனைச் சூடு படுத்தி, வேக வைத்து ஒவ்வொன்றாக தட்டில் ஊறுகாய் போட்டு, எங்களுக்குத் தந்து கொண்டிருந்தார்.  ஒரு பராட்டா சாப்பிட்டாலே போதும் எனத் தோன்றும்படி அந்த பராட்டாவின் அளவு ஹிமாலயன் சைசில் இருந்தது! நான்கு துண்டுகளாகச் செய்து ஒவ்வொருவருக்கும் பிரித்துக் கொண்டு சாப்பிட ஆரம்பித்தோம்.  அங்கே தொட்டுக் கொள்வதற்காகக் கொடுத்த ஊறுகாயும் நன்றாகவே இருந்தது. பொதுவாக பராட்டா என்றால் தொட்டுக்கொள்ள ஊறுகாயும், தயிரும் தான் தருவார்கள்.  இங்கே தயிர் கேட்டபோது இல்லை என்று சொல்லி விடவே, வெறும் ஊறுகாய் தொட்டுக்கொண்டே சாப்பிட வேண்டியிருந்தது.  வேக வேகமாக அவர் செய்து தந்த பராட்டாவை சாப்பிட்டதோடு, அவர் செய்த வேகத்தினை உங்களுடன் பகிர்ந்து கொள்ள சில நிழற்படங்களோடு காணொளியாகவும் எடுத்துக் கொண்டேன். 

சாலையில் செல்லும் எருமை மாட்டு வண்டி ஒன்று…

 

அங்கே உணவு உட்கொண்ட பிறகு அங்கேயிருந்து எங்கள் பயணம் தொடர்ந்தது. முதலில் சொல்லியிருந்தது போல இந்தப் பகுதிகளில் சாலைகள் அவ்வளவு சரியில்லை என்பதால் வாகனம் மெதுவாகவே சென்று கொண்டிருந்தது. ஆங்காங்கே பார்த்த காட்சிகள் ஒன்றும் சொல்லிக் கொள்ளும்படியில்லை. தொடர்ந்த எங்கள் பயணத்தில் கிடைத்த அனுபவங்கள் என்ன, வழியில் எங்கே சாப்பிட்டோம், அந்த இடத்தில் கிடைத்த அனுபவங்கள் என்ன போன்ற விஷயங்களை அடுத்த பகுதியில் சொல்கிறேன்.  அதுவரை பயணத்தில் இணைந்து இருங்கள் நண்பர்களே.

 

*******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ் 

சென்னையிலிருந்து…