காஃபி வித் கிட்டு - 202 - ஹிந்தி dhதிவஸ் - டாம்பீகம் - நிழல் விளையாட்டு - முக்தி துவாரகா - எண்ணங்கள் - வாட்டர் பேக்கட் - தனிமை - Bபிஜ்லி மஹாதேவ் மந்திர்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட தன்னம்பிக்கை மனிதர்கள் பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

இந்த நாள் இனிய நாள் : ஹிந்தி dhதிவஸ்

என்னதான் ஹிந்தி தெரியாது போடா என்று அரசியல் ஜல்லி அடித்தாலும், இப்படிச் சொல்பவர்களில் பலர் ஹிந்தியில் பேசக் கூடியவர்களே.  இது குறித்து அதிகம் பேச வேண்டியதில்லை என்றாலும், இன்றைக்கு இது குறித்து பேசலாம் - ஏனெனில் இன்றைக்கு தான் ஹிந்தி dhதிவஸ் கொண்டாடப்படுகிறது.  1949 ஆம் ஆண்டில் இதே நாளில், இந்திய அரசியலமைப்பின் வரைவின் போது தேவநாகரி எழுத்துக்களில் எழுதப்பட்ட ஹிந்தியை அதிகாரப்பூர்வ மொழியாகப் பயன்படுத்த இந்திய அரசியலமைப்பு சபை ஒப்புக் கொண்டது. ஹிந்தியை ஊக்குவிக்கவும், இந்த முடிவின் முக்கியத்துவத்தை எடுத்துரைக்கவும் 1953 ஆம் ஆண்டில் ஹிந்தி dhதிவஸ் கொண்டாட்டங்கள் தொடங்கப்பட்டன. அரசு அலுவலகங்களில் ஹிந்தியை தாய்மொழியாக கொண்டிராதவர்களுக்கு போட்டிகள் வைத்து பரிசும் கொடுப்பது வழக்கம். 

******

 

இந்த வாரத்தின் தகவல்: தேவையற்ற டாம்பீகம்…

தங்களிடம் அதிக அளவில் பணம் இருந்தால் அவற்றை வெளியில் எல்லோருக்கும் காண்பிக்கும்படி பகட்டாக சிலர் உலவுவதை வழக்கமாக வைத்திருக்கிறார்கள்.  தேவையற்ற டாம்பீகம் தான் என்றாலும் பலருக்கும் இப்படி இருப்பது பிடித்திருக்கிறது. சமீபத்தில் படித்த ஒரு செய்தி வியக்க வைத்தது என்பதை விட இப்படி ஒரு டாம்பீகம் - காட்சிப்படுத்துவது தேவையா என்ற கேள்வியையும் எழுப்பியது எனக்குள்! செய்தி இது தான் - பூனேவைச் சேர்ந்த குடும்பத்தினர் திருமலா திருப்பதி பெருமாள் தரிசனத்திற்கு வந்திருந்த போது சுமார் 25 கிலோ - ஆமாம் கிலோ தான்! - அளவில் தங்க நகைகள் அணிந்து வந்திருக்கிறார்கள்! நம் ஊர் கணக்குப்படி 25000 கிராம் - அதாவது 3125 பவுன் நகைகளை அணிந்து வந்திருக்கிறார்கள்! இப்படிச் செய்வதற்கு அவர்களுக்கு சுதந்திரம் இருக்கிறது என்றாலும், இது தேவையற்றது என்பதே எனது எண்ணம் - உங்கள் எண்ணம் என்ன சொல்லுங்களேன்! செய்தியை படிக்க நினைத்தால் கீழே உள்ள சுட்டி வழி செய்தியை படிக்கலாம்!

Pune family visits Tirumala wearing 25 kg gold, X asks ‘Why this show-off in front of God’ | Trending - Hindustan Times

******

இந்த வாரத்தின் ரசித்த காணொளி : நிழல் விளையாட்டு…

நிழல்களை வைத்தே கலைக்கண்ணோடு பல ஓவியங்களை காண்பவருடன் பேச வைக்கிறார் வின்செண்ட் Bபால் என்ற கலைஞர்.  சிறு வயதில் கைகளைக் கொண்டு நிழலில் மான், நாய் போன்ற உருவங்களை வரவழைத்தது உண்டு என்றாலும் இது போன்று முயற்சி செய்ததில்லை. இந்த ஓவியம்/காணொளியின் பின்னே எத்தனை உழைப்பு, கற்பனை இருக்கும் என்று எண்ணும்போதே பிரமிப்பாக இருக்கிறது. மாதிரிக்கு ஒரு காணொளி மட்டும் இங்கே தந்திருக்கிறேன். அவரது பக்கத்தில் இது போன்ற காணொளிகள் நிறைய இருக்கின்றன.  முடிந்தால் நேரம் எடுத்து சிலவற்றையேனும் பாருங்களேன்.

மேலே உள்ள காணொளியைப் பார்ப்பதில் சிரமங்கள் இருந்தால், கீழே உள்ள சுட்டி வழியாகவும் பார்க்கலாம். 

Power of Shadowology ✨✨ (youtube.com)

******

பழைய நினைப்புடா பேராண்டி : முக்தி துவாரகா

2015-ஆம் ஆண்டு இதே நாளில் வெளியிட்ட பதிவு - முக்தி துவாரகா - அந்தப் பதிவிலிருந்து சில வரிகள் இங்கே.  

பஞ்ச் துவாரகா பயணத்தில் நாங்கள் முதன் முதலாக பார்த்தது சோம்நாத் கோவில் தான் என்றாலும் பஞ்ச் துவாரகா என அழைக்கப்படும் இடங்களில் முதலாவதாக பார்த்தது முக்தி துவாரகா என அழைக்கப்படும் இடம் தான். சோம்நாத் அருகிலேயே இருக்கிறது.  ”[B] பால் கா தீர்த் எனவும் அழைக்கப்படும் இவ்விடத்தில் தான் கிருஷ்ணாவதாரத்தின் முடிவும் நிகழ்ந்தது என்பதும் நம்பிக்கை.

மஹாபாரத யுத்தத்தில் பாண்டவர்கள் வெற்றி பெற்றார்கள். கௌரவர்கள் தோல்வி அடைந்தார்கள்.  துரியோதனன் உள்ளிட்ட காந்தாரியின் 100 மகன்களும் உயிரிழந்தார்கள். தான் உயிருடன் இருக்கும்போதே தனது 100 மகன்களையும் இழந்துவிட்ட காந்தாரி கிருஷ்ணனுக்கு சாபம் கொடுத்தாளாம்....  சாபம் கொடுப்பது பலருக்கும் பிடித்த விஷயம் போல!

”கண்ணா எனது 100 மகன்களையும், நான் உயிருடன் இருக்கும்போதே கொன்றாய். புத்திரசோகத்தில் சொல்கிறேன்... எவ்விதம் எனக்கு புத்திரன் ஏதுமின்றி செய்தாயோ, அதுபோலவே உன் கண் முன்பாகவே உன் இனம் அழிந்துபட காண்பாய்”

மேலே உள்ள சுட்டி வழி முழு பதிவையும் படித்து ரசிக்கலாமே - இது வரை நீங்கள் படித்திருக்காவிட்டால்!

******

இந்த வாரத்தின் ரசித்த பாடல் : வாட்டர் பேக்கட்

இந்த பாடல் சமீபமாக ரீல்ஸ், ஷார்ட்ஸ் என பலவற்றிலும், பல மாநிலத்தவர்களாலும் பிரபலமாக பயன்படுத்தப்படும் பாடலாக இருக்கிறது. அவர்களது பாஷையில் சொல்ல வேண்டுமென்றால் ட்ரெண்டிங் பாடல்களில் ஒன்றாக இருக்கிறது.   பாடல் குறித்து தேடியபோது தான் தெரிந்தது புதிதாக வெளிவந்திருக்கும் ராயன் படப்பாடல் என்று.  பாடல் காணொளியுடன் பார்க்கும்போது பிடிக்கவில்லை என்றாலும், பாடலை மட்டும் கேட்க ஏனோ பிடித்தது! ஒரு வேளை பல இடங்களில் கேட்டுவிட்டதால் பிடித்திருக்கலாம். விரும்பினால் நீங்களும் கேட்டுப் பாருங்களேன் யூவில்! Achamass என்ற பெயரில் இன்ஸ்டாகிராமில் ஒரு பக்கம் பார்த்தேன் - ஒரு முதியவரும் மூதாட்டியும் இந்தப் பாடலுக்கு ரீல்ஸ் செய்திருக்கிறார்கள். ரசிக்க முடிந்தது - இது தேவையா என்று தோன்றினாலும், வயது அதிகமானாலும் வாழ்க்கையை ரசிக்கிறார்கள் என்ற கோணத்திலும் இதைப் பார்க்கலாம்!

******

இந்த வாரத்தின் ரசித்த கவிதை :  தனிமை…

இந்த வாரத்தின் ரசித்த கவிதையாக கல்யாண்ஜி அவர்களின் கவிதை ஒன்று உங்கள் பார்வைக்கு! தனிமை பல சமயங்களில் பிடித்தமானதாக இருக்கலாம்! உங்களுக்கு தனிமை பிடிக்குமா சொல்லுங்களேன்!

தனியாக சீட்டு விளையாடுபவர்களை

தனியாக சமைத்துச் தனியாக சாப்பிடுகிறவர்களை

தனியாக பழைய பாடல்கள் கேட்பவரை

தனியாக மது அருந்துகிறவர்களை

தனியாக அமர்ந்து நூலகங்களில் வாசிப்பவர்களை

தனியாக உலர்சலவையகங்களுக்கு வருபவர்களை

தனியாக நகராட்சிப் பூங்காவில் அமர்ந்திருப்பவர்களை

தனியாக தேவாலயங்களில் பிரார்த்திப்பவரை

தனியாக கிளிஜோஸ்யம் பார்ப்பவரை

தனியாக அரசமர இலையை அவதானிக்கிறவரை

தனியாக நின்று காக்கை கொத்தி இழுக்கும்

பெருச்சாளியின் திறந்த வயிற்றைக் காண்கிறவரை

தனியாக இருக்கும் அவர் பக்கம் உருண்டுவரும்

விளையாட்டுப் பந்தை எடுத்து வீசாதவர்களை

தன்னுடைய கால்பக்கம் நிழற்குடையில் ஒதுங்கும்

நாய்க்குட்டியைக் குனிந்து பார்க்காதவர்களை

ஒன்றும் செய்ய முடியாததற்கு வருத்தப்படாதீர்கள்.

அவர்கள் தேர்ந்தெடுத்த தனிமையில் 

அப்படியே பத்திரமாக இருக்கட்டும்.

அவர்களின் தீவைச் சுற்றியே இருக்கிறது

அத்தனை திசைகளிலும்

நம் கடல்.

    - கல்யாண்ஜி

******

இந்த வாரத்தின் ஆலயம் :  Bபிஜ்லி மஹாதேவ் மந்திர்

ஹிமாச்சலப் பிரதேசத்தின் குல்லூ-மணாலி குறித்து உங்களில் பலர் அறிந்திருக்கலாம். எனது பக்கத்தினை தொடர்ந்து வாசிப்பவர்களுக்கு நான் அந்த இடங்களுக்குச் சென்று வந்தபின்னர் எழுதிய பயணக் கட்டுரைகளும் நினைவில் இருக்கலாம். மணாலியிலிருந்து சில கிலோமீட்டர் தொலைவில் இருக்கும் ஒரு ஆலயம் தான் இந்த Bபிஜ்லி மஹாதேவ் மந்திர்! இதில் முதல் வார்த்தைக்கு அர்த்தம் மின்னல்! வாம்மா மின்னல் என்று அழைக்கப்படும் மின்னல் பெண் அல்ல! நிஜமான மின்னல்! பன்னிரெண்டு ஆண்டுகளுக்கு ஒரு முறை இந்த ஆலயத்தில் வீற்றிருக்கும் சிவலிங்கத்தின் மீது மின்னல் தாக்கி, லிங்கம் பல துண்டுகளாக உடைகிறது என்றும் அதன் பின்னர் அங்கே இருக்கும் பூசாரி உடைந்த லிங்கத்தின் பாகங்களை வெண்ணெய் கொண்டு மொத்தமாக சேர்த்து வைத்த சில நாட்களுக்குப் பின்னர் எந்த வித சேதமும் தெரியாமல் முழு சிவலிங்கமாக மாறிவிடும் என்பது தான் இந்த ஆலயத்திற்கான பெயர் காரணம்! எத்தனை எத்தனை ஆலயங்கள் நம் நாட்டில்.  இந்த ஆலயம் வரை ஒரு குறு ட்ரெக்கிங் சென்று வர முடியும் என்பது கூடுதல் தகவல். 

******

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லி

14 செப்டம்பர் 2024