கோயில் உலா - ஒரே நாளில் மூன்று சிவன் கோயில்

 

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

 

இதற்கு முன்னர் வெளியிட்ட டேராடூன் பயணம் - பார்க்க வேண்டிய இடங்கள் பதிவினை  படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

*******

 

“காலை கடம்பர், மதியச் சொக்கர் (ஐயர் மலை) மாலை ஈங்கோயார்” என்று ஒரு வாசகம் உண்டு.  அதாவது ஒரே நாளில் மூன்று சிவன் கோயில்களில் தரிசனம் செய்வது மிகவும் சிறப்பு வாய்ந்தது என்று சொல்வார்கள். அந்த மூன்று கோயில்கள் - குளித்தலையில் இருக்கும் கடம்பவனேஸ்வரரை காலையிலும், அய்யர் மலை உறையும் இரெத்தினகிரீஸ்வரர்-ஐ மதியத்திலும் அந்தி வேளையில் ஈங்கோய்மலை உறையும் மரகதாசலேசுவரர்-ஐயும் தரிசிக்க வேண்டும் என்பது காலங்காலமாக இருந்து வரும் வழக்கம்.  ஒரே நாளில் இந்த மூன்று சிவன் கோயில்களிலும் தரிசித்தால் நல்லது நடக்கும் என்று நம்புவதுண்டு.  இந்த இரண்டில் நான், ஒரே நாளில் முதல் இரண்டு கோயில்களுக்குச் சென்றிருக்கிறேன் என்றாலும் அந்தி வேளையில் தரிசிக்க வேண்டிய ஸ்ரீ மரகதாசலேசுவரர்-ஐ மட்டும் இதுவரை தரிசித்ததில்லை.  இந்த மூன்று கோயில்களும் ஒரே நாளில் சென்று விடலாம் என்றாலும் இரண்டு கோயில்களுக்கு மலைகளில் படி ஏறிச் செல்ல வேண்டும் - அதுவும் அதிகமான படிகள்.  அய்யர் மலை குறித்து முன்னர் எழுதிய பதிவுகள் (பதிவு- ஒன்று, பதிவு -  இரண்டு, பதிவு - மூன்று) உங்களுக்கு நினைவில் இருக்கலாம். 

 

நம்மால் இப்படி போக முடிகிறதோ இல்லையோ அந்தக் காலத்தில் - அதுவும் இப்போது போல போக்குவரத்து வசதிகள் இல்லாத காலத்தில் பலரும் மூன்று கோயில்களுக்கும் ஒரே நாளில் சென்று இறைவனை தரிசித்து இருக்கிறார்கள்.  அப்படி தரிசித்த ஒருவர் முத்தரசு என்கிற குறுநில மன்னர். ஒவ்வொரு நாளும் குதிரையில் ஏறிக்கொண்டு குளித்தலை காலையில் கடம்பரை தரிசித்து, மதியத்திற்குள் அய்யர் மலை சென்று இரெத்தினகிரீஸ்வரர்-ஐயும் தரிசித்து மாலைக்குள் முசிறியை அடுத்த  ஈங்கோய்மலை சென்று மரகதாசலேசுவரர்-ஐயும் தரிசித்து வருவதை வழக்கமாக வைத்திருந்தாராம். இளமைப் பருவத்தில் இப்படியெல்லாம் தரிசிக்க முடிந்த அவரால் வயோதிகக் காலத்தில்  இப்படி ஒரே நாளில் மூன்று இடங்களுக்கும் சென்று பிரியமான சிவபெருமானை தரிசிக்க முடியாமல் போனதே என்று கவலையில் மூழ்கி இருந்தாராம்.  இப்படி தனக்குள் மருகிக்கொண்டிருந்த அரசருக்கு ஒரு நாள் கனவு வருகிறது.  அந்தக் கனவு என்ன? பார்க்கலாம் வாருங்கள். 

 

குறுநில மன்னர் முத்தரசு கண்ட கனவு:

 

இது நாள் வரை ஒரே நாளில் மூன்று கோயில்களிலும் சிவபெருமானை தரிசித்து வந்த என்னால், இப்போது தள்ளாமையால் தரிசிக்க முடியாமல் போய்விட்டதே ஈசனே என்று மருகிய அரசருக்கு ஒரு கனவு.  அந்தக் கனவில் தோன்றிய ஈசன் இக்கோயில் தற்போது அமைந்துள்ள பகுதியில் இருக்கும் வன்னி மரத்தின் அடியில் தோண்டிப் பார்க்கச் சொல்ல, அவரும் அப்படியே செய்தாராம்.  அங்கே அவருக்கு மூன்று சிவலிங்கங்கள் கிடைத்துள்ளன.  குறுநில மன்னனின் கனவில் வந்த ஈசன்,  ஒரே நாளில் தரிசிக்க முடியவில்லை என்று ஏங்கியதால், இதே இடத்தில் மூன்று கோயில்களில் உறையும் ஈசனின் உருவங்களை தரிசிக்க ஏதுவாக தந்தருளியிருக்கிறோம் என்று அரசருக்கு உணர்த்திவிட்டாராம்.  உடனே குறுநில மன்னனாகிய முத்தரசு அதே இடத்தில் மூன்று சிவலிங்களையும் கூடவே அவரவருக்கான அம்பிகையையும் வணங்க ஏதுவாக கோயில் கட்டி வழிபட்டாராம்.  

 

மூன்று சிவலிங்கங்கள் - மூன்று அம்பிகைகள்:

 

மேலே சொன்னபடி மூன்று சிவலிங்கங்களை மட்டுமல்லாது மூன்று அம்பிகை சிலைகளையும் அமைத்து இங்கே கோயில் கட்டி இருக்கிறார் இராஜா முத்தரசு.  அய்யர் மலையில் இருக்கும் ஸ்ரீ ரெத்தினகிரீஸ்வரர் போலவே இங்கேயும் பிரதான கோயிலாக ஸ்ரீ ஆராளகேஸ்வரி சமேத ஸ்ரீ ரெத்தினகிரீஸ்வரர்  கோயில் இருக்கிறது. இருவருக்கும் தனித்தனி சன்னதி அமைந்து இருக்கிறது. பிரகாரத்தில் ஒரு புறம் ஸ்ரீ பால குஜாம்பிகை சமேத ஸ்ரீ கடம்பவனேஸ்வரர் சன்னதிகளும், மற்றொரு புறம் ஸ்ரீ மரகதவல்லி சமேத திரு ஈங்கோய்நாதர் சன்னதிகளும் அமைந்து இருக்கின்றன.  தவிர கோயில் வளாகத்தில் தக்ஷிணாமூர்த்தி, கன்னிமூல கணபதி, வள்ளி, தேவசேனை சமேத ஆறுமுகன், பைரவர், சனீஸ்வரர், சூரியன், சண்டிகேஸ்வரர், துர்க்கை அம்மன், லிங்கோத்பவர் மற்றும் நவக்கிரக சன்னதிகளும் இருக்கின்றன.  எல்லா சிலைகளும் அழகு என்றாலும், குறிப்பாக வள்ளி, தேவசேனை சமேத முருகப்பெருமானும், நவகிரங்களும் அழகு.  நவகிரஹ சிலைகள் பெரிய அளவில் - அதிலும் குறிப்பாக சூரியனின் ஏழு குதிரைகளும் நன்கு தெரியும்படியான சிலைகள் மிகவும் பிடித்தன. 

 

கோயில் வளாகத்தில் ஸ்தல விருக்ஷமான வன்னியும் இருக்கிறது.  கோயில் அமைந்திருக்கும் இடம் திருச்சி - கரூர் நெடுஞ்சாலையில் சத்திரம் பேருந்து நிலையத்திலிருந்து சுமார் ஐந்து கிலோ மீட்டர் தொலைவில் இருக்கும் முத்தரசநல்லூர் (குறுநில மன்னர் முத்தரசு அவர்களின் பெயரால் இந்த ஊர் முத்தரசநல்லூர் என்று வழங்கப்படுகிறது) என்கிற இடத்தில் இருக்கிறது.  முத்தரசநல்லூர் இரயில் நிலையம் அருகே பேருந்திலிருந்து இறங்கிக் கொண்டால் சுமார் 750 மீட்டர் நடந்து சென்றால் கோயில் இருக்கும் இடத்தினை அடைந்துவிடலாம். பெரிதாக தகவல் பலகைகள் ஏதும் இந்தக் கோயில் குறித்து இல்லை. ஊர் மக்களிடம் கேட்டுக் கொண்டு சென்று விடலாம். கோயில் செல்லும் வழியில் ஒரு அழகிய தாமரை தடாகமும் இருக்கிறது. தற்போது இதே ஊரில் வேறு ஒரு புதிய கோயில் அமைத்து இருக்கிறார்கள் - அந்தக் கோயில் மிகவும் பிரபலம் அடைந்து வருகிறது - அக்கோயில் குறித்து தனிப்பதிவாக எழுத இருக்கிறேன். அந்தக் கோயில் செல்லும் வழி என நிறைய பதாகைகள் இருக்கின்றன.  

 

நேற்று (01-02-2024) நான் இந்த பழமையான சிவன் கோயிலுக்கு (ஸ்ரீ ஆராளகேஸ்வரி சமேத ஸ்ரீ ரெத்தினகிரீஸ்வரர் கோயில் என்று உள்ளூரில் சொல்கிறார்கள்) அன்று சென்று வந்தேன். எப்படியும் சில நூறு ஆண்டுகள் பழமையான கோயில் என்று தெரிகிறது. தற்போது இருக்கும் நபர்களுக்கு எத்தனை பழமையானது போன்ற விவரங்கள் தெரியவில்லை.  தற்போது இருக்கும் கோயில் 2019-ஆம் ஆண்டு கும்பாபிஷேகம் நடந்துள்ளது. அதற்கு முன்னர் 2003-ஆம் ஆண்டு கும்பாபிஷேகம் நடந்ததாகவும் தகவல் பலகைகள் கோயிலில் இருக்கின்றன. மிகவும் அமைதியான சூழலில் அமைந்து இருக்கிறது கோயில்.  நான் சென்ற போது என்னைத் தவிர வேறு பக்தர்கள் இல்லை. கோயிலில் பூஜை செய்யும் ஒருவரும் வேறு ஒரு நபரும் மட்டுமே இருந்தார்கள்.  ஈசனுக்கு முன்னர் அமைதியாக அமர்ந்து தியானிக்க முடிந்தது என்பதில் எனக்கு கூடுதல் மகிழ்ச்சி.  கோயிலைச் சுற்றி வந்து சில படங்களும் எடுத்துக் கொண்டேன் - பகிர்வில் தந்திருக்கும் படங்கள் நான் எடுத்தவையே.  நிம்மதியான தரிசனம் கண்டு அங்கிருந்து புறப்பட்டு அருகில் இருக்கும் புதிய கோயிலுக்கும் சென்று வந்தேன். அந்தக் கோயில் குறித்து பிறிதொரு பதிவில் எழுதுகிறேன்.  கோயில் குறித்த தகவல்கள் உங்களுக்கும் பிடித்திருக்கும் என நம்புகிறேன்.  திருச்சி வரும் வாய்ப்பு இருந்தால் இந்தக் கோயிலுக்குச் சென்று “காலை கடம்பர், மதியச் சொக்கர் (ஐயர் மலை) மாலை ஈங்கோயார்” என்ற வாக்கின் படி - ஒரே நாளில் மூன்று பேரையும் தரிசித்த பலனை அடையலாமே!

 

*******

 

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ் 

திருவரங்கத்திலிருந்து.