மாரீசன்.....

சென்ற வாரம் பார்த்த குறும்படம் – பேரைச் சொல்லவா?.  இனி இந்த வாரம் என்ன குறும்படம் பார்க்கப் போகிறோம் என்பதைப் பார்க்கலாம்!

இந்த வாரம் மாரீசன் எனும் குறும்படம். இராவணன் சீதையைக் கவர்ந்து செல்ல உதவ மாய மானாக மாரீசன் வருவார்.  அது போல ஏதாவது இருக்கும் என நினைத்து தான் படம் பார்க்க ஆரம்பித்தேன். இரு நண்பர்கள் பேசிக்கொண்டு இருக்கிறார்கள்.  ஒரு பெண்ணைக் காதலிப்பது பற்றி சொல்ல அவருக்கு – ‘இந்த கண்ணாடி போட்டுக்கோ, இந்த மாதிரி உடை போட்டுக்கோ’ என்றெல்லாம் சொல்லி உதவி செய்கிறார்.

அந்தப் பெண் வர, இவர் பெண் பின்னாலேயே செல்கிறார். இரண்டு மூன்று முறை முயற்சித்தும் தோல்வி. ஒரு ரோஜா கொடுக்கும் போது அதை வாங்கிக் கீழே போட்டு விட்டு, கன்னத்தில் அரைந்து விடுகிறார். அதன் பிறகு அந்த பெண்ணிற்கு அவளது அலைபேசியில் ஒரு அழைப்பு வருகிறது. மறுமுனையில் ஒரு பெண் குரல் – “இன்னிக்கு நீ ஒரு கொலை நடப்பதை பார்க்கப் போகிறாய்!” என்று சொல்கிறது. வந்த எண்ணிற்கு இந்த பெண் அழைக்க, அந்த அலைபேசியை தொடர்பு கொள்ள முடியவில்லை.

அன்று வெளியே போகும்போது அலைபேசியில் பெண் சொன்னதைப் போலவே ஒரு கொலை நடப்பதைப் பார்க்கிறார். இரண்டாவது முறை அலைபேசியில் அதே பெண் குரல் – “இன்று உனக்கு அதிர்ஷ்டம் அடிக்கப் போகிறது, உனக்கு பணம் கிடைக்கும்!” என்று சொல்ல, அன்று கீழேயிருந்து ஒரு மணிபர்ஸ் பணத்துடன் கிடைக்கிறது.

மூன்றாம் முறை அலைபேசியில் அழைப்பு வரும்போது அக்குரல் சொல்வது – “உன்னிடம் ஒருவன் காதலைச் சொல்வான்! அப்படிச் சொல்லி விட்டால் இரண்டு மணி நேரத்திற்குள் நீ இறந்து விடுவாய்!” என்று சொல்லி அலைபேசியை வைத்து விட, அதே போல முன்னால் அரை வாங்கிய ஆண் இவள் வீட்டிற்கு வந்து ஒரு ரோஜாவைக் கொடுத்து தனது காதலை வெளிப்படுத்துகிறார்.  இரண்டு மணி நேரத்திற்குப் பிறகு என்ன ஆனது, மாரீசன் எங்கே வந்தார் என்பதைத் தெரிந்து கொள்ளும் ஆவல் உங்களுக்குள் மிகுந்து விட்டதா?

குறும்படத்தினைப் பாருங்களேன்....

என்ன நண்பர்களே, குறும்படத்தினை ரசித்தீர்களா? பின்னூட்டத்தில் சொல்லுங்களேன். குறும்படத்தினை இயக்கியவருக்கும், அதில் நடித்தவர்களுக்கும் மனமார்ந்த வாழ்த்துகள்.

மீண்டும் வேறொரு பகிர்வில் உங்களைச் சந்திக்கும் வரை......

நட்புடன்

வெங்கட்.

புது தில்லி.