கதம்பம் - ரயில் சிநேகம் - ரசனை - கேரளத்து மரச்சீனி கறி - பிள்ளையார் சதுர்த்தி - ஓவியம்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட பேருந்து பயணம் - செயலி மூலம் பயணச் சீட்டு பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

ரயில் சிநேகம் - 6 செப்டம்பர் 2024:

நேற்றைய ஆசிரியர் தினத்தில் நான் கற்று வரும் மூன்று வகுப்புகளின் ஆசிரியர்களுக்குமே தனிப்பட்ட முறையில் என் வாழ்த்துகளை தெரிவித்துக் கொண்டேன்! ஸ்பெஷலாக சமஸ்கிருத ஆசிரியருக்கு சமஸ்கிருதத்திலேயே நான்கு வரிகளும் எழுதி பகிர்ந்து கொண்டேன்! 

பகவத் கீதா வகுப்பில் நான் இரண்டாம் நிலைக்கு சென்று விட்டதால் முதல் நிலையில் எங்களுக்கு கற்றுக் கொடுத்த ஆசிரியர் இப்போது மாறிவிட்டார். உலகின் பல்வேறு இடங்களிலிருந்தும் பலர் பங்கேற்கும் குழுவில் சிறு பிள்ளை போல் ‘நான் உங்களை மிஸ் பண்ணுவேன் மேம்’ என்று மெசேஜ் செய்தேன்…:) இப்போது நினைத்துப் பார்த்தால் புன்னகைக்கத் தான் வைக்கிறது..:)

நம் வாழ்வில் அன்றாடம் சந்தித்துக் கொண்டிருக்கும் எல்லோருமே ரயில் சிநேகம் போல தான் அடுத்த ஸ்டேஷன் வந்தால் இறங்கித் தான் ஆக வேண்டும் என்று மனதுக்கு நன்கு தெரிந்தாலும் சிறுபிள்ளைகள் வாஞ்சையுடன் அம்மாவின் முந்தானையைப் பற்றிக் கொண்டே பின்னாடியே வருவார்களே! அதுபோல தான் ஆத்மார்த்தமாக ஒருசிலரிடம் பற்று வைத்து  விடுகிறோம்..:)

ரசனை  - 6 செப்டம்பர் 2024:

சாலையில் போவோர் வருவோரை எல்லாம் ஜன்னலில் வேடிக்கை பார்த்தபடியே ஒரு பிளாஸ்டிக் சேரில் காலை நன்கு மடித்து வைத்து அமர்ந்து கையில் ஒரு பிஸ்கட்டும் மற்றொரு கையில் தேநீரும் வைத்துக் கொண்டு சூடான தேநீரை ‘ஒரு கடி ஒரு குடி’ என்று சொல்வார்களே! அதுபோல ரசித்து ருசித்ததெல்லாம் பசுமையான நினைவுகளில் ஒன்றாக மாறிவிட்டது…:)

எதையுமே கொதிக்க கொதிக்க சாப்பிடத் தான் எனக்கு பிடிக்கும்! நாக்கு பொத்து போக வேண்டும்..:) விபரம் தெரிந்த பின் நான் ரசித்து ருசித்து சாப்பிட்டதெல்லாமே அம்மாவோடு முடிந்து விட்டது..! பிறகு எல்லாமே ஒரு ஓட்டம் தான்! அடுத்த வேலையைப் பார்க்க வேண்டும்! இல்லையென்றால் அந்தப் பண்டத்தை அடுத்த வேளைக்கு வைக்க முடியாது! அதனால் தீர்க்க வேண்டும்! இந்த இரண்டே ஆப்ஷனுக்குள் முடிந்து விடும்…:)

கேரளத்து மரச்சீனி கறி - 6 செப்டம்பர் 2024:

கோவையில் இருந்தவரை அம்மா அடிக்கடி செய்வாள்! அங்கெல்லாம் பழைய பேப்பர், பிளாஸ்டிக் போன்றவற்றை எடைக்கு போட்டால் மரவள்ளிக்கிழங்கு தான் தருவார்கள்! மாலைநேரத்தில் அதை வேகவைத்து பள்ளியிலிருந்து வந்ததும் எங்களுக்கு சூடாக சாப்பிடத் தருவாள். இல்லையென்றால் ஒருநாள் சமையலுக்கு ஆச்சு என்று காய்கறிகளுக்கு பதிலாக கிழங்கை தேங்காய் சேர்த்த கறியாக பண்ணுவாள்!

இந்த வாரச் சந்தையில் பார்த்ததும் வாங்கி வந்தேன்! இன்று காலை சமையலுடன் அதையும் சுத்தம் செய்து உப்பு மஞ்சள்தூள் சேர்த்து குக்கரில் வைத்தேன். தேங்காயெண்ணெயில்  தாளிப்புடன் காரத்துக்கு மிளகாயும் கிள்ளிப் போட்டு கிழங்கையும் சேர்த்து பிரட்டி தேங்காயும் சேர்த்து இறக்கினேன். சுவையான மரச்சீனி கறி தயார்! இன்றைய காலை உணவாகவே இதை தான் எடுத்துக் கொண்டேன்…:)

பிள்ளையார் சதுர்த்தி - 7 செப்டம்பர் 2024:

கணேஷா! கணேஷா! என்று நம்ம வீட்டில்  எல்லாவற்றுக்கும் நான் இவரிடம் தான் முறையிடுவேன்! எங்களுக்கு துணையாக, வழிகாட்டியாக எப்போதுமே உடன் வரும் குழந்தை! காரணமில்லாமல் காரியமில்லை! அவருக்குத் தெரியும் யாருக்கு எப்போது என்ன தர வேண்டும் என்று! எல்லாரையும் நல்லபடியா வெச்சிருப்பா! 

நல்லதே நடக்கட்டும்!

எல்லாம் நன்மைக்கே! என எடுத்துக் கொள்கிறேன்!

இன்று கொழக்கட்டை, அரிசி தேங்காய் பாயசம், சுண்டல் என எளிமையான நைவேத்தியம் தான் கணேஷாவுக்கு செய்ய முடிந்தது! கால்(ஆர்த்ரைட்டீஸ்) ஒத்துழைக்கவில்லை! சுறுசுறுப்பு குறைந்து விட்டது! மகள் தான் எனக்கு உடனிருந்து உதவினாள்!

******

ரோஷ்ணி கார்னர் - ஓவியம் - 8 செப்டம்பர் 2024:

பிள்ளையார் சதுர்த்திக்காக மகள் வரைந்த ஓவியம் ஒன்று உங்கள் பார்வைக்கு!

******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

27 செப்டம்பர் 2024