இயற்கை அன்னையின் மடியில் - புலிகள் நடமாட்டம் - பகுதி பத்து

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட ஆதி மஹோத்சவ் 2024 - நிழற்பட உலா - பகுதி இரண்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

இத்தொடரில் இதுவரை ஒன்பது பகுதிகள் வெளியிட்டு இருக்கிறேன். அந்தப் பகுதிகளை நீங்கள் இதுவரை படிக்கவில்லை என்றால் கீழே உள்ள சுட்டிகள் வழி படித்துவிடலாம். படித்துப் பாருங்களேன்.  

இயற்கை அன்னையின் மடியில் - எங்கே அடுத்த சுற்றுலா - பகுதி ஒன்று

இயற்கை அன்னையின் மடியில் - லான்ஸ்(d)டௌன் - பகுதி இரண்டு

இயற்கை அன்னையின் மடியில் - காலை உணவு - பகுதி மூன்று 

கரும்புத் தோட்டங்களும் வெல்லமும் - பகுதி நான்கு

லான்ஸ்(d)டௌன் - தங்குமிடங்கள் - பகுதி ஐந்து

லான்ஸ்(d)டௌன் - பார்க்க வேண்டிய இடங்கள் - பகுதி ஆறு

லான்ஸ்(d)டௌன் - பார்க்க வேண்டிய இடங்கள் - பகுதி ஏழு

லான்ஸ்(d)டௌன் - தாட(ர)கேஷ்வர் மஹாதேவ் கோயில் - பகுதி எட்டு

லான்ஸ்(d)டௌன் - இயற்கையுடன் ஒன்றிய தங்குமிடம் - பகுதி ஒன்பது

சென்ற பகுதியில் எங்கள் தங்குமிடத்தின் அருகே இருந்த நயார் ஆற்றின் கரைக்குச் சென்று நிலவொளியில் மின்னிய ஆற்றையும் அங்கே இருந்த சூழலையும் ரசித்து வந்தது பற்றி எழுதி இருந்தேன்.  ஆற்றங்கரையிலிருந்து வெளியேறி தங்குமிடத்திற்கு வருவதற்கு எங்களில் ஒருவருக்கும் மனதில்லை. என்றாலும் இரவு நேரத்தில் அங்கே இருப்பது சரியல்ல என்று முடிவெடுத்து ஆற்றிலிருந்து தங்குமிடம் நோக்கி நடக்க ஆரம்பித்தோம்.  அப்படி அங்கிருந்து விலகி வந்ததும் நல்லதற்கே என்று சிறிது நேரத்தில் புரிந்தது.  ஆற்றின் கரையில் இருந்த இடங்களில் ஒரு சில வீடுகள் இருந்தன. ஒரு வீட்டில் இருந்த நபர்களிடம் சிறிது நேரம் அளவளாவினோம்.  அங்கே இரண்டு ஆட்டுக் குட்டிகள் விளையாடிக்கொண்டிருந்தன.  அன்றைக்கு தான் அந்த ஆட்டுக்குட்டிகள் பிறந்தனவாம். ஆட்டுக்குட்டிகள் பார்க்கவே அத்தனை அழகு. அவற்றை தூக்கிக் கொண்டு கொஞ்சும் அளவிற்கு இருந்தன - எங்கள் குழுவில் இருந்த சிலர் ஆட்டுக்குட்டிகளைத் தூக்கிக் கொண்டார்கள்.  அந்த வீட்டில் இருந்த பெண்மணி, அவரது மகள், பெண்மணியின் கணவர் என சிலரிடம் பேசிக் கொண்டிருந்தோம். 

வீட்டின் அருகிலேயே சின்னதாய் தோட்டம் அமைத்து காய்கறிகள் பயிரிட்டு இருந்தார்கள். இதைத்தவிர கொஞ்சமாக நிலமும் இருக்கிறது. அந்த நிலத்தில் தங்களுக்குத் தேவையான தானியங்களை பயிரிட்டுக்கொள்கிறார்கள் என்று தெரிந்தது.  அழகான கிராமியப் பகுதியில் சிறிய வீடு, வீட்டின் அருகே தோட்டம், இயற்கை எழில், பக்கத்திலேயே ஒரு ஆறு என ரம்மியமான இடமாக இருந்தது. அந்த இடத்தில் இருப்பது நமக்கு சொர்க்கம் போலத் தெரிந்தாலும், அங்கேயும் சில பிரச்சனைகள் உண்டு என்பதை அவர்களிடம் பேசியபோது தெரிந்து கொள்ள முடிந்தது. குளிர்காலங்களில் அதீத குளிர் இருந்தாலும், இப்பகுதிகளில் பனிப்பொழிவு இருப்பது இல்லை என்பதையும் தெரிந்து கொள்ள முடிந்தது. அதைப் போலவே மருத்துவ வசதிகள் மிகவும் குறைவு என்பதால் அவசர சிகிச்சை தேவைப்படும் காலங்களில் மாவட்டத் தலைநகர் அல்லது ரிஷிகேஷ் வரை கிடைத்த வாகனங்களில் பயணிக்க வேண்டியிருக்கிறது என்பதையும் சொல்லிக் கொண்டு இருந்தார்கள்.  பட்டப் படிப்பு படிப்பதற்கும் வெளியே செல்ல வேண்டியிருக்கிறது என்றும் தெரிந்தது.  

அவர்களிடம் பேசிக் கொண்டிருந்த பிறகு தங்குமிடத்திற்கு வந்து எங்களுக்குத் தேவையான இரவு உணவை தங்குமிட உரிமையாளர் கொடுத்த அலைபேசி எண்ணை அழைத்து சப்பாத்தி, தால், சப்ஜி என அனைத்தும் சொன்னோம்.  அரை மணி நேரத்திற்குப் பிறகு சுடச் சுட உணவு வந்து சேர்ந்தது. எங்கள் குழுவில் இருந்த 10 பேர் தவிர ஓட்டுநர் அனில் திவாரி சேர்த்து மொத்தமாக 11 பேர் இரவு உணவு சாப்பிடுவதற்கு எங்களுக்கு ஆன செலவு 1530/- மட்டுமே. உணவு சுவையாகவும் இருந்தது, அதிக செலவும் இல்லை. எல்லா பயணங்களிலும் இரவு உணவுக்குப் பிறகு, தங்குமிடத்திலிருந்து அப்படியே ஒரு நடை நடந்து நகர்வலம் வருவது எனக்கு பழக்கம்.  அது போலவே இந்த இடத்திலும் வெளியே செல்லலாம் என கீழே இறங்கிய போது, தங்குமிட உரிமையாளர் அதிக தூரம் செல்ல வேண்டாம், விளக்கு இருக்கும் இடம் வரை மட்டுமே செல்லுங்கள் என்று சொன்னதோடு, திரும்பிய பிறகு என்னிடம் சொல்லுங்கள், வெளிக்கதவை நான் பூட்ட வேண்டும் என்று சொல்லிச் சென்றார்.  எதற்காக அதிக தூரம் செல்ல வேண்டாம் என்று சொன்னார் என நாங்கள் கேள்வி கேட்கவில்லை. எங்கள் வாகன ஓட்டிக்கும் அறை இருக்கிறது என்று சொன்னாலும் அவர் வண்டியில் தான் படுத்துக் கொள்வேன் என்று சொல்லி இருந்தார். அவரும் எங்களிடம் அதிக தூரம் செல்ல வேண்டாம் என்று சொல்லி அனுப்பினார். 

நானும் நண்பர்களுமாக அப்படியே நடக்க ஆரம்பித்தோம்.  சாலையில் விளக்கொளி இருக்கும் வரை சென்று திரும்புவது - இப்படியாக இரண்டு அல்லது மூன்று முறை நடந்திருப்போம்.  குளிர்காற்றும் இருந்தது - அதுமட்டுமல்லாது எங்களைத் தவிர சாலையில் வேறு நடமாட்டம் இல்லை. ஒன்றிரண்டு வாகனங்கள் மட்டும் அந்தப் பாதையில் அவ்வப்போது வந்து போனது.  அப்படி நடந்து கொண்டிருந்தபோது ஒரு வாகனத்தில் சில உள்ளூர்வாசிகள் வந்து எங்கள் தங்குமிடம் அருகே வாகனத்தினை நிறுத்தி, ஊரில் நிறைய ஹோம்ஸ்டே போன்ற தங்குமிடங்கள் வந்திருக்கிறது என்றெல்லாம் பேசிக் கொண்டிருந்தார்கள். எங்களிடமும் இங்கே தங்கியிருக்கிறீர்களா எனக் கேட்டு, அதிக நேரம் இந்த இருட்டில் உலா வருவது நல்லதல்ல என்று சொன்னதோடு, அதிர்ச்சியான ஒரு விஷயத்தினையும் சொன்னார்.  மலைப்பகுதி என்பதால் இந்தப் பகுதியில் விலங்குகள் நடமாட்டம் உண்டு என்றும் சில நேரங்களில் மலைப்பகுதியிலிருந்து இறங்கி வந்து ஆற்றில் நீர் அருந்துவதற்கு விலங்குகள் செல்லும் என்றும் சொல்லிக் கொண்டிருந்தார்.  சில சமயங்களில் புலிகள் கூட வந்திருக்கின்றன என்றும் சொல்ல, சரி சரி தங்குமிடம் திரும்புவோம் என அவர்களுக்கு நன்றி சொல்லி புறப்பட்டோம். 

இது போன்ற இடங்களில் உள்ளூர்வாசிகள் சொல்வதைக் கேட்பது நல்லதே. நமக்குத் தெரியாத இடத்தில், அதிக பழக்கம் இல்லாத இடங்களில் இப்படியெல்லாம் செய்வது ஆபத்தில் கூட முடியலாம். நாங்கள் திரும்பியதும் தங்குமிட உரிமையாளர் வெளிக்கதவை மூடி, பூட்டும் போட்டார்.  அவரிடமும் இந்தப் பகுதிகளில் விலங்குகள் நடமாட்டம் உண்டா என்று கேட்டபோது, உண்டு - அதனால் தான் அதிக தூரம் நடக்கவேண்டாம் என்று சொன்னேன் என்றும் சொன்னார்.  அப்போது தான் ஆற்றங்கரையில் பார்த்த விலங்குகளின் எலும்புக்கூடுகள் நினைவுக்கு வந்தது - ஒரு வேளை புலிகள் இப்படி விலங்குகளை அடித்துச் சாப்பிட்டு எலும்புக்கூடுகளை மட்டும் விட்டுச் சென்று இருக்குமோ என்றும் சந்தேகமும் வந்தது. எது என்னவோ, நல்லபடியாக தங்குமிடம் திரும்பி அவரவர்களுக்கான அறைகளில் தஞ்சம் அடைந்தோம்.  இரவில் சாதரணமாகவே அமைதியாக இருக்கும் - இந்தப் பகுதியில் வாகனங்களின் ஓட்டமும் குறைவு என்பதால் சுமார் 250 மீட்டர் தொலைவில் இருக்கும் ஆற்று நீரின் சலசலப்பு எங்கள் அறை வரை கேட்டது. 

இனிமையான உறக்கம், அன்றைய தினத்தின் பயண அலுப்பினை போக்கும் விதத்தில் அமைந்தது. அடுத்த நாள் எங்களுக்குக் கிடைத்த அனுபவங்கள் என்ன, பார்த்த இடங்கள் என்ன போன்றவற்றை அடுத்து வரும் பகுதிகளில் எழுதுகிறேன். அதுவரை பயணத்தில் தொடர்ந்து இணைந்து இருங்கள் நண்பர்களே. 

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…