கதம்பம் - ஸர்வம் க்ருஷ்ணார்ப்பணமஸ்து - திருவரங்கம் - வாரச்சந்தை - டெடிகேஷன்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட நடை நல்லது - பகுதி ஒன்று பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

ஸர்வம் க்ருஷ்ணார்ப்பணமஸ்து - 26 ஆகஸ்ட் 2024:

வஸுதேவஸுதம் தேவம் கம்ஸசாணூரமர்தநம்!

தேவகீ பரமானந்தம் க்ருஷ்ணம் வந்தே ஜகத்க்ருதம்!

வஸுதேவருக்கும் தேவகிக்கும் மட்டுமல்ல 'கிருஷ்ணா' என்றாலே எல்லோருக்கும் பரமானந்தம் தான்! அவனது லீலைகளையும் விஷமங்களையும் இன்றெல்லாம் மனம் மயங்கி கேட்டுக் கொண்டிருக்கலாம்!

எனக்கு இது வேண்டும்! அது வேண்டும்! என்று பிரார்த்தித்துக் கொள்வதைக் காட்டிலும் அவனிடம் சரணாகதி அடைந்து விட்டால் நமக்கு என்ன தர வேண்டும் என்பதை அவன் பொறுப்பில் பார்த்துக் கொள்ள மாட்டானா!! 

ஜெய் ஸ்ரீ கிருஷ்ணா!

நம்ம வீட்டு குட்டி கிருஷ்ணனுக்காக திரட்டுப்பாலும், தேன்குழலும், பால் பேடாவும், அப்பமும், அவல் பாயஸமும் செய்து அர்ப்பணம் செய்தேன். மகள் அழகாக கோலமிட்டு க்ருஷ்ணனின் பிஞ்சு பாதங்களையும் வரைந்திருக்கிறாள்! 

******

திருவரங்கத்து இற்றைகள் - 27 ஆகஸ்ட் 2024:

நேற்றைய பொழுதில் வீட்டில் கோகுலாஷ்டமிக்கான ஏற்பாடுகளை செய்து கொண்டே ஒரு தகவலுக்காக மனம் ஆவலோடு எதிர்பார்த்துக் கொண்டிருந்தது! இன்றைய நாளில் அந்த தகவல் கிடைத்தால் பொருத்தமாக இருக்குமே!!! ஸ்பெஷலாக இருக்குமே! 

இரவு தான் அந்த தகவல் எனை வந்து சேர்ந்தது! கீதை வகுப்பில் சேர்ந்து இரண்டு அத்தியாயங்களை வெற்றிகரமாக கற்று உச்சரிப்புத் தேர்விலும் இன்று வெற்றி பெற்று சான்றிதழும் பெற்றிருக்கிறேன் என்ற தகவல் தான் அது! முதல் நிலையிலிருந்து அடுத்த நிலைக்கு சென்று விட்டேன்!

இன்றைய நாளில் அதற்கான விழாவில் என்னைக் குறித்தான அறிமுகத்துடன் வகுப்பை பற்றிய என் அனுபவங்களை பகிர்ந்து கொண்டதுடன் ஓங்கி ஒலிக்கும் குரலில் திருவாசகத்தில் சிவபுராணமும் என்னால் சொல்ல முடிந்தது என்பதும் ஒரு மகிழ்ச்சி. 

******

வாரச்சந்தை - 27 ஆகஸ்ட் 2024:

பிழிய பிழிய சாறு!

ஒன்பது பேருக்கு சோறு!

எலுமிச்சை விற்பவரின் குரல் இது! தட்டு 20ரூ. இஞ்சி, பச்சை மிளகாய், நெல்லிக்காய் என்று எல்லாமே இப்படி தட்டில் போட்டு தான் விற்பனை செய்வார்கள். எலுமிச்சை ஒரு தட்டு எடுத்துக் கொண்டேன். அதில் ஐந்தாறு பழங்கள் இருந்தன!

வாம்மா! என்ன இன்னைக்கு சீக்கிரம் வந்துட்டாப்ல இருக்கு! எடுத்துக்கோ தாயி! ஒரு தட்டு போதுமா? 

தோட்டத்து காய்கறிக்கா! ஒரு காய் நல்லா இல்லேன்னாலும் காசத் திரும்ப தந்துடறேன்! இப்படி மற்றொரு வியாபாரியின் குரல்! இவரிடம் உள்ள காய்கறிகள் நன்றாகவும் இருக்கிறது என்பதால் தொடர்ந்து வாங்கி வருகிறேன். இம்முறை ஃபோட்டோவும் எடுத்தேன்…:)

வியாபாரிகள் இப்போது ஒரு சில ஹிந்தி வார்த்தைகளும் கேட்டு தெரிந்து கொள்கிறார்கள்! வடக்கிலிருந்து வந்து வசிப்பவர்களும் இங்கு இருக்கிறார்கள்! பொதுவாக ‘ஜி’ போட்டு அழைப்பதும் ஆங்கிலத்தில் விலையைச் சொல்வதுமாக இருக்கிறார்கள்.

*******

ரோஷ்ணி கார்னர் - 27 ஆகஸ்ட் 2024:

அம்மா! உனக்கு ஒரு ஃபோட்டோ அனுப்பறேன் பாரு! அத உனக்காகவே நான் டெடிகேட் பண்றேன்! என்றாள் மகள்!

ஹா…ஹா..ஹா. 

ஒவ்வொருத்தரா கேட்பேன் என்று நான் கற்று வரும் வகுப்புகளில் சொன்னாலே உடனே நான் தயாராகி விடுகிறேன். ..:)

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

11 செப்டம்பர் 2024