கதம்பம் - சமஸ்க்ருதம் - தாடங்க பிரதிஷ்டை - இறையருளும் குருவருளும்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

இதற்கு முன்னர் வெளியிட்ட Kharigar Gaathaa - பகுதி ஒன்று பதிவினை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

சமஸ்க்ருதம் - 16 ஃபிப்ரவரி 2025: 

நட்புகள் எல்லோரும் நலம் என நினைக்கிறேன்! மீண்டும் மாணவியாக மாறியதிலிருந்து நேரம் மின்னலாய் கடந்து செல்கின்றது! ஒவ்வொரு நாளும் அடுத்தடுத்து செய்ய வேண்டிய வேலைகள்! வார இறுதியில் செய்ய வேண்டிய வேலைகள் என திட்டமிடலுடன் பயணிக்கிறது! 

சமஸ்கிருதத்தில் இன்று யூனிட் டெஸ்ட் நடக்க இருக்கிறது என்பதால் இந்த வாரம் முழுவதுமே அதற்கான மெனக்கெடல்களுடன் எழுதிப் பார்ப்பதும், படிப்பதுமாக இருந்தேன்! செய்வதை 'ஏனோ தானோ' என்றில்லாமல் சற்று சிரத்தையுடன் செய்ய வேண்டும் என்று நினைப்பவள்...🙂

ஒரு விதத்தில் இதுவும் நல்லதே! தேவையற்ற சிந்தனைகளுக்கு இடமில்லையே! வார இறுதியில் தான் புத்தக வாசிப்பு, வீட்டை எப்போதும் போல் பராமரிக்க செய்ய வேண்டிய வேலைகள், கொஞ்சம் மாற்றத்துடன் செய்யப்படும் சமையல் என இலக்குகளுடன் பயணிக்கிறது! கஷ்டப்படாமல் எதுவும் கிடைக்காது இல்லையா!

நல்லதே நடக்கட்டும்! நலமே சூழட்டும்!

*******

தாடங்க பிரதிஷ்டை - 17 ஃபிப்ரவரி 2025: 

இன்றைய நாள் இறையருளுடன் சென்றது எனச் சொல்வேன்! திருச்சி ஆனைக்கா அகிலாண்டேஸ்வரிக்கு தாடங்க பிரதிஷ்டை செய்வதற்காக காஞ்சி மடத்திலிருந்து 'பெரியவா' இங்கு வருகை தந்திருக்கிறார்! நேற்றைய பொழுதில் தாடங்க பிரதிஷ்டை எனப்படும் ஜீர்ணோதாரணம் மிகச் சிறப்பாக நடைபெற்றது!

நான் இப்போது அம்பாளின் அழகை வர்ணிக்கும் செளந்தர்ய லஹரியை முறையாக ஒரு குருவிடம் கற்றுக் கொண்டிருக்கிறேன் அல்லவா! செளந்தர்ய லஹரி உருவான கதையைப் பற்றி மெய்சிலிர்க்கும் விதமாக மேம் சொல்லியிருக்கிறார்! இதுவரை 99 ஸ்லோகங்களை கற்றுக் கொண்டுள்ளேன்! அதில் 28வது ஸ்லோகத்தில் தாடங்க மகிமையைப் பற்றி சொல்லியிருப்பதாகவும் நேற்றைய பொழுதில் எல்லோரையும் பாராயணம் செய்யும்படியும் எங்க மேம் கூடச் சொல்லியிருந்தார்! 

அப்படி இன்றைக்கு சங்கர மடத்திற்குச் சென்று பெரியவாளையும் தரிசித்து வந்தேன்! பெரியவா சந்திரமெளீஸ்வர பூஜை செய்து கொண்டிருக்க ஒருபுறம் கோ பூஜையும் நடைபெற்றது! அங்கேயே இரண்டு மணிநேரம் போல உட்கார்ந்து விட்டேன்!

கோவையில் ஒருசமயம் பெரியவா இரண்டு பேரும் வந்திருப்பதாக தெரிய வரவும் என் சிறுவயதில் அம்மாவோடு சென்று பெரியவாளை தரிசித்திருக்கிறேன். அதன் பின்பு இப்போது தான் அந்த பாக்யம்!

அங்கு அமர்ந்திருந்த சமயத்தில் மனதில் பல வித எண்ணங்கள்! பிரார்த்தனைகள்! எனக்கு நானே சொல்லிக் கொண்ட சமாதானங்கள்! கண்களிலிருந்து எதற்கென்றே தெரியாமல் கரையை உடைத்துக் கொண்டு பெருகிய நீர்! பின்பு எல்லாவற்றையும் குருவின் பாதங்களில் சமர்ப்பித்து விட்ட நிம்மதியில் தெளிவும் கிடைத்தது ஆச்சர்யம்! 

நடப்பது எல்லாம் நன்மைக்கே! 

ஜெய ஜெய சங்கர! ஹர ஹர சங்கர!

*******

இறையருளும் குருவருளும் - 18 ஃபிப்ரவரி 2025: 

நேற்றைய பொழுதில் என்னவரிடமிருந்து ஒரு காணொளி அழைப்பு வந்தது! அது தாங்க வீடியோ கால்! அவர் கடந்த மூன்று நாட்களாக உத்திராகண்ட் அருகே மலையேற்றம் செய்து வருவதால் அங்கிருந்து அழைத்து பனி படர்ந்த மலைகளையும் தூரத்தில் தெரிந்த கோவிலையும் காண்பித்து உடன் வந்திருக்கும் நண்பர்களையும் அறிமுகம் செய்து வைத்தார்! எல்லோரும் மாற்றி மாற்றி நமஸ்கார் ஜி சொல்லிக் கொண்டோம்!

அவர் என்னிடம் காண்பித்த கோவில் Tungnath temple! உலகிலேயே உயரமான இடத்தில் இருக்கும் சிவன் கோவிலாம்! பஞ்ச கேதாரில் ஒன்று எனவும் சொன்னார்! அதை காணொளியாகவும் எடுத்து அனுப்பியிருந்தார்! சரி! இதையெல்லாம் அவருடைய பயணத்தொடரிலேயே எழுதுவாரே என்று நீங்கள் நினைப்பது புரிகிறது!

நேற்றைய நாளில் குருவருளைத் தேடி நான் சங்கர மடத்திற்குச் சென்றிருந்தேன் அல்லவா! அங்கு ஆசி பெறுவதற்காக வந்திருந்த தம்பதிகளைப் பார்க்கும் போது நான் இப்படி தனித்து வந்திருக்கிறேனே என்ற எண்ணம் மேலோங்கியது என்னவோ உண்மை! ஆனால் நிதானமாக யோசித்துப் பார்த்ததில் ஆளுக்கொருபுறமாக இருந்தாலும் இறையருளையும் குருவருளையும் ஒரே நாளில் ஒருசேர பெற்றிருக்கிறோம் என்று புரிந்தது!

சமஸ்கிருதத்தில் செய்யுள் அல்லது நன்மொழி என்று சொல்லப்படும் சுபாஷிதானி ஒன்று தான் சட்டென எனக்கு  நினைவுக்கு வந்தது!

दीर्घं लक्ष्यं पश्यत 

अल्पं लक्ष्यं मा पश्यत 

அதாவது எல்லோரும் தொலைநோக்கு பார்வையுடனும் லட்சியத்துடனும் இருங்கள்! குறுகிய மனப்பான்மையோடு இருக்காதீர்கள் என்று பொருள்! என்னுடைய உலகம் என்பது மிகச் சிறியது! அதற்கேற்ப தான் என் சிந்தனைகளும் இருக்கும்! ஆனால் இறைவன் எங்களுக்காக வகுத்து வைத்திருக்கும் வரைபடம் வேறு என்று புரிந்த நாள் இன்று!

நம்முடைய சிந்தனைகளுக்கும் இறைவன் நியமித்திருக்கும் கணக்குகளுக்கும் தான் எத்தனை பாகுபாடு! புரிந்து கொள்ள முடியாத பொருள்கள்! நல்லதே நடக்கட்டும்! நலமே சூழட்டும்! இறைசிந்தனையுடன் இன்றைய நாளைத் துவக்குவோம்!

*******

இன்றைய பதிவு குறித்த தங்களது எண்ணங்களை பின்னூட்டத்தில் சொல்லுங்கள். விரைவில் வேறொரு பதிவுடன் உங்கள் அனைவரையும் சந்திக்கும் வரை…

நட்புடன்

ஆதி வெங்கட்

திருவரங்கம்

19 ஃபிப்ரவரி 2025