கோயில் உலா - பாடல் பெற்ற ஸ்தலம் - மருந்தீஸ்வரர் கோயில், திருவான்மியூர், சென்னை

 

அன்பின் நண்பர்களுக்கு, இனிய காலை வணக்கம். இந்த நன்நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.  

இதற்கு முன்னர் வெளியிட்ட  இயற்கை அன்னையின் மடியில் - சுற்றிப்பார்க்க வேண்டிய இடங்கள் - தொடர்ச்சி பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

*******

இந்த முறை தமிழகம் வந்தபோது பயணத்தின் கடைசி இரு நாட்கள் சென்னையில் இருக்க வேண்டியிருந்தது. உங்களுக்கும் அறிமுகமான தில்லி நண்பர் பத்மநாபன் அவர்களின் மகள் திருமண வரவேற்பு மற்றும் திருமண நிகழ்வுகள் சென்னையில் நடந்ததால் திருச்சியிலிருந்து சென்னைக்கு வந்து அங்கே இரண்டு நாட்கள் தங்கி மகிழ்வான நிகழ்வுகளில் கலந்து கொண்டு பிறகு அங்கிருந்தே தலைநகர் தில்லி திரும்பினேன்.  சென்னையில் திருமண நிகழ்வுகள் நடந்த இடம் திருவான்மியூர் - அதுவும் பாடல் பெற்ற ஸ்தலமான மருந்தீஸ்வரர் திருக்கோயில் அருகே இருக்கும் கோயில் நிர்வாகத்தினரின் திருமண மண்டபம் என்பதால் பாடல் பெற்ற ஸ்தலத்திற்கும் சென்று ஸ்ரீ திருபுரசுந்தரி சமேத ஸ்ரீ மருதீஸ்வரரையும் தரிசிக்கும் பாக்கியம் அமைந்தது.  பாடல் பெற்ற ஸ்தலங்கள் அனைத்தையும் பார்க்க எண்ணமிருந்தாலும், அத்தனையும் பார்க்கும் வாய்ப்பு எப்போது கிடைக்கும் என்பதற்காகவே காத்திருக்க வேண்டியிருக்கிறது. அப்படியான வாய்ப்பு இப்போது கிடைத்ததும் இருகரம் நீட்டி வரவேற்று விட்டேன். 

திருமண வரவேற்பு மாலை ஆறரை மணிக்கு மேல் தான் என்பதால் மாலை ஐந்து மணிக்கு, கொல்கத்தாவிலிருந்து வந்திருந்த நண்பர் Majumdar தம்பதிகளையும் அழைத்துக் கொண்டு கோயிலுக்குச் சென்று விட்டேன். அழகான கோயில். ஐந்து நிலைகள் கொண்ட இராஜகோபுரம் அமைந்திருக்கும் பிரதான வாயிலுக்குள் உள்ளே நுழைந்து நேரடியாக சுயம்பு லிங்கமாக இருக்கும் ஸ்ரீ மருந்தீஸ்வரரை மனமுருகி வேண்டிக்கொள்ள முடிந்தது. கோயில் திறந்த நேரம் என்பதால் சற்று மக்கள் நடமாட்டம் அதிகமாக இருந்தது என்றாலும் நின்று நிதானமாக இறைவனை தரிசிக்க முடிந்தது. இறைவனை தரிசித்த பிறகு பிரதக்ஷிணமாக உலா வந்து ஸ்தலவிருக்ஷமான வன்னி மரத்தினையும், அதன் அடியில் இருக்கும் நாக தேவதைகளையும் தரிசித்து அம்பாள் சன்னிதிக்குச் சென்று அன்னை ஸ்ரீ திரிபுரசுந்தரியையும் வணங்கினோம். கோயில் குறித்த சில கதைகளையும், தல வரலாறு குறித்தும் பார்க்கலாம் வாருங்கள்.

வால்மீகி முனிவரும் மருந்தீஸ்வரர் கோயிலும்:

கொள்ளைக்காரனாக இருந்த வால்மீகி, மனம் திருந்திட எண்ணம் கொண்டு, நாரதரின் ஆலோசனைப் படி இத்தலம் வந்து முக்திப் பேறு வேண்டி சிவபெருமானை வழிபட்டார். அவருக்கு வன்னி மரத்தடியில் இறைவன் காட்சி கொடுத்தார். இந்த வன்னி மரத்தடியில் தான் சுயம்பு லிங்கத்தைக் கண்டெடுத்து வழிபட்டதாக புராண செய்திகள் கூறுகின்றன. அகத்திய முனிவருக்காக ஒரு முறையும், வான்மீகி முனிவருக்காக ஒரு முறையும் ஆக இரண்டு முறை இறைவன் இந்த வன்னி மரத்தடியில் காட்சி கொடுத்துள்ளார். இந்த வன்னி மரத்தடியில் பங்குனி மாத பிரம்மோற்சவத்தில் ஒன்பதாம் நாள் இறைவன் அகத்தியருக்கு திருமணக் காட்சி கொடுத்த விழா ஆண்டுதோறும் நடைபெற்று வருகிறது. இதனால் இந்த ஊர் ‘திருவான்மீகியூர்’ என்று பெயர் பெற்றது. அதுவே மருவி ‘திருவான்மியூர்’ ஆனது. 

மேற்கு நோக்கி அருள்புரியும் மருந்தீஸ்வரர்:

ஒரு முறை அபயதீட்சிதர் என்ற பக்தர், இறைவனை தரிசிக்க வந்தாராம். அப்போது பெரும் மழையால் வெள்ளப்பெருக்கு ஏற்பட்டு கோவிலுக்குள் அவரால் செல்ல முடியவில்லை. சுவாமிக்கு பின்புறம் இருந்ததால், இறைவனின் முதுகுப்பகுதியைத்தான் தரிசிக்க முடிந்தது. “இறைவா.. உன் முகம் காட்டு’ என்று அவர் மனவருத்ததுடன் வேண்டிக்கொண்டதன் பேரில், இறைவன் மேற்கு முகமாக திரும்பி தன் முக தரிசனத்தை பக்தர் அபயதீக்ஷிதருக்கு வழங்கினார் என்றும் இன்றும் அதனால் இத்தல இறைவன் மேற்கு நோக்கி அருள்பாலிக்கிறார் என்றும் இத்தலம் குறித்த ஒரு கதை இருக்கிறது.

அகத்தியருக்கு அருளிய மருந்தீஸ்வரர்:

கயிலை மலையில் சிவன் பார்வதி திருமணம் நடைபெறும் சமயம் திருமணத்தைக் காண எல்லோரும் அங்கு கூடியதால் வடபுலம் தாழ்ந்து தென்புலம் உயர்ந்தது. அதனை சமன் செய்ய சிவபெருமான் அகத்திய முனிவரை தென்திசை அனுப்பினார். தென்புலம் சென்றால் தன்னால் தெய்வத் திருமணத்தைக் காண இயலாமல் போய்விடுமோ என்று சிவனிடம் முறையிட இறைவனும் அகத்தியர் விரும்பும் போது திருமணக் கோலம் காட்டி அருளுவதாக கூறினார். அதன்படி திருவான்மியூர் தலத்தில் அகத்தியருக்கு இத்தலத்தின் ஸ்தல விருக்ஷமான வன்னி மரத்தடியில் திருமணக் கோலம் காட்டி அருளினார். அகத்தியர் திருவான்மியூர் தலத்தில் தங்கி இருந்த போது வயிற்று வலியினால் அவதிப்பட்டார். இறைவன் அகத்தியருக்கு காட்சி கொடுத்து மருந்துகள் பற்றியும், அதன் உபயோக முறைகளைப் பற்றியும் உபதேசம் செய்து அருளினார். அதனாலேயே இறைவன் மருந்தீஸ்வரர் என்ற பெயருடன் இத்தலத்தில் அறியப்படுகிறார்.

பால்வண்ணநாதர் - பெயர்க்காரணம்: 

சுயம்புலிங்கமாகிய மருந்தீஸ்வரருக்கு வான்மீகிநாதர், வேதபுரீஸ்வரர், அமுதீஸ்வரர், பால்வண்ணநாதர் போன்ற பெயர்களும் உண்டு.  பால்வண்ணநாதர் என்ற பெயருக்குக் காரணமாக ஒரு கதையும் சொல்லப்படுகிறது.  வசிஷ்டமுனிவர் செய்த சிவபூஜைக்காக, இந்திரன் தன்னிடமிருந்த காமதேனுவை அனுப்பி வைத்தான். பூஜை நேரத்தில் காமதேனு பால் சுரக்காமல் தாமதம் செய்யவே கோபம்கொண்ட முனிவர், அதனை புனிதத்தன்மை இழந்து காட்டுப்பசுவாக மாறும்படி சபித்தார்.  கலங்கிய காமதேனு, தனக்கு விமோசனம் கேட்க, இத்தலத்தில் வன்னி மரத்தடியில் சுயம்புலிங்கமாக உள்ள சிவனை வணங்கினால் விமோசனம் உண்டு என்றார். அதன்படி, இங்கு வந்த காமதேனு சுயம்புவாய் இருந்த சிவன் மீது தினசரி பால் சுரந்து விமோசனம் பெற்றது. இதனால், இங்குள்ள இறைவன் "பால்வண்ணநாதர்' என்றும் அழைக்கப்படுகிறார்.

மூலவருக்கு பால் அபிஷேகம் செய்து வணங்கி, விபூதி பிரசாதம் சாப்பிட்டால், எவ்வித நோயாக இருந்தாலும் நீங்கிவிடும் என்பது ஐதீகம், பாவங்களும் தீரும். வன்னி மரத்தை சுற்றி வந்து வணங்கினால் முக்தி கிடைக்கும் போன்ற இக்கோயில் சார்ந்த நம்பிக்கைகளும் உண்டு.  சூரியனும், சந்திரனும் இத்தலத்தில் இறைவனை வழிபட்டுள்ளதால், இங்கு நவக்கிரகங்களுக்கு என்று தனி சந்நிதி இல்லை.  தவிர இக்கோயிலில் ஐந்து இலைகள் கொண்ட, “மஹா வில்வம்” மரம் ஒன்றும் இருக்கிறது.  பஞ்ச பூதங்களுக்கான லிங்கங்கள் மற்றும் 108 லிங்கங்கள் ஒரே இடத்தில் அமைந்து இருந்ததும் சிறப்பாக இருந்தது. கோயில் வளாகத்தில் சிறிது நேரம் அமர்ந்து இறைவனை மனமார தரிசித்து மன மகிழ்ச்சியுடன் வெளியே வந்தோம். 

பாடல் பெற்ற ஸ்தலங்களில் சென்னை கிழக்குக் கடற்கரைச் சாலையில் திருவான்மியூர் பேருந்து நிலையத்திற்கு அருகே இருக்கும் இந்த மருந்தீஸ்வரர் தலம் குறித்த தகவல்களை பகிர்ந்து கொள்ள முடிந்ததில் மன நிறைவு.  தகவல்கள் உங்களுக்கும் பிடித்திருக்கும் என நம்புகிறேன். எல்லாம் வல்ல இறைவன் அனைவருக்கும் நல்லதையே அருளட்டும். வேறு ஒரு பாடல் பெற்ற ஸ்தலம் குறித்த தகவல்களுடன் அடுத்த கோயில் உலா பதிவில் சந்திக்கிறேன். கோயில் வளாகத்தில் எங்களால் எந்த நிழற்படமும் எடுக்க முடியவில்லை. இணையத்திலிருந்து எடுத்த சில படங்களைச் சேர்த்திருக்கிறேன்.

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…